އެމެރިކާގެ ޓެކްނޮލޮޖީ މައި ކުންފުނި އެޕަލްއިން ޗައިނާގެ މާކެޓުގައި ވާދަވެރިކަން އިތުރުވަމުން ދިޔުމާ ގުޅިގެން، އެ ގައުމުގައި އައިފޯނުގެ އަގު ވަރަށް ބޮޑަށް ހެޔޮކޮށްފިއެވެ.
މިގޮތުން އެންމެ ފަހުގެ އައިފޯން މޮޑެލްތަކުގެ އަގުން 500 ޗައިނާ ޔުއާން (68.50 ޑޮލަރު) އަށްވުރެ ބޮޑު އަދަދެއް ހެޔޮކޮށްފައިވެއެވެ.
އެޕަލްގެ ވެބްސައިޓުގައި ބަޔާންކޮށްފައިވާ ގޮތުގައި، މި ޕްރޮމޯޝަން 4 ޖެނުއަރީން ފެށިގެން 7 ޖެނުއަރީއާ ހަމައަށް ކުރިއަށްދާނެ އެވެ. އަދި ވަކި ޕޭމަންޓް މެތަޑްތަކެއް ބޭނުންކޮށްގެން ގަންނަ އައިފޯނުތަކަށް މި ޑިސްކައުންޓް ލިބޭނެއެވެ.
އެންމެ ބޮޑު ޑިސްކައުންޓެއް ކަމުގައިވާ 500 ޔުއާން (68.50 ޑޮލަރު) ލިބޭނީ އައިފޯން 16 ޕްރޯ އަދި އައިފޯން 16 ޕްރޯ މެކްސް މޮޑެލްތަކަށެވެ. މި މޮޑެލްތަކުގެ އަގު ފެށޭނީ 7،999 ޔުއާން (1،112 ޑޮލަރު) އަދި 9،999 ޔުއާން (1،390 ޑޮލަރު) އިންނެވެ. އަދި އައިފޯން 16 އާއި އައިފޯން 16 ޕްލަސްގެ އަގުން 400 ޔުއާން (56 ޑޮލަރު) ދަށްކުރާނެއެވެ.
މި ޑިސްކައުންޓްތައް ތަޢާރަފުކޮށްފައިވަނީ ޗައިނާގެ އިގްތިސާދު މަޑުޖެހި، އަގުތައް ދަށަށް ދިއުމާ ގުޅިގެން ޚަރަދުކުރުމުގައި ރައްޔިތުން ފަރުވާތެރިވަމުންދާ ދަނޑިވަޅެއްގައެވެ. އަދި ދުނިޔޭގެ އެންމެ ބޮޑު ސްމާޓްފޯން މާކެޓް ކަމުގައިވާ ޗައިނާގައި އެޕަލްގެ މާކެޓް ޝެއަރ ދަށަށް ދިއުމާ ގުޅިގެންނެވެ.
ޚާއްސަކޮށް ވާވޭ ކުންފުނިން 2023 ވަނަ އަހަރުގެ އޯގަސްޓް މަހު އަލުން ޕްރީމިއަމް ސެގްމަންޓަށް ނުކުތުމާއެކު، އެޕަލްއަށް ވަރަށް ބޮޑު ގޮންޖެހުމަކަށް ވެފައިވެއެވެ. ވާވޭއިން ވެސް ވަނީ މިދިޔަ ހަފްތާ ބަންދުގައި އެ ކުންފުނީގެ ހައި-އެންޑް ޑިވައިސްތަކުގެ އަގުން 3،000 ޔުއާން (417 ޑޮލަރު) އަށްވުރެ ބޮޑު އަދަދެއް ދަށްކޮށްފައެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi