ގދ. ނަޑެއްލާގެ ހަސަން އަލީ (A112335) އަކީ އޭޑީކޭ ހޮސްޕިޓަލުގައި ފަރުވާ ހޯދުމަށްފަހު ފައި ކަނޑާލަންޖެހުނު ބަލިމީހެކެވެ. އޭނާ ރަށަށް ދަތުރުކުރަމުން ދަނިކޮށް އޮކްސިޖަން ލެވެލް ދަށްވުމާ ގުޅިގެން 11 ޖަނަވަރީގައި ގއ. ކޫއްޑޫ އެއަރޕޯޓުން ގއ. އަތޮޅު ހޮސްޕިޓަލަށް ގެންދެވުނެވެ. އެތަނުން ވިލިނގިލި ހޮސްޕިޓަލަށް ބަދަލުކުރެވުނު އޭނާ، 15 ޖަނަވަރީގައި އެންސްޕާ ދަތުރު ހަމަނުޖެހެނީސް ހޮސްޕިޓަލުން ނެރެލާފައިވެއެވެ.
ހޮސްޕިޓަލުގެ ނަރުހުން ވަނީ 24 ގަޑިއިރުގެ ތެރޭގައި ބަލިމީހާ ގެންދިއުމަށް އަންގާފައެވެ. އެހެންނަމަވެސް ބަލިމީހާގެ ދަރިފުޅު ވަނީ ބައްޕަގެ ބަލި ހާލަތާއި މާލީ ހާލަތު ހުރިގޮތުން، އެންސްޕާ ދަތުރު ހަމަޖެހެންދެން ހޮސްޕިޓަލުގައި ބެހެއްޓުމަށް އާދޭސްކޮށްފައެވެ. އަދި ވިލިނގިލީ ރައްޔިތެއް ނޫންކަމަށްވެފައި، ގެންދާނެ ތަނެއް ހަމަޖެހެންދެން ހޮސްޕިޓަލުގައި ބޭއްވުމަށް އެދިފައިވެއެވެ.
ނަމަވެސް ހޮސްޕިޓަލް މެނޭޖްމަންޓްގެ ނިންމުމެއްގެ ދަށުން، ބަލިމީހާ ވަނީ އައިވީ ކެނިއުލާއާއެކު ހޮސްޕިޓަލުން ބޭރަށް ނެރެ އެއްލާލާފައެވެ. މީގެއިތުރުން، ބަލިމީހާގެ މެޑިކަލް ހިސްޓްރީ ރަށުގެ ރައްޔިތުންގެ މެދުގައި ހިއްސާކޮށް، މެޑިކަލް ޕްރޮފެޝަނަލް ކޮންފިޑެންޝަލިޓީ ގަވާއިދުތަކާ ޚިލާފުވެފައިވާކަންވެސް ވަނީ ފާހަގަކުރެވިފައެވެ.
މި މައްސަލައާ ގުޅިގެން ބަލިމީހާގެ އާއިލާއިން ވަނީ ހޮސްޕިޓަލް މެނޭޖްމަންޓަށް މައްސަލަ ބަލައި، ކަމާ ގުޅުންހުރި ނަރުހުންނާމެދު އަޅަންޖެހޭ ފިޔަވަޅު އެޅުމަށް ގޮވާލާފައެވެ.
މި އަނިޔާވެރި ސަރުކާރުން ދަނީ އާންމު ރައްޔިތުން ބިކަ ކޮށް، ބޭސް ފަރުވާއިން އަމިއްލަ ގައުމުގައިވެސް މަހުރޫމުކޮށް، ހިތްދަތިކަން ވެރި ކުރުވަމުންނެވެ.