ކުރީގެ ރައީސް އަދި އިދިކޮޅު ޑީއާރުޕީގެ ޒައީމް އަލްއުސްތާޒް މައުމޫން އަބްދުލް ގައްޔޫމް އިސްވެ ހުންނަވައިގެން އުފައްދަވާފައިވާ ޒެޑް ޑީއާރުޕީ އަކީ މައުމޫން އަލުން ރާއްޖޭގެ ވެރިކަމަށް ވަޑައިގަތުމުގެ ކެމްޕޭން ހަރަކާތެއް ކަމަށް ބުނެ ޑީއާރުޕީން އަނެއްކާ ވެސް އެ މަނިކުފާނަށް ބަހުގެ ހަމަލަތަކެއް ދީފި އެވެ.
ޒެޑް ޑީއާރުޕީއަށް ރައްދު ދީ ޑީއާރުޕީން މިރޭ ނެރުނު ބަޔާނެއްގައި ބުނެފައި ވަނީ އެ ފެކްޝަންގެ "ހަގީގީ ބޭނުމާއި މަގުސަދު ދިވެހި ހުރިހާ ރައްޔިތުންނަށް ސާފުކޮށް މިއަދު ވަނީ އެނގިފަ" ކަމަށާއި އެކަން ހާސިލްކުރެއްވުމަށް މައުމޫން، ޑީއާރުޕީ "ރޫޅާލައި ފުނޑުފުނޑު" ކޮށްލައްވަފާނެ ކަމަށެވެ.
"މި ހަރަކާތަކީ އަލްއުސްތާޒް މައުމޫން އަބްދުލް ގައްޔޫމް 25 ޖެނުއަރީ 2010 ވަނަ ދުވަހު ސިޔާސީ މައިދާނުން ވަކިވެ ވަޑައިގަތް ކަމަށް ވިދާޅުވި ނަމަވެސް އަނބުރާ ސިޔާސީ މައިދާނަށް، ދިވެހިރާއްޖޭގެ ވެރިކަމަށް ވަޑައިގަތުމަށްޓަކައި ފަށާފައިވާ ކެމްޕޭނެކެވެ،" ޑީއާރުޕީގެ ބަޔާނުގައިވެ އެވެ. "މި މަގުސަދު ހާސިލް ކުރުމަށްޓަކައި ދިވެހި ރައްޔިތުންގެ ޕާޓީ ރޫޅާލައި ފުނޑުފުނޑުކޮށްލުމަށް ވެސް އެ މަނިކުފާނު ފަސްޖެހިވަޑައިނުގަންނަވާނެ ކަން އަމަލާއި ބަހުން މިދަނީ ހާމަވަމުންނެވެ. އެހެންކަމުން ޕާޓީގެ މަސްލަހަތު ނަގާލައި ޕާޓީ ބައިބައި ކޮށްލުމަށް ހިންގަމުން ގެންދާ މި އަމަލުތައް ވަރަށް ހަރުކަށި އިބާރާތުން މި ޕާޓީން ކުށްވެރި ކުރަމެވެ. އަދި މި ފުރުސަތުގައި ޕާޓީގެ އެންމެހާ މެމްބަރުން ޕާޓީގެ އަސާސީ ގަވާއިދަށް ފުރިހަމައަށް އިހުތިރާމް ކުރުމަށް ގޮވާލައި ނަސޭހަތްތެރިވަމެވެ."
ޑީއާރުޕީން ބުނިގޮތުގައި މިދިޔަ އަހަރުގެ ފެބްރުއަރީ މަހު ބޭއްވި ޑީއާރުޕީގެ ތިންވަނަ ގައުމީ ޖަލްސާ ނުވަތަ ކޮންގްރެސްގެ "ނިންމުންތަކަށް ގޮންޖަހައި ވަކި މީހެއްގެ މަސްލަހަތު ދެމެހެއްޓުމަށްޓަކައި ހިންގާ ހަރަކާތަކީ ޕާޓީގެ އާންމު މަސްލަހަތާއި ފުށުއަރާ ޑިމޮކްރެސީއާ ވެސް ހިލާފު އަމަލުތަކެކެވެ."
"އަދި ދިވެހި ރައްޔިތުންގެ ޕާޓީގެ އަސާސީ ގަވާއިދަށް ގޮންޖަހައި، ޕާޓީގެ ލީޑަޝިޕް ބަލިކަށި ކުރުމުގެ ނިޔަތުގައި މުޅި ދިވެހި ރައްޔިތުންގެ ޕާޓީގެ މެމްބަރުންނަށް ދެވޭ ނިކަމެތި ކަމެކެވެ،" ޑީއާރުޕީގެ ބަޔާނުގައިވެ އެވެ.
ޑީއާރުޕީން މިރޭ މައުމޫނަށާއި ޒެޑް ޑީއާރުޕީއަށް ވަރުގަދަ ބަހުގެ ހަމަލަތަކެއް ދިންއިރު މީގެ ކުރިން ވެސް އެފަދަ ރައްދެއް ވަނީ ދީފަ އެވެ.