އެހެންވީމާ ބައެއް ރިވާއަތްތަކުގައި އާދޭ، އަބޫ ހުރައިރާ ރަޟިޔަﷲ ޢަންހުގެ އަރިހުން ރިވާވެގެންވާ ރިވާޔަތެއްގައި ރަސޫލާ ޞައްލަﷲ ޢަލައިހި ވަސައްލަމް ސުވަރުގޭގެ އަހުލުވެރިންނާއި ބެހޭގޮތުން ޙަދީޘް ކުރެއްވިއެވެ. (އަރަބި) " އެބައިމީހުންގެ ތެރެއިން ކޮންމެ މީހަކު، މާނައަކީ ސުވަރުގެ ވަދެވޭ ކޮންމެ މީހަކާ ދެ އަންބާ ކައިވެނި ކޮށްދެވޭނެއެވެ. މާނައަކީ ދެ ހޫރަލް ޢީނުންނާ ކައިވެނި ކޮށްދެވޭނެއެވެ." (އަރަބި) "އެކަނބުލޭގެ ރީތިކަމާއި ނޫރުގެ ގަދަކަމުން އެކަނބުލޭގެ ފައިގެ ކަށިމަތީގެ ކަށިގަނޑުގެ މަދުގެ އަލިކަމާއި އުޖާލާކަން ފާޅުވެ ފާޅުވެ ހުންނާނެއެވެ." އެއީ ކަށީގެ އެތެރޭގައިވާ މަދު، އެ މަދު ފޮރުވިފައިވަނީ ކަށިން، އެ ކަށީގެ ބޭރުގައި ވަނީ މަސް، އެމަހުގެ ބޭރުގައިވަނީ ހަން އަދި ފަރުދާވެ ނިވާވެގެންވާ ހާލުގައިވެސް އެބޭކަނބަލުންގެ ކިބައިގައިވާ ނޫރުގެ ގަދަކަމުން ކަށީގެ މަދުގެ އަލިކަމާއި އުޖާލާކަން ބޭރަށް ފާޅުވެ ފާޅުވެ ފެންނަން ހުންނާނެތެވެ. ކޮންފަދަ އަޖައިބު ޚަލްޤުކުރެއްވުމެއް. ކޮންމެގޮތެއްގައި ވިޔަސް އަޅުގަނޑުމެންނަށް މިއަދު ވިސްނައިގަތުމަށްވެސް އުނދަގޫ، މީހެއްގެ ރީތިކަމާއި ފުރިހަމަ ކަމުން، ޓްރާންސްޕޭރަންޓް ކަމުން، އަލިކަމާއި އުޖާލާކަމުން ކަށިމަތީގެ ކަށިގަނޑުގެ އެތެރޭގައިވާ މަދު، އެމަދުގެ އަލިކަން ބޭރަށް ފާޅުވެ ފާޅުވެ ހުންނާނެ ގޮތުގައި ޚަލްޤުތަކެއް ޚަލްޤު ކުރައްވާފައިވުން. އެހެންވެ ޙަދިޘް ކުރައްވާފައިމިވަނީ (އަރަބި) " ރިވެތިކަމާއި އަލިކަމާއި އުޖާލާކަމުގެ ސަބަބުން މަސްގަނޑުގެ އެތެރެއިން ކަށިމަތީގެ ކަށީގެ މަދުގެ އަލިކަން ފާޅުވެ ފާޅުވެ ހުންނާނެތެވެ."  
ދެން މި މަޢުޟޫގަ ލޮބުވެތި އަޚުންނޭ ވަރަށް ގިނަ ރިވާއަތްތައް ވަރަށް ގިނަ ވާހަކަތައް ހުރި. އެހެންނަމަވެސް އެ ހުރިހާ ވާހަކަތަކަކީ މުޅިން ސައްޚަ ވާހަކަތަކެއް ނޫން. އަޅިގަނޑުމެންނަކީ ކީރިތި ޤުރުއާނުގައި ނުވަތަ ރަސޫލުﷲ ޞައްލަﷲ ޢަލައިހި ވަސައްލަމަގެ އަރިހުން ސައްޚަ ރިވާއަތްތަކުގައި އައިސްފައިވާ ވާހަކަތައް ފުދޭ ޙަޤީގަތުގައި މި މަޢުލޫގައި އެއްޗެއް ދެނެގަތުމަށްޓަކާ.  
ދެންއޮތީ އެކަނަބަލުންގެ ލޯތަކުގެ ފުރިހަމަކަމާއި ރިވެތިކަން. އެކަމުގެ މައްޗަށް ކޮންމެސް ވަރަކަށް އަޅުގަނޑު ވާހަކަ ދައްކާލައިފައިވާނެ. ތަނަވަސް ލޯތަކެއްގެ ވެރި އަދި ލޯތަކުގެ ރީތިކަން އެއީ ހުދު ކަޅީގެ ހުދުކަން ނުހަނު ގަދަވެގެންވާ، ކަޅު ކަޅީގެ ކަޅުކަން ނުހަނު ގަދަވެގެންވާ ބޭކަނބަލުން ތަކެކެވެ. (އަރަބި) އަޅުގަނޑު ކުރިން ދަންނަވާލިން މި އާޔަތް. ސޮއްފާ ސޫރަތުގެ 43 ވަނަ އާޔަތް. މި އާޔަތުގައި މިވާ (އަރަބި) ގެ މާނައަކީ އަޅުގަނޑު ކުރިން ދެންނެވިން "ޙައްދު މިނެއް ކަނޑައެޅިފައިވާ ނަޒަރުތަކެއްގެ ވެރި ބޭކަނބަލުންތަކެކެވެ." ތަފްޞީރު ޢިލްމުވެރިން ވިދާޅުވާ ގޮތުގައި މިތަނުގަ މުރާދަކީ އެކަނބަލުންނަކީ އެކަނބަލުންގެ ފިރިންނަށް ނޫން އެހެން އެއްވެސް ބަޔަކަށް ބަލާނެ ބައެއް ނޫން. އެކަނބަލުންގެ ނަޒަރެއް ނުހުއްޓޭނެ އެކަނބަލުންނަށް ޚާއްސަ ކުރެވިފައިވާ ފިރިންނަށް މެނުވީ. އަދި ސުވަރުގޭގައި އެކަނބަލުންގެ ފިރިންގެ ނަޒަރުވެސް އެކަނބަލުންނާ ދިމާއަށް ނޫންތާކަށް ނުދާނެ.
 
- ޝައިޚް ޢަބްދުއްސަލާމް ދާވޫދުގެ ދަރުސަކުން