ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ޕްރައިމަރީގައި ވާދަކުރައްވާ އުމަރު ނަސީރަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ހަރަދުކުރައްވާ ކަމަށް ދެކެވެމުންދާ ވާހަކަތައް އެޕާޓީން ދޮގުކޮށްފި އެވެ.
ޖުމްހޫރީ ޕާޓީން މިގޮތަށް ބުނެފައިމިވަނީ ޕީޕީއެމްގެ ޕްރައިމަރީގައި ވާދަކުރައްވާ އެ ޕާޓީގެ ޕާލަމެންޓްރީ ގްރޫޕްގެ ލީޑަރު އަބްދުﷲ ޔާމީނާ ދެކޮޅަށް ޕީޕީއެމްގެ ޕްރައިމަރީގެ ތެރޭއިން "ބަޣާވާތް" ކުރަން، އުމަރު ނަސީރަށްލީޑަރު ގާސިމް އިބްރާހިމް ހަރަދު ކުރައްވާ ކަމަށް އެޕާޓީގެ މެންބަރު މާފަންނު ހުޅަނގު ދާއިރާގެ މެންބަރު އަބްދުﷲ އަބްދުއް ރަހީމް ވިދާޅުވެފައިވާ ދަނޑިވަޅެއްގައި އެވެ.
"މިހާރު 'ބަޣާވާތް' ކުރަން އުޅެނީ އަބްދުﷲ ޔާމީނާ ދެކޮޅަށް، ޕީޕީއެމް ޕްރައިމަރީގެ ތެރެއިން، އުމަރު ނަސީރަށް ވެސް ހަރަދު ކުރައްވަނީ އަޅުގަނޑުގެ ޕާޓީގެ ލީޑަރު، މިއީ އަޅުގަނޑުމެންނަށް ނޭނގޭ ކަމެއް ނޫން،"  މަޖިލީހުގެ ޖަލްސާގައި އަބްދުﷲ އަބްދުއް ރަހީމް ވިދާޅުވެފައިވެ އެވެ.
އޭނާގެ މިވާހަކަތަކާއި ގުޅިގެން ޖުމްހޫރީ ޕާޓީން މިއަދު ނެރުނު ނޫސް ބަޔާނެއްގައި ބުނެފައިވަނީ އަބްދުﷲ އަބްދުއްރަހީމް މަޖިލީހުގައި އިއްޔެ ދެއްކެވި ވާހަކަފުޅުގައި ޕީޕީއެމްގެ ޕްރައިމަރީ ތެރެއިން ބަޣާވާތްކޮށް ރިޔާސީ ޕްރައިމަރީގައި ވާދަ ކުރައްވާ އުމަރު ނަސީރަށް ހަރަދު ކުރައްވާ ކަމަށް ވިދާޅުވެ ދެއްކެވި ވާހަކަފުޅުތަކަކީ ޕާޓީގެ ލީޑަރު ގާސިމް އިބްރާހީމްގެ އަގުވެއްޓޭ ގޮތަށް ދައްކަވާފައިވާ ވަހަކަފުޅުތަކެއް ކަމަށެވެ.
"އަބްދުﷲ އަބްދުއްރަޙީމް މިޕާޓީގެ ލީޑަރއަށް ނިސްބަތްކޮށް، ޕީޕީއެމްގެ ޕްރައިމަރީގައި ވާދަކުރައްވާ އުމަރު ނަސީރަށް ޚަރަދު ކުރައްވާ ކަމަށް ދެއްކި ވާހަކަ މިޕާޓީން ދޮގުކުރަމެވެ. އަދި ބަޣާވާތްކުރިކަމަށާއި ބަޣާވާތްކުރަން އުޅޭކަމަށް ޢަބްދުﷲ އަބްދުއްރަޙީމް އެދެއްކެވި ވާހަކައަކީ މިޕާޓީން ޤަބޫލުކުރާ ވާހަކައެއް ނޫންކަމަށާއި އެފަދަ ވާހަކައަކީ އެބޭފުޅާ އަމިއްލައަށް، އަމިއްލަ ފިކުރުގައި ދައްކާ ވާހަކަ ކަމަށް ދަންނަވައި އެވާހަކަ ކުށްވެރިކުރަމެވެ." ބަޔާނުގައިވެ އެވެ.
ޖުމްހޫރީ ޕާޓީގެ ލީޑަރަކީ އެއްވެސް އިރެއްގައި އެއްވެސް ޕާޓީއެއްގެ ތެރޭގައި ހަމަނުޖެހުމެއް އުފެއްދުމަށް އެހީތެރިވެދޭ، ހިތްވަރު ދޭނެ ބޭފުޅެއް ނޫން ކަމަށާއި އެފަދަ ތުހުމަތުތައް ޕާޓީގެ ލީޑަރުގެ އިސްތަށިފުޅުގައި އެޅުވުމަށް އެއްވެސް ބޭފުޅަކު މަސައްކަތް ކުރެއްވުމަކީ އެގޮތަށް މަސައްކަތް ކުރައްވާ ބޭފުޅުންގެ ޒިންމާދާރުކަން ކުޑަކަން ދޭހަވާ ކަމެއް ކަމުގައިދެކޭ ކަމަށް ވެސް ޖުމްހޫރީ ޕާޓީން ބުނެފައިވެ އެވެ.