ކޯޓު އަމުރާއި ޚިލާފަށް ސަޕްލަޔަރުންގެ ފައިސާ ފިނޭންސް މިނިސްޓްރީއިން ދަނީ ހިފަހައްޓަމުން

ކޯޓު އަމުރާއި އާންމު ރައްޔިތެއް ޚިލާފު ވެއްޖެ ނަމަ، ލަނީ ޖަލަށެވެ. ނަމަވެސް ރައީސް މުއިއްޒުގެ ސަރުކާރުގެ ފިނޭންސް މިނިސްޓްރީއިން ކޯޓު އަމުރާއި ޚިލާފަށް ސަޕްލަޔަރުންނަށް ދޭން ހުންނަ ފައިސާ ހިފަހައްޓައި، ސަޕްލަޔަރުންނަށް ފައިސާ ނުދީ އެފައިސާ ދަނީ ބޭނުން ކުރަމުންނެވެ.
ސަރުކާރާއި، ސަރުކާރު ކުންފުނިތަކުން ޕްރޮޖެކްޓްތަކަށް ފައިސާ ނުލިބި، ސަޕްލަޔަރުންނާއި، ކޮންޓެކްޓަރުން އެފައިސާ ހޯދުމަށް ކޯޓަށް ގޮސް ކޯޓުން މައްސަލަ ނިންމައި، ފައިސާ ނަގައި ދިނުމުގެ އަމުރު ކޯޓުން ދިނުމުން، މި ސަރުކާރުގެ ފިނޭންސް މިނިސްޓަރ މޫސާ ޒަމީރު ކޯޓަށް ގޮންޖަހައި އެފައިސާ ނުދީ ދަނީ ހިފަހައްޓަމުންނެވެ.
މި ފައިސާ ބޭނުން ކުރަމުން ދަނީ ރައީސް މުއިއްޒު ބޭރަށް ސާޖިދާ ގޮވައިގެން ކުރާ ދަތުރު ތަކަށާއި، މި ސަރުކާރުގެ ސިޔާސީ މުއައްޒަފުންނަށް މުސާރަ ދިނުމަށެވެ.
މޫސާ ޒަމީރުގެ އަނބިންނާއި ދަރިން ތިބެނީ ކައިގެންނެވެ. ކޯޓުން ހުކުން ކޮށް، ފައިސާ ނަގާދޭ ކުންފުނި އެހާލަތަށް ދާއިރު އޮންނަނީ އެތައް ބަޔަކަށް ދަރާ ވިކި، އެ ކުންފުނީގައި މަސައްކަތް ކުރާ އެތައް މުއައްޒަފުންނަށް މުސާރަ ނުދެވި، އެ ކުންފުނީގެ ތިބިހާ ބަޔެއްގެ އާއިލާތައް ބިކަވެ، ހަދާނެ ގޮތް ހުސްވެފައެވެ.
ފައިސާ ދިނުމަށް ކޯޓުން ހުކުން އިއްވީމާ އިތުރަށް އެތައް އަހަރަކަށް ފައިސާ ނުދީ ދަންމާލައި ކުންފުނިތައް ބަނގުރޫޓު ކުރަމުންދަނީ، ރާވައިގެން ރައްޔިތުންނަށް އަނިޔާވެރި ވުމަށެވެ.
މި މަހުވެސް، ބަޖެޓް އަރަނި ވެފައި ވާކަމަށް ސަރުކާރުން އިއުލާނު ކޮށްފައި ވާއިރު، ފައިސާ ނުދެވެންވީ ސަބަބެއް ވެސް ނެތްކަން އެނގެއެވެ.
ކޯޓުން ނުލިބޭ އިންސާފު ހޯދަން ރައްޔިތުން މަގުމައްޗަށް ނުކުންނަން ޖެހޭ ހިސާބަށް ޤައުމުގެ ހާލަތު ވަނީ ގޮސްފައެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ