މެކްސިކޯގެ ހަލީސްކޯ ނިއު ޖެނެރޭޝަން ކާޓެލްގެ ލީޑަރު، ނެމެސިއޯ އޮސެގުއެރާ ސާވަންޓެސް (އެލް މެންޗޯ) ގެ ހަށިގަނޑު، ގުއަޑަލަހާރާ ކައިރީގައި އޮންނަ ޒަޕޯޕަންގައި ވަޅުލައިފިއެވެ. ހޯމަ ދުވަހު ބޭއްވި މި ޖަނާޒާގައި އޭނާގެ ހަށިގަނޑު ވަޅުލާފައިވަނީ ރަނުން ފަަރުމާކޮށްފައިވާ ސަންދޯކެއްގައެވެ.
ކަމާބެހޭ ފަރާތްތަކުން އޭނާ ވަޅުލާފައިވާކަން ކަށަވަރުކޮށްދިން ނަމަވެސް، ސަލާމަތީ ސަބަބުތަކަށްޓަކައި އެކަމުގެ އިތުރު ތަފްސީލުތައް ހާމަކޮށްފައެއް ނުވެއެވެ. މި ޖަނާޒާގައި ގިނަ އަދަދެއްގެ ބަޔަކު ބައިވެރިވިއިރު، އެ ސަރަހައްދުގައި ބޭންޑާއި މިއުޒިކް ކުޅެ، ގިނަ އަދަދެއްގެ މާބޮނޑިތައް ވެސް ވަނީ އަތުރާފައެވެ. އޭގެ ތެރޭގައި އޭނާއަށް ނިސްބަތްކޮށް ކިޔާ އުޅޭ ނަމުގެ ރަމްޒެއްގެ ގޮތުން ކުކުޅު ހާލެއްގެ ސިފައިގައި ތައްޔާރުކޮށްފައިވާ މާބޮނޑިއެއްވެސް ހިމެނެއެވެ.
އެލް މެންޗޯ މަރާލާފައިވަނީ ޓަޕަލްޕާގައި ސިފައިން ހިންގި އޮޕަރޭޝަނެއްގައެވެ. އެސޯސިއޭޓެޑް ޕްރެސްއިން ރިޕޯޓްކުރާ ގޮތުގައި، އޭނާ މަރުވީ ލިބުނު ބަޑީގެ ހަމަލާތަކަށް ފަރުވާ ދިނުމަށް ހޮސްޕިޓަލަށް ގެންދިޔުމުގެ މަގުމަތީގައެވެ.
އޭނާގެ މަރާ ގުޅިގެން މެކްސިކޯގެ 20 ސްޓޭޓެއްގައި ބޮޑެތި ހަމަނުޖެހުންތަކެއް ހިނގައި، 70 އަށްވުރެ ގިނަ މީހުން ވަނީ މަރުވެފައެވެ. ކަމާބެހޭ އިދާރާތަކުން ހާމަކުރި ގޮތުގައި، ކާޓެލްގެ ލީޑަރުން ހޯދުމަށް ހިންގާ އޮޕަރޭޝަންތައް ހުއްޓުމެއް ނެތް ގޮތުގައި ކުރިއަށްދާނެއެވެ.