ކުޑަކުދިންނަށް އަމާޒުކޮށް 'އެޑިކްޓިވް ޑިޒައިން' ބޭނުންކުރާ ކަމަށް ބުނެ ޓިކްޓޮކްގެ މައްޗަށް ކޮށްފައިވާ ދައުވާއެއް ކުރިއަށް ނުގެންދެވޭނެ ކަމަށް ކަނޑައަޅައިދިނުމަށް ޓިކްޓޮކުން ހުށަހެޅި މައްސަލަ, ކޯޓުން ބޭރުކޮށްލައިފިއެވެ. އެމެރިކާގެ ނިއު ހޭމްޝަޔާ ސްޓޭޓުން ޓިކްޓޮކާ ދެކޮޅަށް ކޮށްފައިވާ މި ދައުވާގައި ބުނެފައިވަނީ ޓިކްޓޮކުން ގަސްތުގައި ކުޑަކުދިންނާއި ޒުވާނުން ދެވި ހިފާފަދަ ގޮތަކަށް އެޕް ޑިޒައިންކޮށް، އެކުދިންގެ ނާޖާއިޒު ފައިދާ ނަގަމުންދާ ކަމަށެވެ. ނިއު ހޭމްޝަޔަރުގެ އެޓާނީ ޖެނެރަލް ޖޯން ފޮމެލާ ވިދާޅުވީ، ކޯޓުގެ މި ނިންމުމަކީ ކުޑަކުދިން ނުރައްކަލަށް ހުށަހަޅާ, ގާނޫނާ ޚިލާފު އަމަލުތަކަށް ޓިކްޓޮކް ޒިންމާދާރު ކުރުވުމަށް ލިބުނު ވަރަށް މުހިންމު ކުރިއެރުމެއް ކަމަށެވެ. މި މައްސަލަ ކުރިއަށް ގެންދެވިދާނެ ކަމަށް ނިންމަވަމުން، ނިއު ހޭމްޝަޔާ ސުޕީރިއާ ކޯޓުގެ ޖަޖް ޖޯން ކިސިންގާ ޖޫނިއާ ވިދާޅުވީ، ސްޓޭޓުން ކޮށްފައިވާ ތުހުމަތުތައް ވަކިވަކިން ބަޔާންކޮށްފައިވާތީ އެއީ ކުރިއަށް ގެންދެވޭނެ ވަރުގެ މައްސަލައެއް ކަމަށެވެ. އަދި މި ދައުވާއަކީ އެޕްގައި ހުންނަ ކޮންޓެންޓާ ގުޅުން ހުރި ދައުވާއެއް ނޫން ކަމަށާއި، އެއީ "އެޕްގެ ނުރައްކާތެރި އަދި މައްސަލަ ހުރި ފީޗާތަކުގެ" މައްޗަށް ބިނާކޮށްފައިވާ ދައުވާއެއް ކަމަށް ޖަޖްގެ ހުކުމުގައިވެއެވެ. ސްޓޭޓުން ތުހުމަތުކުރާ ގޮތުގައި، ޓިކްޓޮކުން ބޭނުންކުރާ "އެޑިކްޓިވް ޑިޒައިން ފީޗާސް"ގެ މަގްސަދަކީ ކުދިން އެޕްގައި ގިނަ ވަގުތު ހޭދަކުރުވައި، އިޝްތިހާރުތަކަށް ހުށަހެޅޭ މިންވަރު އިތުރުކޮށް، ޓިކްޓޮކް ޝޮޕް މެދުވެރިކޮށް ވިޔަފާރިކުރުމަށް ބާރުއެޅުމެވެ. މިކަމާ ގުޅިގެން ޓިކްޓޮކްގެ ތަރުޖަމާނަކު ވިދާޅުވީ، އެއީ "ޒަމާނާ ނުގުޅޭ އަދި ކަމުގެ ދެކޮޅު ނުބަލައި" ކުރާ ތުހުމަތުތަކެއް ކަމަށެވެ. އަދި ޒުވާނުންގެ އެކައުންޓުތަކަށް ރައްކާތެރިކަމުގެ ވަރުގަދަ ނިޒާމުތަކާއި، ސްކްރީން ބޭނުންކުރާ ވަގުތު ކޮންޓްރޯލްކުރުމާއި، ބެލެނިވެރިންނަށް ކުދިންގެ އެކައުންޓުތައް ބެލެހެއްޓުމަށް "ފެމިލީ ޕެއަރިން" ފަދަ ވަސީލަތްތައް ފޯރުކޮށްދެމުންދާ ކަމަށްވެސް ތަރުޖަމާނު ވިދާޅުވިއެވެ. ޓިކްޓޮކާ ދެކޮޅަށް ނިއު ހޭމްޝަޔަރުން ހުށަހަޅާފައިވާ މި މައްސަލައަކީ ޓިކްޓޮކަށް އާކަމެއް ނޫނެވެ. އެއީ، ފަހަކަށް އައިސް އެމެރިކާގައި ޒުވާނުންނާއި ކުޑަކުދިންގެ ނަފުސާނީ ދުޅަހެޔޮކަމަށް ސޯޝަލް މީޑިއާގެ އަސަރުކުރާ ގޮތާ މެދު ކަންބޮޑުވުންތައް އިތުރުވުމާ ގުޅިގެން، ޓެކްނޮލޮޖީ ކުންފުނިތައް ޒިންމާދާރުކުރުވުމަށް ހިންގާ ބޮޑު ކެމްޕެއިނެއްގެ ދަށުން ކުރިއަށް ގެންދާ ހަރަކާތްތަކެކެވެ. މިފަދަ ދައުވާތަކުގެ ޚާއްސަ ކަމަކީ، އެޕްލިކޭޝަންތަކުގައި ހިމެނޭ ކޮންޓެންޓަށްވުރެ، ކުދިން އެއަށް ދެވިހިފާ ގޮތަށް ޑިޒައިންކޮށްފައިވާ ފީޗާތަކަށް އަމާޒުކުރުމެވެ. މިސާލަކަށް، ނިމުމެއް ނެތް ސްކްރޯލިންއާއި، އޮޓޮމެޓިކުން ވީޑިއޯ ޕްލޭވުމާއި، އަދި ނޮޓިފިކޭޝަންތައް ފަދަ ކަންކަމަކީ ކުދިން ޝައުގުވެރިކޮށް، އެޕްގައި ގިނަ ވަގުތު ބެހެއްޓުމަށް ބޭނުންކުރާ އުކުޅުތަކެއް ކަމަށް ދައުވާތަކުގައި ބުނެއެވެ. މި އާ ގާނޫނީ އުކުޅުގެ ސަބަބުން، މެޓާ އަދި ސްނެޕްޗެޓް ފަދަ އެހެން ކުންފުނިތަކަށްވެސް ދަނީ މިފަދަ ދައުވާތަކާ ކުރިމަތިލާން ޖެހެމުންނެވެ. މިއީ ޓެކް ކުންފުނިތަކުގެ އުފެއްދުންތަކުން ކުޑަކުދިންނަށް ލިބޭ ގެއްލުމުގެ ޒިންމާ އެ ކުންފުނިތަކުން އުފުލަންޖެހޭނެ ކަމަށް ގަބޫލުކުރެވޭ ގަބޫލުކުރުން އިތުރަށް ބޮޑުވަމުން އަންނަ ކަމުގެ ހެއްކެކެވެ.