އުމުރުން 25 އަހަރުގެ މީހުންނަށް ސިނގިރޭޓު މަނާކުރުމަކީ ވެސް ރައީސްގެ ހިޔާލެއް އުމުރުން 25 އަހަރުގެ މީހުންނަށް ސިނގިރޭޓު މަނާކުރުމަކީ ވެސް ރައީސްގެ ހިޔާލެއް

ޒުވާން ޖީލު ދުންފަތުގެ އިސްތިއުމާލު ކުރުމާ ދުރު ކުރުވަން ގާނޫނަށް ބަދަލު ގެނެސްގެން މިހާރު 25 އަހަރު ވެފައި ތިބި މީހުންނަށް "ޖެނެރޭޝަން ބޭން" އެއް ތައާރަފް ކުރުމަކީ ވެސް ހިޔާލެއް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
'ރައްޔިތުންނާ އެކު" ޕޮޑްކާސްޓުގައި ރައީސް މުއިއްޒު ވިދާޅުވީ ދުންފަތުގެ އިސްތިއުމާލު ކުރުމާ ދުރު ކުރުވަން ޖެނެރޭޝަން ބޭން ގެންނަން ވިސްނަވާފައި އޮތީ 18 އަހަރާއި 25 އަހަރާއި ދެމެދުގެ ޒުވާނުންނަށް އަދި އޭގެ ފަހުން އުފަންވާ ކުދިން ސިނގިރޭޓު މަނާ ކުރާ ގޮތަށް ކަމަށެވެ.
"އަޅުގަނޑުމެން ހުށަހަޅަނީ ދެތިން ގޮތެއް. 2007 ވަނަ އަހަރުގެ ޖެނުއަރީ 1، 2004، ގެ ޖެނުއަރީ 1، 2000 ވަނަ އަހަރުގެ ޖެނުއަރީ 1، މި ތިން ގޮތް. މި ތިން ގޮތުން ކުރެ ކޮންމެ ވެސް އެއް ގޮތަކަށް އަޅުގަނޑުމެން ފަންނީ ލެވެލްގައި މަޝްވަރާކޮށްފައި މީގައި ހުރި ކަންތައްތައް ބަލާ ހަދާފައި ގާނޫނެއް އުފައްދައިގެން މަނާކުރާ ގޮތަށޭ ކުރިއަށް އޮތް ދުވަސްތަކުގައި އެނގޭތޯ،" ރައީސް ވިދާޅުވި އެވެ.
ރައީސް މުއިއްޒު ވިދާޅުވީ 30 އަހަރާއި 40 އަހަރާއި ދެމެދުގެ މީހުން ދުންފަތުގެ އިސްތިއުމާލު ކުރުމާ ދުރު ކުރުވަން މަސައްކަތް ކުރުމަށްވުރެ ޒުވާނުން ދުންފަތުގެ އިސްތިއުމާލު ކުރުމާ ދުރު ކުރުވަން ފަސޭހަވާނެ ކަމަށެވެ.
"ފަށައިގެން ވެސް މާގިނަ އަހަރުތަކެއް ނުވެ ތިބި ކުދިން، އެއިން ސަލާމަތް ކުރަން، ހުއްޓުވަން ފަސޭހަވާނެއޭ. އާދަ އޭގައި ހިފާފައި ހުރިވަރު ކުޑަވާނެތާ ކޮންމެ ގޮތެއް ވިޔަސް. 40، 50 އަހަރުގެ މީހަކު އެކަމުން ދުރުވާން އުނދަގޫވާނެ، 20 އަހަރު، 25 އަހަރުގެ ޒުވާނަކާ ބަލާއިރުގައި. އެހެން ނޫންތޯ،" ރައީސް ވިދާޅުވި އެވެ.
އެގޮތުން ކަމާ ބެހޭ ފަރާތްތަކާއި ޑޮކްޓަރުންގެ ލަފަޔާ އެކު ޖެނެރޭޝަން ބޭން ގެނައުމަށް ކުރިއަށް އޮތް ދުވަސްތަކުގައި ކެބިނެޓް ކަރުދާހެއް ދިރާސާކޮށްގެން ތައްޔާރު ކުރަން ހެލްތު މިނިސްޓްރީއާ ހަވާލުކޮށްފައިވާ ކަމަށް އެމަނިކުފާނު ވިދާޅުވި އެވެ.
ދުންފަތުގެ މައްސަލަ ދާއިމީ ގޮތެއްގައި ހައްލުކުރަން ހަތަރު އަހަރުގެ ޕްލޭނެއް ހަދަން ސަރުކާރުން މިދިޔަ އަހަރު ނިންމި އެވެ. އެ ޕްލޭން އަދި އިއުލާނެއް ނުކުރެ އެވެ.
ނަމަވެސް ސަރުކާރުން ހުށަހަޅައިގެން, ގާނޫނުތައް ބަދަލުކޮށް މިދިޔަ އަހަރުގެ ނޮވެމްބަރު 15 އިން ފެށިގެން ވޭޕް އެތެރެ ކުރުން މަނާކޮށް، ޖެހިގެން އައި ޑިސެމްބަރު 15 އިން ފެށިގެން ވޭޕް ބޭނުން ކުރުން ވަނީ މަނާކޮށްފަ އެވެ.
އޭގެ އިތުރުން، ގާނޫނު ބަދަލުކޮށް ކޮންމެ ސިނގިރޭޓަކުން ނަގާ އިމްޕޯޓު ޑިއުޓީ ވަނީ މިދިޔަ އަހަރުގެ ނޮވެމްބަރު މަހުން ފެށިގެން 8ރ. އަށް މަތިކޮށްފަ އެވެ. އަދި، ދުންފަތުގެ އެހެން ބާވަތްތަކުން ނަގާ ޑިއުޓީ 50 ޕަސެންޓު ވަނީ ބޮޑުކޮށްފަ އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ