ކުރީގެ ޓްރާންސްޕޯޓް މިނިސްޓަރު އަދި މިހާރު ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު، އިދިކޮޅު އެމްޑީޕީގެ ރިޔާސީ ޕްރައިމަރީގެ ޝައުގުވެރިކަން ފާޅުކުރައްވައިފި އެވެ.
ވީ ކިިހިނެއް؟ - އެ ކަމުގެ ޝައުގުވެރިކަން ހުންނެވި ކަމަށް ވިދާޅުވެ ޝަމްހީދު އެމްޑީޕީގެ ބައެއް އާންމު މެންބަރުންނާއި ގްރޫޕްތަކަށް ފޮނުވި މެސެޖެއް މިއަދު ސޯޝަލް މީޑިއާގައި ދައުރުވި އެވެ.
ތަފްސީލް - ދައުރުވަމުން ދަނީ ސައްހަ މެސެޖެއްކަން ޝަމްހީދު ކަށަވަރުކޮށްދެއްވި އެވެ. ޝަމްހީދު މިރޭ 'ދައުރު'އަށް ވިދާޅުވީ މި ވަގުތު ބަލަމުން ދަނީ އެ ކަމަށް އޭނާއަށް އޮތް ފުރުސަތާއި އެ ކަމުގައި އޭނާގެ އެންމެ ގާތް މީހުން ދެކެމުންދާ ގޮތެއް ކަމަށެވެ.
"އަދި މުޅިން ފައިނަލެއް ނޫން. އެކަމަކު ޝައުގުވެރިކަން އެބަ އޮތް. އަދި ސިޔާސީ ގޮތުން އިސް ބަޔަކާ އެކު ވެސް އެ މަޝްވަރާއެއް ނުކުރަން. ގާތް ރައްޓެހިންނާއި އާންމު ދިވެހިންނާއި، އެމްޑީޕީގެ އާންމުންނާ މި މަޝްވަރާ ކުރަނީ،" ޝަމްހީދު ވިދާޅުވި އެވެ.
އެނގުން މުހިންމު - ޝަމްހީދު ޓްރާންސްޕޯޓް މިނިސްޓަރުކަން ކުރެއްވީ ކުރީގެ ރައީސް މުހައްމަދު ވަހީދުގެ ވެރިކަމުގަ އެވެ. އޭރު އޭނާގެ ސިޔާސީ މަސައްކަތް ކުރެއްވީ ޖުމްހޫރީ ޕާޓީގަ އެވެ.
ގުޅުން ހުރި - އެމްޑީޕީގެ ރިޔާސީ ޕްރައިމަރީއަށް މިހާރުން ފެށިގެން ވެސް ވަރަށް ވާދަވެރިކަން ބޮޑެވެ. އެގޮތުން:
އެމްޑީޕީގެ ޗެއާޕާސަން ފައްޔާޒު އިސްމާއީލް ވަނީ ރިޔާސީ ޕްރައިމަރީގެ ޝައުގުވެރިކަން ފާޅުކުރައްވާފައި
އެމްޑީޕީގެ ރައީސް އަބްދުﷲ ޝާހިދު ރިޔާސީ ޓިކެޓަށް ޕާޓީގެ އެތެރޭގައި ގެންދަވަނީ ކެމްޕެއިން ކުރައްވަމުން
ކުރީގެ ރައީސް އިބްރާހީމް މުހައްމަދު ސޯލިހުގެ ސަޕޯޓަރުން އެމަނިކުފާނު ނުކުތުމަށް ކެމްޕެއިނެއް ވަނީ ފަށާފައި؛ ސޯލިހު ނުކުންނަވާނެ ކަމުގެ އަޑުތައް ގަދަ
ކުރީގެ ނައިބު ރައީސް ފައިސަލް ނަސީމާއި، މާލޭގެ މޭޔަރު އާދަމް އާޒިމާއި، މަޖިލީހުގެ ކުރީގެ ނައިބު ރައީސް އަހުމަދު ސަލީމް (ސައްލެ) ގެ ނަން ވެސް އިވެމުންދޭ