އިނގިރޭސިވިލާތުގެ ރިފޯމް ޔޫކޭ ޕާޓީގެ ލީޑަރު ނައިޖެލް ފަރާޖަށް، އޭނާގެ މާލީ މުއާމަލާތްތަކާ ގުޅިގެން އަމާޒުވެފައިވާ ބޮޑެތި ފާޑުކިޔުންތަކާއި ތަހުގީގުތަކާ ހުރެ ކްލެކްޓަން ދާއިރާގެ ބަރުލަމާނީ ގޮނޑިން ކުއްލި ގޮތަކަށް އިސްތިއުފާ ދެއްވައިފި އެވެ. 
 އޭނާ އިސްތިއުފާ ދެއްވީ ގާނޫނުހަދާ މަޖިލީހުގެ މެންބަރަކަށް ވުމުގެ ކުރިންނާއި ފަހުން ލިބުނު ބޮޑެތި ހަދިޔާތަކާއި، އަމިއްލަ ދަތުރުފުޅުތަކުގެ ހަރަދުތައް ހާމަނުކުރި މައްސަލާގައި ޕާލިމަންޓްގެ ސްޓޭންޑާޑްސް ކޮމިޝަނަރުން އޭނާގެ މައްސަލަ ބަލަމުންދާ ދަނޑިވަޅެއްގަ އެވެ. 
ފަރާޖްގެ މައްޗަށް ތުހުމަތުކުރެވިފައިވާ މާލީ ނުހައްގު މުއާމަލާތްތަކުގެ ތެރޭގައި، މި އަހަރުގެ ފެބްރުއަރީ ގައި އޭނާ ރާއްޖެއަށް ކުރެއްވި ކުއްލި ދަތުރުގެ މައްސަލަ ވަނީ ވަރަށް ބޮޑަށް ހޫނުވެފަ އެވެ. އޭނާ  60 މިލިއަން ޑޮލަރުގެ އަގުބޮޑު ޕްރައިވެޓް ޖެޓެއްގައި ރާއްޖެއަށް ކުރެއްވި މި ދަތުރުގެ ހަރަދު މަޖިލީހުގެ ރެޖިސްޓްރީގައި ފުރަތަމަ ހާމަކުރިއިރު އޮޅުވާލާފައިވާ ކަމަށް އިދިކޮޅު ލޭބާ ޕާޓީން ވަނީ ތުހުމަތުކޮށްފަ އެވެ.  މި ދަތުރުގެ އަގުގެ ގޮތުގައި ފުރަތަމަ 12,500 ފައުންޑް ޖެހުމަށް ފަހު، ފަހުން ވަނީ އެ އަދަދު ދެގުނަ މަތިކޮށްފަ އެވެ. މި ޖެޓަކީ ފަރާޖަށް ބޮޑެތި މާލީ އެހީތަކެއް ދެމުންދާ ކްރިޕްޓޯ ބިލިއަނަރު ކްރިސްޓޮފާ ހާބޯންއާ ގުޅުންހުރި ޖެޓެއް ކަމަށް ރިޕޯޓްތައް ބުނެ އެވެ.
ރާއްޖެ މަގުން ކަނޑުބޯޓެއްގައި ޗާގޯސް ޖަޒީރާއަށް ދިއުމަށް ފަރާޖް ކުރެއްވި މި ދަތުރަކީ އަމިއްލަ ސިޔާސީ މަންފާއަށް ރާއްޖޭގައި ޖެއްސި "މުޑުދާރު ސްޓަންޓެއް" ގެ ގޮތުގައި އިނގިރޭސި ސިޔާސީ މަސްރަހުގައި ވަނީ ސިފަކޮށްފަ އެވެ. އެ ދަތުރުގައި އޭނާ ވަނީ އިނގިރޭސި ސަރުކާރުން ނުފޫޒު ފޯރުވައިގެން ދިވެހި ސަރުކާރުން އޭނާ ޗާގޯސްއަށް ދިޔަނުދީ ހުރަސްއެޅި ކަމަށް ބުނެ ރާއްޖެއަށް ބޮޑެތި ތުހުމަތުތަކެއް ވެސް ކޮށްފަ އެވެ. ނަމަވެސް ދިވެހި ސަރުކާރުން ވަނީ އެ ތުހުމަތުތައް ދޮގުކޮށް، އެކަމުގައި ރާއްޖޭގެ އެއްވެސް ބައިވެރިވުމެއް ނެތް ކަމަށް ބުނެފަ އެވެ. 
The most trusted news source in the Maldives
ރާއްޖޭގެ ދަތުރުގެ އިތުރުން، ކްރިޕްޓޯ ބިލިއަނަރު ހާބޯންގެ އަތުން އެޕްރީލް 2024 ގައި ލިބުނު 5 މިލިއަން ފައުންޑް (6.7 މިލިއަން ޑޮލަރު) ގެ އަމިއްލަ ހަދިޔާ މަޖިލީހުގެ ރެޖިސްޓްރީގައި ފަރާޖް ހާމަނުކުރާ މައްސަލައެއް ވެސް ދަނީ ބަލަމުންނެވެ.  ދި ކުރިން މާލީ ކުށްތަކެއް ސާބިތުވެފައިވާ ޖޯޖް ކޮޓްރެލް، ފަރާޖްގެ ކެމްޕޭނަށާއި، ސެކިއުރިޓީއަށާއި، ސޯޝަލް މީޑިއާ ޓީމަށް ބޮޑެތި ހަރަދުތަކެއްކޮށް، ލަންޑަނުން އަގުބޮޑު ގެއެއް ބޭނުންކުރަން ދިން މައްސަލަ ހާމަނުކުރުން ވެސް މީގެ ތެރޭގައި ހިމެނެ އެވެ. 
މި ހުރިހާ މާލީ ފާޑުކިޔުންތަކަކާ ގުޅިގެން ފަރާޖް މަގާމުން އިސްތިއުފާ ދެއްވި ނަމަވެސް، އޭނާ ވިދާޅުވީ މިއީ "އާންމު ރައްޔިތުންނާއި ނުފޫޒުގަދަ ބާރުވެރިން" ގެ މެދުގައި ކުރެވޭ ހަނގުރާމައެއް ކަމަށާއި، ކުރިއަށް އޮތް ބައި-އިލެކްޝަނުގައި އޭނާ އަލުން އެ ގޮނޑިއަށް ވާދަކުރައްވާނެ ކަމަށެވެ. ނަމަވެސް، ބައި-އިލެކްޝަން ކާމިޔާބުކޮށް އަލުން މަޖިލީހަށް ވަޑައިގަތަސް، އޭނާގެ މާލީ މައްސަލަތަކުގެ ބަރުލަމާނީ ތަހުގީގު ހަމަ އެވަގުތުން ފެށިގެން ކުރިއަށްދާނެ ކަމަށް އިނގިރޭސި މީޑިއާތަކުން ރިޕޯޓްކުރެ އެވެ.