ކުރީގެ ރައީސް މުހައްމަދު ނަޝީދު 13 އަހަރަށް ޖަލަށްލުމަށް ކްރިމިނަލް ކޯޓުން ކުރި ހުކުމާ ގުޅޭ ގޮތުން ދައުލަތުން ސުޕްރީމް ކޯޓަށް ހުށަހެޅި މައްސަލާގެ އަޑުއެހުންތައް ނިންމާލައިފި އެވެ.
ނަޝީދުގެ ޝަރީއަތް ކުރިއަށް ގެންގޮސްފައިވަނީ އިންސާފިވެރިކޮށް ކަށަވަރުކޮށްދިނުމަށް އެދި ދައުލަތުން ހައިކޯޓަށް ހުށަހެޅި މައްސަލަ އެ ކޯޓުން ނުބަލަން ނިމުމުން، އެ ނިންމުން ސްޕްރީމް ކޯޓުގައި އިލްތިމާސްކުރުމުން ސްޕްރީމް ކޯޓުން ވަނީ އެ މައްސަލަ ބަލަން ނިންމާފަ އެވެ. މި މައްސަލާގައި ބޭއްވި އަޑުއެހުމުގައި ނަޝީދުގެ ފަރާތުން 15 ނުކުތާއެއް ވަނީ ފާހަގަކޮށްފަ އެވެ.
ރައީސް ނަޝީދަށް ޓެރަރިޒަމްގެ ދައުވާ ކޮށްފައިވަނީ، ޕީޖީ މުހުތާޒަށް ނުފޫޒު ފޯރުވައިގެންކަން ކަށަވަރު ކޮށްދިނުމަށް މުހުތާޒު ކޯޓަށް ހާޒިރުކޮށްދެއްވުމަށް ނަޝީދުގެ ވަކީލުން ވަނީ އެދިލައްވާފަ އެވެ. މި މައްސަލާގައި މިއަދު ބޭއްވި އަޑުއެހުމުގައި ނަޝީދުގެ ފަރާތުން އެމަނިކުފާނުގެ މައްޗަށް ޓެރަރިޒަމްގެ ދައުވާކޮށްފައި ވިޔަސް ނަޝީދާ މެދު ޓެރަރިޒަމްގެ ތަހުގީގެއް ކޮށްފައި ނުވާކަން ސާބިތުކޮށް ދިނުމަށް
ކުރީގެ ޕޮލިސް ކޮމިޝަނަރު އަދި މިހާރު ކިނބިދޫ ދާއިރާގެ ރައްޔިތުންގެ މަޖިލީހުގެ މެންބަރު އަބްދުﷲ ރިޔާޒް ކޯޓަށް ހާޒިރުކޮށްދިނުމަށް އެދިފަިވެއ އެވެ.
މިކަމާ ގުޅިގެން ސުޕްރީމް ކޯޓުގެ ފަނޑިޔާރުން ވިދާޅުވީ، ބަލަމުންދާ މައްސަލައިގެ ގޮތުން މީހުން ހާޒިރުކޮށްގެން ސުވާލުކުރަންޖެހޭ ސަބަބެއް ނެތް ކަމަށެވެ. އަދި ސުވާލުކުރަން ޖެހިއްޖެ ނަމަ އެކަން ކުރައްވާނެ ކަމަށާއި އިތުރު ކަމެއް ސާފުކުރަން ނުޖެހޭ ނަމަ މައްސަލައިގެ އިތުރު އަޑުއެހުމެއް ދެން ނުބާއްވާނެ ކަމަށެވެ.
މީގެ ކުރިން މި މައްސަލާގައި ބޭއްވި އަޑުއެހުމުގައި ދައުލަތުން ވެސް ވަނީ ބައެއް ކަންކަން ފާހަގަކޮށްފަ އެވެ.
މި މައްސަލާގައި ދައުލަތުން އެދިފައިވަނީ، ކްރިމިނަލް ކޯޓުގައި ރައީސް ނަޝީދުގެ ޝަރީއަތް ކުރިއަށް ދިޔައީ ގާނޫނާ އެއްގޮތަށްތޯ ބަލައި ދިނުމަށާއި އަލުން ދަށު ކޯޓުގައި ޝަރީއަތް ހިންގަން ޖެހިއްޖެނަމަ ކުރިއަށްދާނެ ގޮތްތަކެއް ކަނޑައަޅައިދިނުމަށެވެ. ނަޝީދުގެ ފަރާތުން އެދިފައިވަނީ ނަޝީދުގެ މައްޗަށް ކޮށްފައިވާ ހުކުމަކީ ބާތިލު ހުކުމުގެ ގޮތުގައި ކަނޑައަޅައިދިނުމަށެވެ.