ކުރީގެ ރައީސް މުހައްމަދު ނަޝީދުގެ ގާނޫނީ ވަކީލުންގެ ޓީމުގައި ހިމެނޭ މަހްފޫޒު ސައީދަށް ވަޅިން ހަމަލާދިނުމުގެ ތުހުމަތުގައި ފުލުހުން ހޯދަމުންދާ މީހެއްގެ ޕާސްޕޯޓް ކެންސަލް ކޮށްފި އެވެ.
އިމިގްރޭޝަން މޯލްޑިވްސް އިން ކެންސަލް ކޮށްފައިވަަނީ ރ. އިނގުރައިދޫ، ހުސައިން ޝަފްރާޒް އިބްރާހީމްގެ ޕާސްޕޯޓް އެވެ.
މަހްފޫޒަށް ވަޅިން ހަމަލާދިން މީހުން ހޯދުމަށް ފުލުހުން މަސައްކަތް ފެށުމާއެކު އޭނާ ވަނީ ރާއްޖެއިން ބޭރަށް ގޮސް ފިލާފަ އެވެ. އޭނާ ހޯދުމަށް ފުލުހުން ވަނީ އިންޓަޕޯލް މެދުވެރިކޮށް ރެޑް ނޯޓިސް ވެސް ނެރެފަ އެވެ.
އިމިގްރޭޝަން މޯލްޑިވްސް އިން މިއަދު ނެރުނު އިއުލާނެއްގައި ބުނެފައިވަނީ ޝަފްރާޒުގެ ޕާސްޕޯޓް ކެންސަލްކޮށް ރާއްޖެއާއި ރާއްޖެއިން ބޭރުގެ ކަމާ ބެހޭ ފަރާތްތަކަށް މިހާރު އެކަން އަންގާފައިވާނެ ކަަމަށެވެ.
އިމިގްރޭޝަނުން އިތުރަށް ބުނީ ޝަފްރާޒް ރާއްޖެ އައުމަށް ބޭނުންވެގެން ފޮރިން މިނިސްޓްރީ މެދުވެރިކޮށް އިމިގްރޭޝަނަށް ހުށަހެޅުމުން ރާއްޖެއަށް އައުމަށް ބޭނުންވާ ޓްރެވަލް ޑޮކިއުމެންޓް ހަދައިދޭނެ ކަމަށެވެ.
މަހުފޫޒުގެ ބޮލަށް ވަޅިން ހަމަލާދީފައި ވަނީ މިދިޔަ އަހަރުގެ ސެޕްޓެމްބަރު މަހުގެ ހަތަރުވަނަ ދުވަހުގެ ހަވީރު 5:20 ހާއިރު މާވެޔޮމަގުގައި ހިންގި ވާދީ ފްރެޝް ފިހާރަ ކައިރިންނެވެ.
މި ހަމަލައާ ގުޅިގެން މަހްފޫޒްގެ ބޮލާއި ލޮލަށް އަނިޔާވުމުގެ އިތުރަށް މަހުފޫޒުގެ ލޮލުގެ ފެނުމުގައި ފުސްކަމެއް ހުރުމުން މާލެއިން ފަރުވާކުރުމަށްފަހު އޭނާ ވަނީ ސްރީލަންކާއިން އިތުރު ފަރުވާވެސް ހޯދާފަ އެވެ.
މަހްފޫޒަށް ވަޅިން ހަމަލާދިނުމުގެ ތުހުމަތުގައި ދައުލަތުން ވަނީ ތިން މީހެއްގެ މައްޗަށް ދައުވާކޮށްފަ އެވެ. އެއީ އަހުމަދު ރާއިދާއި، ހާލިދު ނާފިއުއާއި އަދި ސިރާޖު ޖައުފަރުގެ މައްޗަށެވެ.