ރާޅުގަނޑު ސަރަހައްދުގައި ހަދާ ގައުމީ ސާފިން ސްޓޭޑިއަމް ބިނާކުރުމަށް ރޭވިފައި އޮތީ "ޕްރީ-ފެބްރިކޭޓެޑް" ސްޓްރަކްޗާއެއްގެ ގޮތުގައި ކަމަށްވީ ނަމަވެސް، މިހާރު އެ ނިންމުން ބަދަލުކޮށް ކޮންކްރީޓް އިމާރާތެއްގެ ގޮތުގައި ތަރައްޤީކުރަން ނިންމާފައިވާ ކަމަށް ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. މާލޭ ރާޅުގަނޑު ސަރަހައްދުގައި ގާއިމުކުރާ ބައިނަލްއަގުވާމީ ފެންވަރުގެ ސާފިން ސްޓޭޑިއަމްގެ މަސައްކަތް ފެށުން ލަސްވީ މިފަދަ މުހިންމު ބަދަލުތަކެއް އިމާރާތުގެ ފަރުމާއަށް ގެނައުމަށްޓަކައި ކަމަށް ވަޒީރު ފާހަގަކުރެއްވިއެވެ. މި ބަދަލު ގެނައުމަށް ނިންމީ އެ ސަރަހައްދަކީ ލޮނުގެ އަސަރު ބޮޑު ތަނަކަށް ވުމުން، އިމާރާތުގެ ދެމެހެއްޓެނިވިކަން އިތުރުކޮށް، މަރާމާތަށް ހިނގާނެ ބޮޑު ހަރަދުން ސަލާމަތްވުމަށްޓަކައި ޓެކްނިކަލް ބޭފުޅުންގެ ލަފާގެ މަތިންނެވެ. މި އިސްލާހުތަކާއެކު ސްޓޭޑިއަމްގެ ބޮޑުމިނަށްވެސް ވަނީ ބަދަލުތަކެއް ގެނެސްފައެވެ. އެގޮތުން، ސާފިން އެސޯސިއޭޝަނާއި ބޮޑީ ބޯޑިން އެސޯސިއޭޝަނާ މަޝްވަރާކުރުމަށްފަހު، ކުރިން ކަނޑައެޅި ސައިޒަށްވުރެ 50 ފޫޓު އިތުރަށް ބޮޑުކޮށް މިހާރު ވަނީ ކުރެހުންތައް ފައިނަލްކޮށްފައެވެ. ވަޒީރު ވިދާޅުވި ގޮތުގައި، ޗައިނާގެ ރޯޓައިމް އިންޖީނިއަރިން އެންޑް ޓެކްނޮލޮޖީ ކޯޕަރޭޝަނާ ހަވާލުކޮށްގެން ކުރިއަށްގެންދާ މި މަޝްރޫއުގެ ކުރެހުންތައް މިހާރު އެއްކޮށް ނިމިފައިވާތީ، މި މަސްތެރޭގައި އަމަލީ މަސައްކަތް ފެށިގެންދާނެއެވެ. އަދި މަސައްކަތް ފެށުން ކުޑަކޮށް ލަސްވި ނަމަވެސް، މަޝްރޫއު ނިންމުމަށް ކަނޑައެޅިފައިވާ ތާރީޚަށް އެއްވެސް ބަދަލެއް ނާންނާނެ ކަމުގެ ޔަގީންކަންވެސް ވަޒީރު ވަނީ ދެއްވާފައެވެ. ޒަމާނީ ވަސީލަތްތަކާއެކު ތަރައްޤީކުރާ މި ސްޓޭޑިއަމްގައި ކުޅިބަލާ މީހުންނަށް ހާއްސަ ސަރަހައްދަކާއި، މީޑިއާ ސެންޓަރާއި، ކޮމެންޓަރީ ބޮކްސްގެ އިތުރުން ޖިމް އަދި ކޮންފަރަންސް ރޫމް ފަދަ ވަސީލަތްތައް ހިމެނޭނެއެވެ. މި މަސައްކަތަކީ ރާއްޖޭގައި ބައިނަލްއަގުވާމީ ސާފިން މުބާރާތްތައް ބޭއްވުމަށް ބޭނުންވާ ފަންނީ ފެންވަރު އިތުރުކުރުމަށް އެޅޭ މުހިންމު ފިޔަވަޅެކެވެ. މިދިޔަ ނޮވެމްބަރު މަހުން ފެށިގެން އެ ސަރަހައްދުގައި ހުރި ބްރިޖް ވިއު ޕްލެޓްފޯމް ރޫޅާލުމުގެ މަސައްކަތް ވަނީ ކުރިއަށްގެންގޮސްފައެވެ.