އިންޑިއާގެ ރައްޔިތުންނާއި ދިވެހި ރައްޔިތުންގެ މަންފާއަށްޓަކައި އެކުގައި ކުރާ މަސައްކަތްތައް ކުރިއަށް ގެންދަވާނެ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ މިއަދު ވިދާޅުވެއްޖެއެވެ. އިއްޔެ ރައީސް ޑރ. މުޙައްމަދު މުއިއްޒު ވަނީ އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި އެ ގައުމުގެ ރައީސް ދްރައުޕަތީ މުރްމުއަށާއި އިންޑިއާގެ ބޮޑުވަޒީރު ނަރެންދުރަ މޯދީއަށް ތަހުނިޔާ ފޮނުއްވާފައެވެ. އިނގިރޭސިބަހުން ރައީސް މުއިއްޒު ކުރެއްވި އެ ޕޯސްޓަށް ދިވެހިބަހުން މޯދީ މިއަދު ދެއްވި ޖަވާބުގައި ވިދާޅުވީ، އެ ގައުމުގެ ޖުމްޙޫރީ ދުވަހުގެ މުނާސަބަތުގައި އަރިސްކުރެއްވި ތަޙުނިޔާއާއި ހެޔޮއެދުން އިހުތިރާމާ އެކު ބަލައިގަންނަވާ ކަމަށެވެ. އަދި، ހަމައެއާ އެކު ދެ ގައުމުގެ ރައްޔިތުންގެ މަންފާއަށްޓަކައި އެކުގައި ކުރާ މަސައްކަތް ކުރިއަށްގެންދަވާނެ ކަމަށް ބޮޑުވަޒީރު މޯދީ ވިދާޅުވިއެވެ. https://www.sun.mv/217170 "އެންމެހާ ދިވެހި ރައްޔިތުންނަށް ކުރިއަށް އޮތީ އުފާވެރި ފާގަތި ދުވަސްތަކެއްކަމުގައި އެދެން،" މޯދީގެ ޕޯސްޓްގައިވެއެވެ. ރައީސް މުއިއްޒު, ބޮޑުވަޒީރު މޯދީއަށް ފޮނުއްވި ސިޓީފުޅުގައި ވަނީ ދެ ގައުމުގެ ގުޅުމުގެ ނަތީޖާއެއްގެ ގޮތުން ފެންނާން ހުރި ތަރައްގީ ފާހަގަކުރައްވާފައެވެ. އަދި، ބޮޑުވަޒީރު މޯދީގެ ބެއްލެވުމުގެ ދަށުން ސަރަޙައްދީ ފެންވަރުގައި އިންޑިއާއިން ދައްކާ އިސްނެގުން ފާހަގަކުރައްވައި، ކުރިއަށް އޮތް ދުވަސްތަކުގައި ވެސް ދެ ގައުމުން މަސްލަހަތު ހިމެނޭ ކަންކަމުގައި ދެ ގައުމުގެ ގުޅުން ހަރުދަނާކޮށް، އަމަލީގޮތުން އެއްބާރުލުން ދިނުން އިތުރުކުރުމުގެ އަޒުމުގައި ސަރުކާރުން މަސައްކަތްކުރާނެ ކަމަށް ރައީސް ވިދާޅުވިއެވެ. މީގެ އިތުރުން، ދިވެހިރާއްޖޭގެ އިގުތިސާދީ އަދި އިޖުތިމާއީ ތަރައްގީއަށް އިންޑިއާއިން ދޭ އެއްބާރުލުމުގެ އަގުވަޒަންކުރައްވާ ކަމަށް އެ މަނިކުފާނު ވިދާޅުވިއެވެ. އެ މަނިކުފާނު ވަނީ ދެ ލީޑަރުންނަށް ވެސް ފުރިހަމަ ސިއްހަތާއި ދުޅަހެޔޮކަމަށް އެދިވަޑައިގެން، އެ ގައުމުގެ ރައްޔިތުންނަށް ކުރިއެރުމާއި ފާގަތިކަމަށް އެދިވަޑައިގެންފައެވެ. https://x.com/narendramodi/status/2015981935101935645 ކޮންމެ އަހަރެއްގެ ޖަނަވަރީ މަހުގެ 26 ވަނަ ދުވަސް އިންޑިއާގެ ޖުމްހޫރީ ދުވަހުގެ ގޮތުގައި ފާހަގަކުރަނީ 1950 ވަނަ އަހަރު، އެ ގައުމުގެ ގާނޫނުއަސާސީ ތަންފީޒުކޮށް ބަދަލުވުމުގެ މުނާސަބަތާ ގުޅުވައިގެންނެވެ. މި ސަރުކާރު ވެރިކަމަށް އައީ ރާއްޖޭގައި ތިބި އިންޑިއާޖުމްހޫރިއްޔަތަކަށް ސިފައިން އަނބުރާ ފޮނުވާލުމަށް ގޮވާލައި 'އިންޑިއާ އައުޓް'ގެ ނަމުގައި ހިންގި ބޮޑު ހަރަކާތަކަށް ފަހުގައެވެ. އޭގެ ސަބަބުން، މި ސަރުކާރުގައި އިންޑިއާއާ ގުޅުން ގޯސްވެދާނެ ކަމަށް ބޭރުގެ މީޑިއާތަކުން ފުރަތަމަ ވެސް ލަފާކުރިއެވެ. އަދި، މި ސަރުކާރުގެ ކުރީކޮޅު ނައިބު ވަޒީރުންތަކެއް މޯދީއާއި އިންޑިއާގެ ރައްޔިތުންނަށް ކުޑައިމީސްކުރުމުން، ދެ ގައުމުގެ ގުޅުން ގޯސްވިއެވެ. އޭގެ ފަހުން ރައީސް މުއިއްޒުގެ ސަރުކާރުން ވަނީ އިންޑިއާއާ ގުޅުން ރަނގަޅުކުރުމަށް ގިނަ މަސައްކަތްތަކެއް ކޮށްފައެވެ. އެ ގޮތުން، ރައީސް އިންޑިއާއަށް ދެ ދަތުރުފުޅެއް ކުރައްވާފައިވާއިރު، މިދިޔަ އަހަރުގެ މިނިވަން ދުވަހާ ދިމާކޮށް މޯދީ ރާއްޖެ ވަޑައިގެންފައިވެއެވެ.