ކަރަންޓު ވިއުގާ އަޕްގްރޭޑް ކުރުމުގެ މަސައްކަތްތަކެއް ކުރިއަށްދާތީ މާލޭގެ އެކި ސަރަހައްދުތަކުން މިއަދު ކަރަންޓު ކެނޑިދާނެކަމަށް ސްޓެލްކޯއިން ބުނެފިއެވެ.
ސްޓްލްކޯއިން ބުނެފައިވަނީ ކަރަންޓުގެ ވިއުގަ އަޕްގްރޭޑް ކުރުމުގެ މަސައްކަތަށް ހެންވޭރުގެ ބޮޑުފުންގަނޑުމަގާއި، ހިތިގަސްމަގު، މޫންލައިޓް ހިނގުން، ބުރެވިމަގު، ވައިޖެހޭ މަގު، ހީނާގޯޅި، ލަންސިމޫ ގޯޅި، ދުބުގަސް މަގު އަދި މަޖީދީ މަގު ހިމެނޭ ސަރަހައްދުން ކަރަންޓު ކެނޑުމަކީ އެކަށީގެންވާ ކަމެއްކަމަށެވެ. އެ ސަރަހައްދުން ކަރަންޓުގެ ހިދުމަތް މެދުކެނޑޭނީ މެންދުރު 13:30 އިން 14:45 އަށް ކަމަށްވެސް ސްޓެލްކޯއިން މައުލޫމާތުދެއެވެ.
މީގެއިތުރުން މާފަންނާއި، މައްޗަންގޮޅީގެ ކެނެރީ މަގާއި، ސައްޔިދުކިލެގެފާނު މަގު އަދި ބުލްބުލްގޯޅި ހިމެނޭ ސަރަހައްދުން ވެސް ކަރަންޓު ކެނޑިދާނެ ކަމަށް ސްޓެލްކޯއިން ބުނެފައިވެއެވެ. އެ ސަރަހައްދުން ކަރަންޓުގެ ހިދުމަތް މެދުކެނޑޭނެ ކަމަށް ލަފާކޮށްފައިވަނީ މެންދުރު 14:00 އިން 16:00 އަށެވެ.
ސްޓެލްކޯއިން ވަނީ ކަރަންޓުގެ ހިދުމަތް މެދުކެނޑިދާނެތީ ދިމާވެދާނެ ދަތިތަކަށް މާފަށް އެދިފައެވެ.
މިއަދު ހެނދުނުވެސް މާލެއާއި ހުޅުމާލޭގެ އެކި ސަރަހައްދުތަކުގައި ކަރަންޓު ވިއުގަ އަޕްގްރޭޑްކުރުމުގެ މަސައްކަތް ސްޓެލްކޯއިން ވަނީ ކޮށްފައެވެ.