ދުންފަތް ކޮންޓްރޯލް ކުރުމުގެ އާ ގަވާއިދުގައިވާ ގޮތުގެ މަތީން ދުންފަތް ވިޔަފާރިކުރަން ބޭނުންވާ ފަރާތްތަކުން ހޯދަން ލާޒިމުވާ ލައިސެންސްތަކާއި އަލަށް އެތެރެކުރާ ދުންފަތުގެ ބާވަތްތައް ރަޖިސްޓްރީކުރުމަށް ބޭނުންވާ ފަރާތްތަކަށް އެ ފުރުސަތު އިއްޔެއިން ފެށިގެން ހުޅުވާލައިފި އެވެ.
ތަފްސީލް - ހެލްތު މިނިސްޓްރީން އިއްޔެ ނެރުނު އިއުލާނެއްގައިވާ ގޮތުން، ހަތަރު ބާވަތެއްގެ ލައިސެންސަށް އެދި ހުށަހަޅަން ވަނީ ހުޅުވާލައިފަ އެވެ. އެއިން ކޮންމެ ބާވަތަކަށް ކަނޑައަޅާފައިވާ ފީ ދެއްކުމުން ލައިސެންސް ދޫކުރަނީ ފަސް އަހަރުގެ މުއްދަތަކަށެވެ.
މިނިސްޓްރީން ދޫކުރާ ހަތަރު ބާވަތުގެ ލައިސެންސަކީ:
ދުންފަތުގެ ބާވަތްތައް ވަކިން ނުވަތަ ގަނޑުކޮށް ވިއްކުމުގެ ލައިސަންސް: 5،000ރ.
ދުންފަތުގެ ބާވަތްތައް އެތެރެކުރުމުގެ ލައިސަންސް: 10،000ރ.
ދުންފަތުގެ ބާވަތްތައް ރިއެކްސްޕޯޓުކުރުމުގެ ލައިސަންސް: 10،000ރ.
ދުންފަތުގެ އާ ބާވަތެއް ރަޖިސްޓްރީ ކުރުން: 10،000ރ.
ލައިސަންސް ދޫކުރާ މުއްދަތު ކަމަށްވާ ފަސް އަހަރު ހަމަވާ ތާރީހުގެ ދެ މަސްދުވަސް ނުވަތަ 60 ދުވަސް ކުރިން ލައިސެންސް އާ ކުރަން ހުށަހަޅަން ޖެހޭނެ ކަމަށް އިއުލާނުގައިވެ އެވެ.