ދީނާ ގައުމަށްޓަކައި ކޮންމެ ފަދަ ގުރުބާނީއެއް ވެސް ޖުމްހޫރީ ގުޅުމަށް ތާއީދުކުރި ފަރާތްތަކުންވާނެ ކަމަށާއި، އެގޮތުން ލަސް ނުކޮށް ޖުމްހޫރީ ގުޅުމާއި ޕީޕީއެމްގެ ކޯލިޝަނެއް އިއުލާންކުރެވިގެންދާނެ ކަމަށް ވަރަށް ބޮޑަށް ބެލެވޭ ކަމަށް ޖުމްހޫރީ ގުޅުން ތަމްސީމް ކުރައްވާ އެއް ލީޑަރު އުމަރު ނަސީރު ވިދާޅުވެއްޖެ އެވެ.
ވީނިއުސްއަށް މިރޭ ދެއްވި އިންޓަވިއުއެއްގައި ޖުމްހޫރީ ގުޅުމުގެ ކެމްޕޭން ސްޓިއަރިން ކޮމިޓީގެ ޗެއާމަން އުމަރު ނަސީރު ވިދާޅުވީ ދިވެހި ގައުމާއި ރައްޔިތުންނަށް މިވަގުތަކީ ހައްސާސީ ވަގުތުކޮޅެއް ކަމަށާއި، އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދުގެ ފިކުރާ ދެކޮޅަށް ރައްޔިތުން ތެދުވަންޖެހޭ ކަމަށެވެ. އަދި ވިދާޅުވީ ޖުމްހޫރީ ގުޅުމުގައި ހިމެނޭ ޕާޓީ ތަކުގެ ވިސްނުން ހުރީ ޕީޕީއެމްއާއެކު އިންތިހާބުގެ ދެވަނަ ބުރަކަށް ދާން ކަމަށާއި، މިރޭގެ ވަގުތެއްގައި ދެ ފަރާތުގެ ކޯލިޝަނެއް އިއުލާންކުރެވިގެންދާނެ ކަމަށް ބެލެވޭ ކަމަށެވެ.
"އަޅުގަނޑުމެން ދެ ފަރާތުގެ ލީޑަރުންގެ މެދުގައި އަދި ރަސްމީ މަޝްވަރާތަކެއް އަޅުގަނޑަށް އެނގިގެން ކުރިއަކަށް ނުދޭ. ނަމަވެސް ދެ ފަރާތުގެ ލީޑަޝިޕްގައި ހިމެނޭ އެއަށްވުރެ ދަށް ފެންވަރުން އެބަ ހިނގާ މަޝްވަރާތައް،" އުމަރު ވިދާޅުވި އެވެ.
އޭނާ ވިދާޅުވީ ޑީއާރްޕީއެކުވެސް ނަޝީދަށް ވޯޓް ލިބިވަޑައިގެންނެވީ ކުރިންވެސް ލިބުނު އަދަދަށް ކަމަށާއި، އެހެންކަމުން އިންތިހާބުގެ ދެވަނަ ބުރެއްގައި ޖޭޕީ އާއި ޕީޕީއެމް ގުޅިގެން ނަޝީދު ފަސޭހަކަމާއެކު ބަލިކޮށްލެވޭނެ ކަމަށެވެ. ޖޭޕީ އަދި ޕީޕީއެމްއަށް ތާއީދުކުރި ރައްޔިތުން މާޔޫސް ނުވުމަށް އެދިވަޑައިގަންނަވާ ކަމަށާއި، ނަޝީދުގެ ފިކުރުގެ މައްޗަށް ކާމިޔާބު ހޯދައި ރައްޔިތުންނަށް ހިތްހަމަޖެހުން ހޯއްދަވައިދެއްވާނެ ކަމަށް ވެސް ވިދާޅުވި އެވެ.
"ނަޝީދު އެއްގޮތަކަށްވެސް ހީފުޅުކުރައްވައިގެން ނުވާނެ އޭނާއާ ހުޅަނގުގެ ލާދީނީ ފިކުރުގެ ކުރިމަތީގައި އަޅުގަނޑުމެން ކުޑަކަކޫ ޖަހާނެ ކަމަށް. އެހެނެއް ނުވާނެ،" އުމަރު ވިދާޅުވި އެވެ.
އޭނާ ވިދާޅުވީ ރިޔާސީ އިންތިހާބުގެ ދެވަނަ ބުރު މާދަމާ ނުބޭއްވޭނެ ކަމަށާއި، ކަންކަން ކުރުގަޅުވާލައިގެން ކުރުމުގެ ފުރުސަތު ޖުމްހޫރީ ގުޅުމުން ނުދޭނެ ކަމަށާއި އަދި އެކަން އިލެކްޝަންސް ކޮމިޝަނަށް ވެސް ރަނގަޅަށް އިނގޭނެ ކަމަށެވެ.
ޖުމްހޫރީ ގުޅުމަށް އިންތިހާބުގައި ނާކާމިޔާބީއާ ކުރިމަތިލާންޖެހުނީ ކީއްވެގެންތޯ ދެންނެވުމުން އުމަރު ވިދާޅުވީ "އެއީ މިފަދަ ވަގުތެއްގައި ދެއްކޭ ވަރަށް ވުރެ ގިނަ ވާހަކަތަކެއް" ކަމަށެވެ.
އުމަރު ތަކުރާރުކޮށް ވިދާޅުވީ ޖުމްހޫރީ ގުޅުމާއި ޕީޕީއެމްއަށް ތާއީދުކުރި ފަރާތްތަކުން އެއްގޮތަކަށް ވެސް މާޔޫސް ނުވެ އިންތިހާބުގެ ދެވަނަ ބުރަށް ހިތްވަރާއެކު މަސައްކަތް ކުރުމަށް އެދިވަޑައިގަންނަވާ ކަމަށެވެ.
މިއަދު ބޭއްވުނު ރިޔާސީ އިންތިހާބުގައި ދެވަނަ ބުރަކަށް ވަޑައިގެންނެވީ އެމްޑީޕީގެ ރިޔާސީ ކެންޑިޑޭޓް މުހައްމަދު ނަޝީދާއި ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީން އެވެ.