މިމަހުގެ 12 ވަނަ ދުވަހު ދައުލަތުގެ ތިން ވުޒާރާއެއް ހިންގަމުންދިޔަ އިމާރާތުގައި ހިނގި އަލިފާނުގެ ހާދިސާއާ ގުޅިގެން ވަގުތީ ބޯހިޔާވަހިކަމަށް ބަދަލުކުރެވުނު އެންމެން މިހާރު އެމީހުންގެ އަމިއްލަ ގެދޮރަށް ބަދަލުކޮށްފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ހާމަކޮށްފިއެވެ.އެންޑީއެމްއޭ އިން ދެއްވި މަޢުލޫމާތުގައިވާ ގޮތުން، އަލިފާނުގެ ހާދިސާއާ ގުޅިގެން އެ ސަރަހައްދުގެ 3 އިމާރާތެއްގެ 7 ގޭބިސީއަކުން ޖުމްލަ 29 މީހުން ވަގުތީ ހިޔާވަހިކަމަށް ބަދަލުކުރެވުނެވެ. މީގެ ތެރޭގައި ހިމެނެނީ 15 ފިރިހެނުންނާއި 14 އަންހެނުންނެވެ.އެންޑީއެމްއޭ އިން އިތުރަށް ހާމަކުރިގޮތުގައި، މި 29 މީހުންގެ ތެރެއިން 5 މީހުން މިމަހުގެ 19 ވަނަ ދުވަހު އެމީހުންގެ އަމިއްލަ ގެއަށް ބަދަލުކުރެވުނެވެ. އަދި ބާކީ ތިބި 24 މީހުން އިއްޔެ (23 އޮކްޓޯބަރ 2023) ވަނީ އެމީހުންގެ އަމިއްލަ ގެދޮރަށް ބަދަލުކޮށްފައެވެ. އެންޑީއެމްއޭ އިން ފާހަގަކުރިގޮތުގައި، މި ހުރިހާ އެންމެންވެސް އެމީހުންގެ ގެތަކަށް ބަދަލުކުރެވުނީ އެ ހުރިހާ ގެއެއްގެ މަރާމާތަށް އުސޫލުގެ ތެރެއިން އެހީ ދިނުމަށްފަހުގައެވެ.އަލިފާނުގެ ހާދިސާ ހިނގި އިމާރާތަކީ ގެދޮރުވެރިކަމާއި ބިމާއި އުމްރާނީ ތަރައްޤީއާބެހޭ ވުޒާރާއާއި، އިމާރާތްކުރުމާއި ބިނާވެށްޓާބެހޭ ވުޒާރާއާއި، މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާ ހިންގަމުންދިޔަ އިމާރާތެވެ.
މި ހާދިސާގައި އެ އިމާރާތްތައް ވަނީ ބޭނުންނުކުރެވޭ ވަރަށް އަނދާ ހުލިވެފައެވެ. އެ ތިން ވުޒާރާ ވަނީ ވަގުތީގޮތުން ދަރުބާރުގެއަށް ބަދަލުކޮށް ޚިދުމަތް ދޭން ފަށާފައެވެ.