ރާއްޖޭގެ ސްކޫލް ދަރިވަރުންގެ މެދުގައި ބޭއްވޭ އެންމެ ފޯރިގަދަ ކުޅިވަރު ހަރަކާތް ކަމަށްވާ އިންޓަ ސްކޫލް ފުޓްބޯޅަ މުބާރާތް، މިފަހަރު އާ ނަމެއްގައި ކަމަށްވާ "ރާއްޖެ ޖޫނިއާސް ފުޓްބޯލް ޗެމްޕިއަންޝިޕް" ގެ ގޮތުގައި މާދަމާ ހުޅުމާލޭގައި ފެށުމަށް ހުރިހާ ތައްޔާރީތަކެއް ނިމިއްޖެއެވެ. އެޑިއުކޭޝަން މިނިސްޓްރީގެ އިރުޝާދުގެ ދަށުން މިހާރު ހުރިހާ ކުޅިވަރެއްގައި ވެސް ސްކޫލްތަކުގެ މެދުގައި ބާއްވާ މުބާރާތްތައް މި ނަމަށް ބަދަލުކޮށްފައިވާއިރު، މިއަހަރުގެ 17 އަހަރުން ދަށުގެ ފުޓްބޯޅަ މުބާރާތުގައި ޖުމްލަ 25 ޓީމަކުން ވަނީ ބައިވެރިވެފައެވެ. މި މުބާރާތް ކުރިއަށް ގެންދިއުމަށް ހަމަޖެހިފައިވަނީ 25 ޓީމު ހަ ގްރޫޕަކަށް ބަހާލައިގެން، ކޮންމެ ގްރޫޕެއްގެ އެއްވަނަ ހޯދާ ޓީމުތަކުގެ އިތުރުން، ދެވަނައަށް ދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމާއެކު ކުއާޓާ ފައިނަލުން ޖާގަ ލިބޭ އުސޫލުންނެވެ. އެފްއޭއެމުން މުބާރާތް ތާވަލުކޮށްފައިވާ ގޮތުން، ގްރޫޕް ސްޓޭޖްގެ މެޗުތައް ކޮންމެ ދެ ދުވަހަކުން ދެ މެޗު ކުޅޭ ގޮތަށް ކުރިއަށްދާނެއެވެ. މި މުބާރާތުގެ ހުރިހާ މެޗެއް ވެސް ހުޅުމާލޭ ޓްރެކް ދަނޑުގައި ކުޅުމަށް ހަމަޖެހިފައިވާއިރު، މެޗުތައް ކުރިއަށްދާނީ 30 މިނެޓުގެ ދެ ހާފަށް ބަހާލައިގެންނެވެ. ކޮންމެ ދުވަހެއްގެ ވެސް ފުރަތަމަ މެޗު މެންދުރުފަހު 3:00 ގައި ފަށާއިރު، ދެވަނަ މެޗު ފަށާނީ ހަވީރު 4:30 ގައެވެ. މާދަމާ މުބާރާތް ހުޅުވައިދޭ ފޯރިގަދަ މެޗުގައި ބައްދަލުކުރާނީ ކ. ގުޅީ ސްކޫލާއި އަހުމަދިއްޔާ އިންޓަނޭޝަނަލް ސްކޫލެވެ. މިފަހަރުގެ މުބާރާތުގެ އެންމެ ފާހަގަކޮށްލެވޭ އެއް ކަމަކީ މާލެ ސަރަހައްދުން ބޭރުން އަތޮޅުތެރޭގެ ހަތް ސްކޫލެއް މި މުބާރާތުގައި ވާދަކުރުމެވެ. އޭގެ ތެރޭގައި ކ. އަތޮޅުން ގުޅި، މާފުށި، ހިންމަފުށި، ގުރައިދޫ އަދި ކ. އަތޮޅު މަދަރުސާގެ އިތުރުން ވ. ކެޔޮދޫ ސްކޫލާއި އދ. އަތޮޅު ތައުލީމީ މަރުކަޒު ހިމެނެއެވެ. މިއީ އަތޮޅުތެރޭގެ ހުނަރުވެރި ދަރިވަރުންނަށް މާލެ ސަރަހައްދުގައި އެމީހުންގެ ކުޅުން ދައްކާލުމަށް ލިބޭ ރަން ފުރުޞަތެކެވެ. މުޅި މުބާރާތުގެ ފައިނަލް މެޗު ކުޅުމަށް ތާވަލުކޮށްފައިވަނީ އަންނަ މޭ މަހުގެ 17 ވަނަ ދުވަހުއެވެ.