'އަލް-އަބްރާރު ޕްރައިވެޓް ލިމިޓެޑް' ގްރޫޕުން 110 މީހަކު ޢުމްރާއަށް ގެންދަން އިންތިޒާމުކުރި ދަތުރު، ފަހު ވަގުތު ކެންސަލްކުރި މައްސަލައިގައި، އެ ކުންފުނީގެ ހުއްދަ ވަގުތީގޮތުން ހިފަހައްޓައިފިއެވެ. އިސްލާމިކް މިނިސްޓްރީން ނެރުނު ނޫސްބަޔާނެއްގައި ވަނީ، އަލް-އަބްރާރު ކުންފުނިން މިދިޔަ އަންގާރަ ދުވަހުން ފެށިގެން މިމަހުގެ 26ވަނަ ދުވަހުގެ ނިޔަލަށް ކުރުމަށް ހަމަޖައްސާފައިވާ ޢުމްރާ ދަތުރަށް ފުރުމަށް އެންމެ ފަހުގެ ތައްޔާރީތައް ޢުމްރާވެރިން ވަމުން ދަނިކޮށް، ދަތުރު ކެންސަލްކުރިކަމުގެ ޝަކުވާ މިނިސްޓްރީއަށް ލިބުމާ ގުޅިގެން ކަން ހިނގި ގޮތުގެ މައުލޫމާތު ސާފުކޮށްފައިވާ ކަމަށެވެ. މިހާތަނަށް ސާފުކުރި މައުލޫމާތުން، އަލް-އަބްރާރު ކުންފުނިން ޢުމްރާ ދަތުރު ކެންސަލްކުރީ މަގުބޫލު އެއްވެސް ސަބަބެއް ނެތި، ރާއްޖޭން މީހުން ޢުމްރާއަށް ގެންދިއުމަށް ކަނޑައަޅާފައިވާ އުސޫލާ ޚިލާފަށް ކަމަށް، މިނިސްޓްރީގެ ބަޔާނުގައިވެއެވެ. އެ ސަބަބަށްޓަކައި، އެ ކުންފުންޏަށް ދޫކުރި ހުއްދަ ވަގުތީގޮތުން ހިފަހައްޓަން ނިންމައި، އެކަން އެ ކުންފުންޏަށް އަންގާފައިވާ ކަމަށް، މިނިސްޓްރީން ބުންޏެވެ. އިސްލާމިކް މިނިސްޓްރީން ބުނީ، މި މައްސަލައިގައި އިތުރު މައުލޫމާތު ސާފުކޮށް، އުސޫލުގެ ތެރެއިން އަލް-އަބްރާރު ކުންފުންޏާ ދެކޮޅަށް ފިޔަވަޅު އަޅާނެ ކަމަށެވެ. މިނިސްޓްރީން ބުނީ، މި މައްސަލައާ ގުޅިގެން އެ ކުންފުނީގެ ތެރެއިން މިހާތަނަށް ޢުމްރާއަށް ނުފުރިތިބި ޢުމްރާވެރިންނަށް އެހީތެރިކަން ދެވޭނެ ގޮތްތަކަކީ ކޮބައިތޯ ބަލައި، އެހީތެރިކަން ދިނުމަށް މަސައްކަތްކުރަމުން އަންނަ ކަމަށެވެ. ޢުމްރާވެރިންގެ އަތުން ފައިސާ ނެގުމަށްފަހު، އަލް-އަބްރާރު ކުންފުނިން ފަހުވަގުތު ޢުމްރާ ދަތުރު ކެންސަލްކުރި މައްސަލަ ފުލުހުންވެސް އަންނަނީ ބަލަމުންނެވެ. https://sun.mv/218665 އެ މައްސަލައާ ގުޅޭ ގޮތުން 'ސަން' އާ ވާހަކަދެއްކި މީހަކު ބުނި ގޮތުގައި އެ ގްރޫޕާއެކު 110 މީހުން އުމްރާއަށް ފުރަން ހަމަޖެހިފައި އޮތީ އަންގާރަ ދުވަހުގެ ރެއެވެ. އެ ދަތުރަށް ކޮންމެ މީހަކު ގާތްގަނޑަކަށް 45،000 ރުފިޔާ ދައްކައިފައިވަނިކޮށް، ފުރުން ކުއްލިއަކަށް ކެންސަލްކުރީ ފުރަން އޮތް ދުވަހު ފަހު ވަގުތުގައި ކަމަށް އޭނާ ބުންޏެވެ. 'އަލް އަބްރާރު ޕްރައިވެޓް ލިމިޓެޑް' ގްރޫޕުން ދަތުރު އިންތިޒާމުކުރި ގޮތާ ގުޅޭ ގޮތުން މި ނޫހަށް މައުލޫމާތު ދިން މީހާ ބުނި ގޮތުގައި، އޭނާގެ އާއިލާގެ މީހުން އުމްރާއަށް ފުރާތީ އެ ކަންތައްތައް ހަމަޖައްސަން އޭނާ އިސްކޮށް އުޅުނެވެ. އެގޮތުން، އަންގާރަ ދުވަހުގެ ހެނދުނު 10:00 އާއި 11:00 އާ ދޭތެރޭ އެއާޕޯޓަށް ފޮށިތައް ގެންދިޔުމަށް އެދުނު ކަމަށާއި ފުރަންދާން ތިބި އެންމެން ހޯމަ ދުވަހުގެ ރޭ ފޮށިތަންމަތި ބަރުކޮށް ނިންމި ކަމަށް އެ މީހާ ކިޔައިދިނެވެ. ކަން އެހެން އޮއްވައި ކުއްލިއަކަށް ގުޅައި، އަންގާރަ ދުވަހުގެރޭ ފުރަން ދާއިރު ފޮށިތައް ގެންދަން އެދުނު ކަމަށް އޭނާ ބުންޏެވެ. https://sun.mv/218722 އެ ފަހުން ހަމަ އެ ދުވަހުގެ މެންދުރު ދޭއް ޖަހަނިކޮށް ގުޅައި، މީޓިންއެއް އޮތްކަން އަންގައި، ޢުމްރާއަށްދާ އެންމެން އެ މީޓިންއަށް ހާޒިރުވާން އެންގި ކަމަށް އޭނާ ބުންޏެވެ. ފުރުން ކެންސަލްކުރިކަން އެނގުނީ ވެސް އެ މީޓިންއަށް ދިޔުމުން ކަމަށް އެ މީހާ ބުންޏެވެ. މި މައްސަލައާ ގުޅިގެން އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ރޭ ވިދާޅުވީ، އެކި ސަބަބުތަކާ ހުރެ ޢުމްރާއަށް ނުފުރިފައި ތިބި ފަރާތްތަކަށް ފުރޭނެ ގޮތް ހޯދުމުގެ މަސައްކަތް، ގައުމީ އެއާލައިން މޯލްޑިވިއަނާއި، އިސްލާމިކް މިނިސްޓްރީއާއި، ޙައްޖު ކޯޕަރޭޝަން ގުޅިގެން ފަށާފައިވާ ކަމަށެވެ. އެގޮތުން ރޭގެ ނިޔަލަށް 150 މީހަކު އޭގެ ތެރެއިން ފުރަން ބޭނުންވެފައިވާކަން ފާހަގަވި ކަމަށް، ޝަހީމް ވިދާޅުވިއެވެ.