ޒަމާނީ ފެންވަރަށް މާލޭގެ ބޮޑުތަކުރުފާނު މަގުގައި ތާރުއަޅައި އެ މަގު ތަރައްގީކުރުމުގެ މަސައްކަތުގެ ދަށުން، ހެންވޭރު ފެރީ ޓާމިނަލުން ފެށިގެން ރަސްމީ ފާލަމާ ދެމެދުގެ ސަރަހައްދުގައި މަސައްކަތްކުރުމަށް ޓަކައި، ފެރީ ޓާމިނަލުން ފެށިގެން ރަސްމީ ފާލަމާ ހަމައަށް ބަންދުކޮށްފިއެވެ. ފެރީ ޓާމިނަލުން ފެށިގެން ރަސްމީ ފާލަމާ ހަމައަށް އޮތް ސަރަހައްދު ބަންދުކުރީ ރޭ ދަންވަރު 12:00 އިން ފެށިގެންނެވެ. އެ ސަރަހައްދުގައި މަސައްކަތް ފަށަން ހަމަޖެހިފައިވަނީ މާދަމާއެވެ. އެހެންވެ ފުލުހުން ވަނީ، މަސައްކަތް ނިމެންދެން، އެ ސަރަހައްދުގެ ޓްރެފިކް ފްލޯއަށް ބަދަލު ގެނެސްފައެވެ. އެކަން ހާމަކޮށް ފުލުހުން އާންމުކުރި މައުލޫމާތުގައިވާ ގޮތުން، ހެންވޭރު ފެރީ ޓާމިނަލުން ފެށިގެން ރަސްމީ ފާލަމާ ހަމައަށް މަގު ބަންދުވާނެއެވެ. އެހެންކަމުން ދެން ޖެހޭނީ ފެރީ ޓާމިނަލާވީ ސަރަހައްދުން ބޮޑުތަކުރުފާނުން މެހެލިގޯޅިއަށް ލަނބާލައި، އަމީރު އަހްމަދު މަގުން އިރުމައްޗަށް ދަތުރުކުރާށެވެ. https://x.com/PoliceMv/status/2035429437572006147 އާންމުގޮތެއްގައި އަމީރު އަހްމަދު މަގުގައި މަޖީދިއްޔާ ސްކޫލު އޮންނަ ސަރަހައްދުން ފެށިގެން ހުޅަނގަށް އޮންނަ ސަރަހައްދުގައި ދެކޮޅަށް ދަތުރުކުރެވެއެވެ. އެކަމަކު ޓްރެފިކް ފްލޯއަށް އައި ބަދަލާއެކު އެ ސަރަހައްދުގައި ދެން ދަތުރުކުރެވޭނީ އިރުމައްޗަށެވެ. އެއަށްފަހު ސޯސަން މަގަށް ލަނބާލައި، މެދުޒިޔާރަތްމަގާ ހަމައަށް އޮންނަ ސަރަހައްދުގައި ދަތުރުކުރެވޭނީ ދެކުނަށެވެ. ފުލުހުން ވަނީ، މަގު ހެދުމުގެ މަސައްކަތްކުރާ ސަރަހައްދުގައި ޕާކުކޮށްފައި ހުރި އުޅަނދުފަހަރު ނެގުމަށް އާންމުންގެ ކިބައިން އެދިފައެވެ. ހެންވޭރު ފެރީ ޓާމިނަލުން ފެށިގެން ރަސްމީ ފާލަމާ ހަމައަށް އޮންނަ ސަރަހައްދަކީ އާންމު ގޮތެއްގައި މާލެއިން އެއާޕޯޓަށް ދާ ފެރީތަކާއި، މާލެއާ ކައިރި ރަށްރަށަށް ދަތުރުކުރާ ފެރީތައް އަޅާފައި އޮންނަ ސަރަހައްދެވެ. އެ ސަރަހައްދުގައި އެމްއެންޑީއެފްގެ ކަނޑުއުޅަނދުފަހަރު ވެސް ހަރަކާތްތެރިވެއެވެ. މާލޭ ސިޓީ ކައުންސިލުން މިދިޔަ ހޯމަ ދުވަހު ވަނީ، ބޮޑުތަކުރުފާނު މަގު ތަރައްގީކުރުމުގެ މަސައްކަތަށް މަގު ބަންދުކުރާނެ ގޮތުގެ ތަފުސީލު އާންމުކޮށްފައެވެ. https://sun.mv/219260 އެގޮތުން، ހެންވޭރު ފެރީ ޓާމިނަލުން ފެށިގެން މަސްވެރިންގެ ޕާކާ ހަމައަށް ހިމެނޭ ސަރަހައްދު އަންނަ ހޮނިހިރު ދުވަހުން ފެށިގެން މަސައްކަތް ނިމި ހުޅުވެންދެން ބަންދުވާނެއެވެ. އަދި މަސްވެރިންގެ ޕާކު ހިމެނޭ ސަރަހައްދުން ފެށިގެން ފަސްވަނަ ފާލަމާ ހަމައަށް އޮންނަ ސަރަހައްދު މިމަހުގެ 30ވަނަ ދުވަހުން ފެށިގެން މަސައްކަތް ނިމެންދެން ބަންދުވާނެ ކަމަށާއި، ފަސްވަނަ ފާލަމުން ފެށިގެން އިއްޒުއްދީން ފާލަމާ ހަމައަށް އޮންނަ ސަރަހައްދު އަންނަ އޭޕްރިލް މަހުގެ 17ވަނަ ދުވަހުން ފެށިގެން މަސައްކަތް ނިމެންދެން ބަންދުވާނެ ކަމަށް، ކައުންސިލުން އާންމުކުރި މައުލޫމާތުގައިވެއެވެ. އެހެންކަމުން، މަގު ފުޅާކޮށް މަގުގެ މަސައްކަތް ނިމެންދެން، އެ ސަރަހައްދުގައި އަޅާފައި ހުރި އުޅަނދުފަހަރު އެ ސަރަހައްދުގައި އަޅާފައި ނުބާއްވަން ކައުންސިލުން ވަނީ އަންގައިފައެވެ. ފާހަގަކުރެވޭ ގޮތުގައި ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ދަށުން މަސް މާރުކޭޓާއި އެއް ނަންބަރު ފާލަމާ ދެމެދު އޮންނަ ސަރަހައްދު ތާރު އަޅައި ޒަމާނީ ފެންވަރަށް ތަރައްގީކުރުމަށް ފަހު ތިން މަސް ދުވަސް ފަހުން އާންމުންނަށް ހުޅުވާލީ މިދިޔަ ޑިސެންބަރު މަހުގެ މެދުތެރޭގައެވެ. އަދި ބާޒާރުމަތި ސަރަހައްދުގައި ތާރު އަޅައި މަގު ފުޅާކުރުމަށްފަހު، ރަމަޟާން މަހުގެ ކުރިން ވަނީ ހުޅުވާލައިފައެވެ. ހަތަރު ލޭނަށް ފުޅާކޮށް، ޒަމާނީ ފެންވަރަކަށް ބޮޑުތަކުރުފާނު މަގު ތަރައްގީކުރުމުގެ މަސައްކަތް އެމްޓީސީސީން ފެށީ މިދިޔަ އޮގަސްޓު މަހުގެ 22 ވަނަ ދުވަހެވެ. މި މަޝްރޫއުގެ ދަށުން ކާނިވާ ކައިރި ހުންނަ ފެރީ ޓާމިނަލުން ފެށިގެން މަސް މާރުކޭޓު ސަރަހައްދާ ހަމައަށް 830 މީޓަރުގައި ތާރު އަޅައި، 737 މީޓަރުގެ ސަރަހައްދެއްގައި ޝީޓް ޕައިލްގެ މަސައްކަތް ކުރިއަށްދާނެ ކަމަށް އެމްޓީސީސީން ބުނެފައިވެއެވެ. އެ ސަރަހައްދުގައި ތާރު އަޅައި ނިމޭއިރު، ފެން ހިންދާ ނިޒާމެއް ވެސް ގާއިމުކުރެވޭނެތީ ފެންބޮޑުވާ މައްސަލައަށް ހައްލެއް ލިބޭނެ ކަމަށް އެ ކުންފުނިން އޭރު ބުންޏެވެ. ގާތްގަނޑަކަށް 144.5 މިލިއަން ރުފިޔާއަށް ކޮންސްޓްރަކްޝަން މިނިސްޓްރީން އެމްޓީސީސީއާ މި މަސައްކަތް ހަވާލުކުރީ އެއް އަހަރާއި ތިން މަހުން ނިންމާ ގޮތަށެވެ. މީގެ އިތުރުން މާލޭގެ އެތެރޭގެ މަގުތައް ޗައިނާ ސަރުކާރުގެ ހިލޭ އެހީގައި ކުރެވޭތޯ ވެސް ސަރުކާރުން އަންނަނީ މަސައްކަތްކުރަމުންނެވެ.