މިއަހަރު ވެގެންދާނީ ގެދޮރުގެ މައްސަލަ ހައްލުކުރުމަށް އަތޮޅުތެރޭގެ ރަށްތަކުގައި އެންމެގިނަ ހައުސިން މަޝްރޫޢުތައް ކުރިއަށްގެންދާ އަހަރަށްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ކ.އަތޮޅު ގުޅިއަށް ވަޑައިގެން މިއަދު އެރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ, ފެށިގެން މިދާ އަހަރު ވެގެންދާނީ ބޯހިޔާވަހިކަމުގެ އަހަރުކަމަށާއި، ބަޖެޓްގައި ކުރުމަށް ވައުދުވެފައި ހުރި ބޯހިޔާވަހިކަމުގެ މަޝްރޫޢުތައް އަތޮޅޫތެރޭގެ ރަށްރަށުގައި މިމަހުގެ ތެރޭގައި ފެށިގެންދާނޭކަމަށެވެ. ރައީސް ވިދާޅުވީ ކެމްޕެއިންތެރޭގައި ވައުދުވެފައިވާ ބޯހިޔާޗަހިކަމުގެ މަޝްރޫޢުތައް ހިންގުމަށް ކޮންޓްރެކްޓަރުން ހޯދުމުގެ މަސައްކަތް މިހިނގާ ޖެނުއަރީމަހުގެ ތެރޭގައި އިއުލާނުކުރެވިގެންދާނޭ ކަމަށެވެ. އެގޮތުން މިއަހަރު ވެގެންދާނީ ގެދޮރުގެ މައްސަލަ ހައްލުކުރުމަށް އަތޮޅުތެރޭގެ ރަށްތަކުގައި އެންމެ ގިނައިން ހައުސިން މަޝްރޫޢުތައް ކުރިއަށްގެންދާނޭ އަހަރަށްކަމަށް ރައީސް ވިދާޅުވިއެވެ.
މީގެ އިތުރުން ރައީސް ޑރ.މުއިއްޒު ވިދާޅުވީ، މާލެ ކައިރީ ކުރިއަށްގެންދިއުމަށް ހަމަޖެހިފައިވާ ރަސްމާލެ މަޝްރޫޢުވެގެންދާނީ، އެއް ސަރަހައްދަކުން ބޯހިޔާވަހިކަމުގެ މައްސަލަތަކަށް ހައްލު ލިބިގެންދާނޭ އަހަރުކަމަށެވެ. ރައީސް ވިދާޅުވީ ރަސްމާލެ ސަރަހައްދު ވެގެންދާނީ އެއް ފަސްގަނޑެއްގައި އެންމެގިނަ މީހުން ދިރިއުޅޭނެ މަޝްރޫޢުއަށްކަމަށާއި، އަމަލީ ގޮތުން އެ މަޝްރުޢުގެ ބިންހިއްކުމުގެ މަސައްކަތް މިހާރު ކުރިއަށްދާއިރު، އިތުރު ޑްރެޖަރުތައް ގެނެސްގެން ރަސްމާލެ މަޝްރޫޢުގެ މަސައްކަތް އަވަސްކުރަމުން އަންނަ ކަމަށެވެ.
Advertisement
މިކަމަކީ އަޅުގަނޑުމެން ވަރަށް ޔަގީންކަމާއެކީގައި ދެކޭކަމެއް. މިއީ މާލެ ސަރަހައްދުގެ އިތުރުން މުޅި ރާއްޖޭގެ އެންމެނަށް ފައިދާކުރާނެ މަޝްރޫއަކަށް ވެގެންދާނެ
ރައީސް ޑރ.މުއިއްޒު ވިދާޅުވިއެވެ
ރައީސް ވިދާޅުވީ މިދިޔަ އަހަރުގެ ތެރޭގައި ތަފާތު އެކި ސަބަބުތައް މެދުވެރިވެގެން ރަސްމާލެ މަޝްރޫޢުގެ މަސައްކަތް އެންމެ އެދެވޭގޮތަށް ކުރިއަށް ގޮސްފައިނުވާކަމަށެވެ. އެހެން އެވީ ވާރުތަވި އިގްތިސާދީ މައްސަލަތަކުގެ ތެރެއިން ކަންކަން ހައްލުކުރަމުންދިޔައިރު ކުރިމަތިވި ގޮންޖެހުންތަކުގެ ސަބަބުންކަމަށް ރައީސް ފާހަގަކުރެއްވިއެވެ.
ރައީސް ވިދާޅުވީ އޭރު ގޮންޖެހުންތައް ކުރިމަތިވި ނަމަވެސް މިހާރު އެކަމުން އަރައިގަނެ، މަޝްރޫޢުތަކުގެ މަސައްކަތް ފެށުމަށް ތައްޔާރުވަމުންދާކަމަށެވެ. ރައީސް ވިދާޅުވީ ރަސްމާލެ މަޝްރޫޢު ވެގެންދާނީ ބޯހިޔާވަހިކަމުގެ އިތުރުންވެސް، އިގްތިސާދީ އެކިއެކި ފަހި ފުރުސަތުތައް ތަނަވަސްވެގެންދާނެ މަޝްރޫޢުއަކަށް ކަމަށެވެ.