ދިވެހިރާއްޖޭގެ ފުރަތަމަ "ޝާކް ރިސާޗް އެންޑް ކޮންޒަވޭޝަން ހަބް" ފުވައްމުލަކުގައި އިއްޔެ ހުޅުވައިފިއެވެ. މިއީ ދިވެހިރާއްޖެއާއި ރާއްޖޭގެ ވަށައިގެންވާ ކަނޑުގެ ސަރަހައްދުތަކުގައި އުޅޭ މިޔަރުގެ އާބާދީ ދިރާސާކޮށް، އެ ތަކެތީގެ މަޢުލޫމާތު އެއްކޮށް، ހިމާޔަތްކުރުމުގެ މަސައްކަތް ވަރުގަދަކުރުމަށްޓަކައި މަސައްކަތްކުރާ ދިވެހި ޖަމިއްޔާއެއް ކަމަށްވާ "ދަ މިޔަރު ޕްރޮގްރާމް" އިން ހުޅުވި ފެސިލިޓީއެކެވެ. މި މަރުކަޒަކީ ސައިންސްވެރިންނާއި، ތިމާވެށި ރައްކާތެރިކުރާ ފަރާތްތަކާއި، އަދި ރަށްރަށުގެ މުޖުތަމައުތަކާއެކު ގުޅިގެން މަސައްކަތްކުރުމަށް ހުޅުވުނު މުހިންމު މަރުކަޒެކެވެ. މި ތަން ހުޅުވައިދެއްވީ ފުވައްމުލަކު މޭޔަރު އިސްމާއީލް ރަފީގެވެ. މި މަރުކަޒަކީ ދިރާސާކުރުމާއި، ތަޢުލީމު އުނގަންނައިދިނުމާއި، ގުޅިގެން މަސައްކަތްކުރުމުގެ އިތުރުން އައު އީޖާދުތަކަށް މަގުފަހިކޮށްދޭނެ ތަނެއް ކަމަށް ދަ މިޔަރު ޕްރޮގްރާމުން ބުނެއެވެ. ފުވައްމުލަކަކީ 2020 ވަނަ އަހަރުން ފެށިގެން ޔުނެސްކޯ ބަޔޯސްފިއާ ރިޒާވްއެއްގެ ގޮތުގައި ކަނޑައަޅާފައިވާ ރަށެކެވެ. ދަ މިޔަރު ޕްރޮގްރާމްގެ ހޯދުންތަކުން ދައްކާ ގޮތުގައި، ފުވައްމުލަކު ސަރަހައްދުން މިހާތަނަށް 300 އަށްވުރެ ގިނަ ފެމުނު މިޔަރު (ޓައިގާ ޝާކް) ވަނީ ފޮޓޯ އައިޑީ މެދުވެރިކޮށް ދެނެގަނެވިފައެވެ. އަދި މި ސަރަހައްދަކީ މާބަނޑު ފެމުނު މިޔަރު ވިހެއުމަށް ބޭނުންކުރާ މުހިންމު މަންޒިލެއްކަންވެސް ދިރާސާތަކުން ވަނީ ހާމަވެފައެވެ. ފެމުނު މިޔަރުގެ އިތުރުން، ކަނޑި މިޔަރު (ތްރެޝާ ޝާކް) އާއި ފެހުރިހި ފަދަ ބާވަތްތައް ދެނެގަތުމަށް ޚާއްސަ ޕްރޮގްރާމްތަކެއްވެސް މި މަރުކަޒުން ކުރިއަށްގެންދެއެވެ. އެގޮތުން 2025 ވަނަ އަހަރުގެ ފަހުކޮޅު ފެށި "ފުވައްމުލަކު ތްރެޝާ ޕްރޮޖެކްޓް" ގެ ދަށުން ކަނޑި މިޔަރުގެ އުޅުމާއި ހަރަކާތްތައް އަންނަނީ ދިރާސާކުރަމުންނެވެ. މި މަރުކަޒު ހުޅުވުމާ ގުޅިގެން ފުވައްމުލަކު ސިޓީ ކައުންސިލުން ވަނީ މި މަސައްކަތަށް ފުރިހަމަ އެއްބާރުލުން ދޭނެކަން ހާމަކޮށްފައެވެ. ކައުންސިލުން ބުނި ގޮތުގައި، ދުނިޔޭގެ އެންމެ ފާހަގަކޮށްލެވޭ ޝާކް ޑައިވިން މަންޒިލެއްގެ ގޮތުގައި ފުވައްމުލަކުގެ ނަން ދަމަހައްޓަމުން، ކަނޑުފަޅުތައް ރައްކާތެރިކުރުމަށް ކުރެވޭ މިފަދަ މަސައްކަތްތަކަށް އެ ކައުންސިލުން އަބަދުވެސް މަރުޙަބާކިޔާ އެއްބާރުލުން ދޭނެއެވެ. ފުވައްމުލަކުގެ އިޤުތިޞާދު ބޮޑަށް ބިނާވެފައިވަނީ ޑައިވިން ފަތުރުވެރިކަމުގެ މައްޗަށް ކަމަށްވާއިރު، މި ސިނާޢަތް ދެމެހެއްޓުމަށްޓަކައި ކަނޑުގެ ދިރުންތައް ޙިމާޔަތްކުރުމަކީ ކޮންމެހެން މުހިންމު ކަމެއް ކަމަށް ކައުންސިލުން ފާހަގަކުރިއެވެ.