ވެރިރަށް މާލެގެ މަގުތަކުގައި ފެންބޮޑުވެފައިވާތީ, ފެން ހިނދައި ނިމެންދެން މަގުތަކުގައި ބަރު އުޅަނދު ނުދުއްވުމަށް ފުލުހުން އިލްތިމާސްކޮށްފި އެވެ.އެ އިދާރާއިން ނެރުނު އެލާޓުގައި ބުނީ މަގުތަކުގައި ފެން ބޮޑުވެ، ބައެއް ގޭގެއަށް ފެން ވަނުމުގެ ހާދިސާތައް ހިނގަމުންދާ ކަމަށެވެ. އެހެންވެ، ފެންގަނޑު ހިނދި، އާއްމު ހާލަތަށް ބަދަލުވަންދެން ބަރު އުޅަނދު ނުދުއްވަން ވަނީ އެދިފަ އެވެ.ކޮންމެހެން ބޭނުން ޖެހިގެން ނޫން ގޮތަކަށް ހަތަރު ފުރޮޅުލީ އުޅަނދު ނުދުއްވަން ވެސް ފުލުހުން އެދެ އެވެ. މިފަދަ ކަންކަމުގައި ރައްޔިތުންގެ ފަރާތުން ލިބޭ އެއްބާރުލުމަށް ފުލުހުން ވަނީ ޝުކުރު އަދާކޮށްފަ އެވެ.މާލެއަށް ދަނީ ރެކޯޑު މިންވަރަކަށް ވާރޭ ވެހެމުންނެވެ. އެއް ގަޑިއިރު ތެރޭގައި މާލެ ސަރަހައްދަށް ވަނީ 60 މިލިލީޓަރުގެ ވާރޭ ވެހިފަ އެވެ. އަދި 24 ގަޑިއިރު ތެރޭގައި 140 މިލިލީޓަރުގެ ވާރޭ ވަނީ ވެހިފަ އެވެ. އަދި ކުރިއަށް އޮތް ގަޑިއިރުތަކުގައި ވެސް ވާރޭ ވެހޭނެ ކަމަށް މެޓު އޮފީހުން ބުނެ އެވެ."މިދިޔަ 24 ގަޑިއިރަށް ބެލި ނަމަވެސް މާލޭ ސަރަހައްދަށް 140 މިލިލީޓަރުގެ ވާރޭ ވެހިއްޖެ،" މެޓު އޮފީހުގެ ހުސެއިން ވަހީދު ޕީއެސްއެމްއަށް ދެއްވި އިންޓަވިއުއެއްގައި ވިދާޅުވި އެވެ. "މިވަގުތު ވަރަށް ބޯކޮށް ވާރޭ ވެހޭ އެބަ، ކުރިއަށް އޮތް ފަސް، ހަ ގަޑިއިރު ވެސް މިވަރަށް ވާރޭ ވެހެމުންދާނެ."މިއަދު މެންދުރުފަހުން ފެށިގެން ވެހެމުންދާ ވާރޭގެ ސަބަބުން މަގުތަކުގައި ފެންބޮޑުވުމުގެ އިތުރުން ގޭގެއަށް ވެސް ދަނީ ފެން ވަންނަމުންނެވެ. ސަލާމަތީ ބާރުތަކުން ފެން ހިއްކުމުގެ މަސައްކަތް ކުރަމުންދާއިރު، ފެން ވަންނަމުންދާ ގެތަކުގައި ވެލިބަސްތާ ފަދަ އެއްޗެހި ޖެހުމުގެ މަސައްކަތް މާލޭ ސިޓީ ކައުންސިލްގެ މުވައްޒަފުން އަންނަނީ ކުރަމުންނެވެ.ރާއްޖެއަށް ކުރަމުންދާ ވިއްސާރައާ ގުޅިގެން ބ. އަތޮޅުން ތ. އަތޮޅާއި ދެމެދުގެ ސަރަހައްދަށް މިރޭ 11 ގެ ނިޔަލަށް ވަނީ އޮރެންޖް އެލާޓް ނެރެފަ އެވެ.މެޓް އޮފީހުން ބުނެފައިވަނީ މިވަގުތުގައި އެލާޓް ނެރެފައިވާ ސަރަހައްދަށް ގުގުރުމާއެކު ބޯކޮށް ވާރޭވެހި ފެން ބޮޑުވާނެ ކަމަށް ލަފާކުރެވޭ ކަމަށެވެ.