2008 ވަނަ އަހަރު ރާއްޖޭގައި ބޭއްވި ގިނަ ޕާޓީތައް ބައިވެރިވި ފުރަތަމަ ރިޔާސީ އިންތިހާބުގައި ގަބޫލުކުރަން ދަތި ވަރަށް ގިނަ ކަންތައްްތައް ހިނގާދިޔަ ކަމަށާ އެ އިންތިހާބުގެ ނަތީޖާ ގަބޫލުކުރެއްވީ ގައުމީ މަސްލަހަތު އިސްކުރެއްވުމަށް ކަމަށް ކުރީގެ ރައީސް މައުމޫން އަބުދުލްގައްޔޫމް ވިދާޅުވެއްޖެ އެވެ.
ރައީސް މައުމޫން މިހެން ވިދާޅުވީ ހުކުރު ދުވަހު ވީޓީވީން ގެނެސްދިން "ހަމީދުގެ މެހެމާންސަރާ" ޕްރޮގްރާމްގައި ވާހަކަފުޅު ދައްކަވަމުންނެވެ.
2008ގެ ރިޔާސީ އިންތިހާބުގެ ނަތީޖާއާއި ގުޅޭގޮތުން ތަފްސީލްކޮށް ފުރަތަމަ ފަހަރަށް ވާހަކަފުޅު ދައްކަވަމުން ރައީސް މައުމޫން ވިދާޅުވީ 2008ގެ އިންތިހާބުގައި ވޯޓް ލުމުގެ ތެރޭގައާއި ވޯޓް ގުނުމުގައި ގަބޫލުކުރައްވަން ދަތި ވަރަށް ގިނަ ކަންކަން ހިނގާދިޔަ ކަމަށެވެ. އެކަމާއި ގުޅިގެން އޭރު އެމަނިކުފާނުގެ ވަޒީރުންގެ ގޮތުގައި ތިއްބެވި ބޭފުޅުންނާއި، ކެމްޕޭންގައި އިސްކޮށް ހަރަކާތްތެރިވި ވަރަށް ގިނަ ބޭފުޅުން އިންތިހާބުގެ ނަތީޖާ ގަބޫލުނުކުރެއްވުމަށް އެމަނިކުފާނުގެ ކިބައިން އެދިވަޑައިގެންނެވި ކަމަށްވެސް ވިދާޅުވި އެވެ.
"ހަގީގަތުގައި އެ އިންތިހާބުގެ ތެރޭގައި ގަބޫލުކުރަން ވަރަށް ދަތި ކަންތައްތަކެއް ހިނގާދިޔަ. އިންތިހާބުގެ ތެރޭގައިވެސް އަދި ވޯޓް ގުނުމުގައިވެސް ކަންތައްތަކެއް ދިޔަ. ދެން އަޅުގަނޑަށް ހީވާގޮތުގައި އިންތިހާބުގެ ނަތީޖާ ގަބޫލުނުކުރުމަށް ކިތަންމެ ގިނަ ސަބަބުތަކެއްވެސް ހުރި. އެހެން ނަމަވެސް އަޅުގަނޑު ވިސްނެވީ ގައުމީ މަސްލަހަތަށް. ވަރަށް ގިނަ ބޭފުޅުން ވަޒީރުންނާއި ކެމްޕޭންގެ އިސް ބޭފުޅުން ވިދާޅުވި އިންތިހާބުގެ ނަތީޖާ ގަބޫލުނުކުރާށޭ. އަލުން އިންތިހާބު ބާއްވަން ނުވަތަ އަލުން ވޯޓް ގުނުމަށް އެދޭށޭ،" ރައީސް މައުމޫން ވިދާޅުވި އެވެ.