ހުރިހާ މުސްލިމުންގެވެސް ބޭނުމަކީ ސުވަރުގެ ލިބުމެވެ. ދުނިޔޭގެ ޙަޔާތް ހޭދަމިކުރެވެނީ އެކަމަސް ކުރާ ދަތުރުގެ މަތީގައެވެ. ވީމާ ގަދައަޅައި މަސައްކަތްކުރަންވީ ކާމިޔާބުކަމާއިއެކު އެދަތުރު ނިންމައިލުމަށެވެ.
ވީމާ ފުރަތަމަކަމަކަށް ވިސްނައިލާށެވެ! ދުނިޔޭގައި މަޝްހޫރުކަން ބޮޑުވެގެންދާ މީހުންގެ މަޝްހޫރުކަން ކުޑަދުވަސްކޮޅެއްގެ ތެރޭގައި ނިމިގެންދެއެވެ. ތަނަވަސްކަމުން މަޝްހޫރުވާ މީހުން ފަޤީރުވެއެވެ. ސިޔާސީ ގޮތުން މަތީމަޤާމުތަކަށް ދެވޭ މީހުންގެ މަޤާމުތައް ގެއްލެއެވެ. ދުނިޔޭގެ އެންމެ މޮޅު ކުޅުންތެރިއަކަށް މިއަހަރުހެވޭ މީހުން އަންނަ އަހަރު ލިސްޓުގައި ނުވެސް ހިމެނިދާނެއެވެ.
ވީމާ މިކަންކަމުން އެނގިގެން މިދަނީ ދުނިޔޭގައި ލިބޭ މަޝްހޫރުކަން ދުނިޔޭގައިވެސް ގެއްލިގެންދާކަމެވެ. އެހެންކަމާއިއެކުވެސް މަޝްހޫރު މހުން ނަމޫނާއަކަށް ބަލައި އެމީހުންނަށް ތާއީދުކޮށް އެމީހުން އުޅޭ ގޮތަށް އުޅެން ގިނަ ބައަކު މަސައްކަތްކުރެއެވެ. އެއީ އެމީހާއަށް ގިނަ ބައަކު ތާއީދުކުރާތީ އެމީހާއަށް ތާއީދުކުރުމުން ތިމާއަށްވެސް މަޝްހޫރުކަން ލިބި މަޤްބޫލުކަން އިތުރުވެގެންދާނެ ކަމަށް ބަލައިގެންނެވެ. ވީމާ ކަމުގެ ޙަޤީޤަތް އޮތް ގޮތާއިމެދު ވިސްނައިލަމާހެއްޔެވެ؟
މިގޮތުން ލަވަކިޔާ މީހުންނާ ނަށާ މީހުންނާއި ސިޔާސީ މީޙުންނާއި ފިލްމުކުޅޭ މީޙުން ކޮޕީކުރެއެވެ. އެމީހުން ތިބޭ ގޮތަށް ތިބެން މަސައްކަތްކުރެއެވެ. އެމީހުން ބާއްވާ ޝޯތަކަށާއި ބައްދަލުވުންތަކަށް ގޮސް އުޅުމަކީ ކޮންމެހެން ކުރަންޖެހޭ ކަންކަމުގައިވެސް ޤަބޫލުކުރެއެވެ. މިފަދަ މީހުންނަށް ހީވެފައި އޮންނަނީ ކާމިޔާބު މީހަކަށް ވެވޭނީ ދުނިޔެ ނުވަތަ މުޖުތަމައުގެ ގިނަ ބައަކު ބުނާގޮތަށް އުޅޭ މީހުންނަށް ކަމަށެވެ. ނަމަވެސް އެއީ ވަރަށް ނުބައި ވިސްނުމެކެވެ. ސަލާމަތްކަން ލިބޭނީ ﷲ ތަޢާލާ އަންގަވާފައިވާ ގޮތަށް އުޅުމުންނެވެ.
މުޖުތަމައުގެ ގިނަ ބައަކު ބޭނުންވާ ގޮތަށް އުޅެގެން މުޖުތަމައުގެ ތާއީދު ހޯދިދާނެއެވެ. ނަމަވެސް އެ މުޖުތަމައުއަކީ ﷲ ތަޢާލާއަށް ފުރިހަމައަށް ކިޔަމަންތެރިކަން އަދާކުރާ މުޖުތަމައުއެއް ނޫން ނަމަ އެ ތާއީދަކީ ހަޤީޤަތުގައި އެއްވެސް ފައިދާއެއް ހުރި އެއްޗެއް ނޫނެވެ. އަދި ކީއްހެއްޔެވެ؟ ލިބޭނީ ގެއްލުމާއި ހަލާކެވެ. މީހާ ވެއްޓިގެންދާނީ އަބާއްޖަވެރިކަމުގެ ތެރެއަށެވެ. އެފަދަ މީހުންނަށް ދުނިޔެއާއި އާޚީރަތްވެސް ދާނީ ގެއްލިގެންނެވެ.
ﷲ ތައާލާ ހުއްދަ ކުރައްވަވާފައ ނުވާ ކަންކަން ކުރަމުން ގޮސް ކިތަންމެ މަޝްހޫރުވި ނަމަވެސް ދުނިޔޭގެ އެންމެންގެ ތާއީދު ހޯދި ނަމަވެސް އެކަމުން އާޚިރަތް ދުވަހު ކުރާނީ ކޮންފައިދާއެއް ހެއްޔެވެ؟ ﷲ ތަޢާލާ ބާވައިލެއްވެވި ޙުކުމްފުޅުތަކަށް ޢަމަލުނުކުރާ މީހާ ކިތަންމެ ވަރުގަދަ ލީޑަރެއްގެ ގޮތުގައި ދުނިޔެއަށް މަޝްހޫރުވި ނަމަވެސް ޤިޔާމަތް ދުވަހު އެމީހަކީ ގެއްލެނިވެގެންވާ މީހެއްކަން ކީރިތި ޤުރްއާނުން އެބައޮތެވެ.
ރައްޔިތުންގެ ކިތަންމެ ބޮޑު ތާއީދެއް އޮތް ނަމަވެސް އެއީ ސުވަރުގެ ވަދެވޭ ސަބަބެއް ނޫނެވެ. ސުވަރުގެ ވަދެވޭނީ ހަމައެކަނި ﷲ ތަޢާލާގެ ރުއްސެވުން ލިބިގެންނެވެ. އެހެންކަމުން ރައްޔިތުންގެ ކިތަންމެ ބޮޑު ތާއީދެއް އޮތް ނަމަވެސް އެމީހަކީ ﷲ ތަޢާލާއަށް ކިޔަމަންތެރިއަކު ކަމުގައި ނުވަނީނަމަ އެމީހެއްގެ ފަހަތުގައި އަބަދު އެލިގަނެގެން އޮތުމަކީވެސް ސުވަރުގެ ވަދެވޭނެ ސަބަބެއް ނޫނެވެ.
ސުވަރުގެ އެދޭނަމަ ކުރިއަށްދާންވީ އެމީހަކަށް ތާއީދުކުރާ ރައްޔިތުންގެ އަދަދުބަލައި އެންމެ ގިނަ މީހުން ތާއީދުކުރާ މީހެއްގެ ފަހަތަކުން ނޫނެވެ. ކުރިއަށްދާންވީ އެންމެ ތަޤްވާވެރި މީހާ ބަލައި އެމީހެއްގެ ފަހަތުންނެވެ. ކުރަންވީ ރައްޔިތުންގެ ތާއީދު އެންމެ ބޮޑު މީހާ ބުނާ ކަންކަމެއްވެސް ނޫނެވެ. ކުރަންވީ އެކަމެއް ކުރުމަށް ﷲ ތަޢާލާ އަންގްވާފައިވާ ކަންކަމެވެ. އެގޮތުގައި ކަންކަން ކުރެވޭނީ ތަޤްވާވެރިންނާއިއެކު އުޅެ އެބައެއްގެ ފަހަތުން ކުރިއަށް ދިއުމުންނެވެ.
ގަދައަޅައި މަސައްކަތްކުރަންވީ ތަޤްވާވެރިންނާއިއެކު މަހްޝަރު ކުރައްވަވައި ދެއްވަވާތޯއެވެ! އެންމެ ތާއީދު ބޮޑު މީހާ އާއިއެކު މަޙްޝަރު ކުރައްވަވައި ދެއްވަވާތޯއެއް ނޫނެވެ. ނަމަވެސް ހިތާމައަކީ ގިނަ ބައަކަށް މިއަދު މިކަންކަން ވަރަށް ބޮޑަށް އޮޅިފައިވާތީއެވެ. ތަޤްވާވެރި ހެޔޮލަފާ މީހުންނަށްވުރެ މަޝްހޫރު، ތާއީދު ބޮޑު މީހުންނަށް ލޯބިކުރެވޭ މިންވަރު އިތުރުވެފައިވާތީއެވެ!
--މުފްތީ މެންކުގެ ދަރުސަކުން