އެޗްއާރުސީއެމް އިން ބުނީ އެ ކޮމިޝަނުން ކުރިއަށް ގެންގޮސްފައިވާ އެއްވެސް ދިރާސާއެއްގައި އެފަދަ ސުވާލެއް ކޮށްފައި ނުވާނެ ކަމަށެވެ. އަދި ކޮމިޝަނާ ގުޅޭ ގޮތުން ފަތުރަމުން ދަނީ ހަގީގަތާ ހިލާފު ވާހަކަތަކެއް ކަމަށާއި، ކޮމިޝަނުގެ މަސައްކަތްތައް އަބަދުވެސް ބިނާކޮށްފައި ވަނީ އިސްލާމީ ޝަރީއަތާއި ރާއްޖޭގެ ގާނޫނުއަސާސީގެ އިތުރުން ރާއްޖެއިން ބައިވެރިވެފައިވާ މުއާހަދާތަކުގެ މައްޗަށް ކަމަށް އެ އޮފީހުން ބުންޏެވެ.
މީގެ އިތުރުން ގާނޫނުތަކާއި ގަވާއިދުތަކާ ހިލާފު އެއްވެސް ކަމަކަށް ހިތްވަރު ލިބޭނެ ފަދަ ވާހަކައެއް ކޮމިޝަނުގެ މަސައްކަތްތަކުގައި ބަޔާންކޮށްފައި ނުވާނެ ކަމަށް ވެސް އެޗްއާރުސީއެމް އިން ބުންޏެވެ. އަދި ކޮމިޝަނުން ކޮންމެ ކަމެއްގައި ވެސް އިސްލާމީ ޝަރީއަތާއި ރައްޔިތުންގެ މަސްލަހަތު އިސްކުރާނެ ކަމުގެ ޔަގީންކަން އެ ބަޔާނުގައި ވަނީ ދީފައެވެ.