ބައެއް އަންހެނުންނަކީ އަދި ފިރިހެނުންނަކީވެސް ޒުވާން ޢުމުރުގައި ފާފަތަކެއް ކުރެވިފައިވާނެ ބައެކެވެ. އެކަންކަން ހޯދައި އޮޅުންފިލުވަން އުޅުމެއް ނެތެވެ. ސުވާލުވެސްކޮށްގެން ނުވާނެއެވެ. ސަބަބަކީ އެއްވެސް މީހަކަށް ކުރެވިފައިވާ ފާފައެއްގެ ވާހަކަ އެއްވެސް މީހެއްގެ ގާތުގައި ބުނުމަކީ މާބޮޑު ފާފައަކަށްވާތީއެވެ.  
ދެން އޮތީ ކޮންމެވެސް ގޮތަކުން އެފަދަކަމެއް އެނގުމެވެ. އެނގިއްޖެނަމަ އޮތީ ދީލަތިކަމާއިއެކު މާފްކުރުމެވެ. ސަބަބަކީ ނުއެނގުނު ނަމަވެސް ކޮންމެ މީހަކީވެސް ކޮންމެވެސް ފާފަތަކެއް ކުރެވިފައިވާނެ މީހަކަށްވާތީއެވެ.  
ބަލަންވީ އޭނާ މިހާރު އުޅޭ ގޮތަށެވެ. ދީނަށް ލޯބިކުރާ ވަރަށެވެ. ދީނަށް ޢަމަލުކުރާ ވަރަށެވެ. އޭނާއަށް ކުރެވުނު ފާފަތަކަށް ތައުބާބެ ހެޔޮގޮތުގައި އުޅޭނަމަ އޭނާއަކީ އެއްވެސް ފާފައެއް ނުކުރާ މީހަކު ފަދައެވެ. އޭނާއަކީ ޠޯހިރު މީހެކެވެ.  
މިކަންކަމަށް މިގޮތަށް ޢަމަލުނުކުރާނަމަ ހަމަޖެހޭ ދިރިއުޅުމެއް ނުލިބޭނެއެވެ. ވިސްނަންވީ ﷲ ތަޢާލާގެ ދީލަތިވަންތަކަމަށެވެ. ކިތަންމެ ގިނަ ފާފަތަކެއް ކޮށްފައި ނަމަވެސް ތައުބާވުމުން ފާފަތައް ފުއްސަވައިދެއްވަވާ ކަމާއިމެދުގައެވެ. ވީމާ އަހުރެމެންނަށްވެސް އޮތީ ތައުބާވެ އިޞްލާޙްވުމުން ދީލަތިކަމާއިއެކު މާފުކުރުމެވެ.  
ނަމަވެސް ބައެއް މީހުން ކައިވެނިކުރުމަށްފަހު ތެދަށް ބުނާށޭ، ތެދަށް ބުނި ނަމަވެސް އަޅައެއް ނުލާނަމޭ ފަދަ ވާހަކަތައް ދައްކައި އަނެކާއަށް ކުރިން ކުރެވިފައިވާ ކަންކަން އޮޅުންފިލުވަން އެބަ މަސައްކަތްކުރެއެވެ. އެއީ އިސްލާމްދީން ހުއްދަކުރާ ކަންކަމެއް ނޫނެވެ. ސަބަބަކީ ކުރިން މިބުނި ފަދައިން ކުރެވިފައިވާ ފާފަތަކުގެ ވާހަކަ ދެއްކުމަކީ މާބޮޑު ފާފައަކަށްވާތީއެވެ.
 
- ޝައިޚް ޢާޞިމް އަލްޙަކީމްގެ ދަރުސަކުން