މިއަދު ފުލުސް އޮފީހަށް ހާޒިރުކުރީ ސަރުކާރުގެ އިއްތިހާދުގައި ހިމެނޭ ސިޔާސީ ޕާޓީތަކުގެ ވާދަވެރިކަމުގެ ސަބަބުން ކަމަށް ޕީޕީއެމްގެ އިންތިގާލީ ނައިބު ރައީސް އުމަރު ނަސީރު ވިދާޅުވެއްޖެ އެވެ.
މިއަދު ހެނދުނު 10:00 ޖެހިއިރު ފުލުސް އޮފީހަށް ހާޒިރުވެވަޑައިގެން ބަޔާން ދެއްވުމަށްފަހު ނޫސްވެރިންނަށް މައުލޫމާތު ދެއްވަމުން އުމަރު ވިދާޅުވީ ފުލުސް އޮފީހަށް ހާޒިރުކުރީ 23 ޑިސެމްބަރު އިއްތިހާދުން 22 ރޭ އެމްއެމްއޭ ސަރަހައްދުގައި ކުރި މުޒާހަރާތަކުގެ ތެރެއިން ރެއެއްގައި ހަރުގަނޑެއް ބޭނުން ކޮށްގެން އަރާ ވާހަކައެއް ދެއްކި މައްސަލަ އާއި ގުޅިގެން ކަމަށެވެ.
"އަޅުގަނޑު ދެއްކި ވާހަކައިގައި ހަރުގަނޑުތަކެއް ބޭނުންކޮށްގެން ތަނަކަށް އަރާ ވާހަކަ އަޅުގަނޑު ދައްކާފައި އޮންނާނީ. އެ ކަމާ ބެހޭ ގޮތުން ކުރިން ވެސް ސުވާލުކުރެވުނު." އުމަރު ވިދާޅުވި އެވެ.
އުމަރު އިތުރަށް ވިދާޅުވީ ފުލުހުންގެ ސްޓޭޓްމަންޓްގައި ވެސް ހަރުގަނޑުތައް ވިއްދާފަ ފުންމާލަނީ ކޮންތަނަކަށް ކަމެއް ބަޔާނުގައި ނެތް ކަމަށާއި އަދި އެރޭ އުމަރު ވެސް ފުންމާލާނީ ކޮންތަނަކަށް ކަމެއް ވިދާޅުވެފައިނުވާނެ ކަމަށެވެ.
" ދެން އަޅުގަނޑު ދަންނަވާފައިވަނީ ހަރުގަނޑުތައް ބޭނުން ނުކޮށް ހުރެ ހުރެ މިހާރު ހަލާކުވެއްޖޭ. އެކަމާ ގުޅޭގޮތުން ބަޔާނެއްދީފައި އަޅުގަނޑު މިއައީ އެބޭފުޅުންގެ ސްޓޭޓުމަންޓަކު ވެސް ނެތް ހަރުގަނޑު ޖައްސަނީ ވަކިތަނެއްގައި ކަމަކަށް. އެ ސްކްރިޕްޓަގައި ނެތް ކޮން ތަނެއްގައެއް ކަމެއް ހަރުގަނޑު ޖައްސަނީ،" އުމަރު ވިދާޅުވިއެވެ.
އޭނާ ވިދާޅުވީ އޭނާގެ މައްޗަށް އެއްވެސް ކުށެއް ސާބިތު ނުކުރެވޭނެ ކަމަށާއި ނަމަވެސް ޕޮލިހަށް ހާޒިރުކުރުމުގައި ސަރުކާރުގެ އިއްތިހާދުގައި ހިމެނޭ ސިޔާސީ ވާދަވެރިންގެ އަތެއްވާކަމަށް ބެލެވޭ ކަމަށެވެ.
އިއްޔެ ޑީއާރުޕީން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ނައިބު ލީޑަރު އިބްރާހިމް ޝަރީފް (މަވޯޓާ ޝަރީފް) ވިދާޅުވެފައިވަނީ އުމަރު ނަސީރު ހަރުގަނޑަކުން އަރާ މައްސަލަ ފުލުހުން ބަލާފައިނުވާ ކަމުގެ އިޝާރާތެއްކޮށްފައެވެ.
އުމަރު އިތުރަށް ވިދާޅުވީ ފުލުހުންގެ އިދާރާއަށް މައްސަލައެއް މީގެކުރިން ހުށަހަޅާފައި ވާނެކަމަށާއި އެއީ ރައީސް ނަޝީދު ޖަލްސާއެއްގައި ވިދާޅުވެފައިވާ "ބޮވޭނެ. ބޮވެންޖެހޭނެ." ކަމަށް ވިދާޅުވެފައިވާ މައްސަލައެއްކަމަށެވެ.
އަދި އެ މައްސަލަ ކޮބައިތޯ ދެންނެވުމުން ފުލުހުން އެ މައްސަލަ ވެސް ކުރިއަށް ގެންދާނެ ކަމުގެ ޔަގީންކަން ދެއްވާފައިވާ ކަމަށް ވެސް އުމަރު ވިދާޅުވި އެވެ. ކުރީގެ ރައީސް މުހައްމަދު ނަޝީދުގެ ވެރިކަމުގައި ވެސް މި މައްސަލާގައި އުމަރު ވަނީ ޕޮލިހަށް ހާޒިރުކޮށްފަ އެވެ. ނަމަވެސް ރައީސް ނަޝީދާ ދެކޮޅަށް އުމަރު ކުރިން ހުށަހަޅާފައިވާ މައްސަލަތަކެއްގެ ''ކޭސް ނަމްބަރު" ފުލުހުން ބުނެ ނުދިނުމުން އެ ފަހަރު އުމަރު ވަނީ ޖަވާބުދާރީނުވެފަ އެވެ.