ޕްލޭނިންގ ދާއިރާއިން ކިޔަވައިގެން އެ ދާއިރާއިން ތަޖުރިބާ ހާސިލް ކޮށްފައިވާ ޑރ. ޚައިދަރު ހައުސިންގ މިނިސްޓަރަކަށް ބަހައްޓައިގެން ރައީސް މުއިއްޒު އެންގެވި ކަމެއް އެންގެވި ގޮތަކަށް ކޮށް، މުޅި މީހާގެ އަގާއި އިއްޒަތާއި ގަދަރު ރައްޔިތުން ކުރިމަތީ ވަނީ ގެއްލުވާލާފައެވެ.
ގޯއްޗާއި ފްލެޓް ލިސްޓް ލަސް ކުރަމުންދަނީ ޚައިދަރެއް ނޫނެވެ. ޚައިދަރަށްވާ ރަނގަޅީ ވީހާވެސް އަވަހަކަށް އެ ލިސްޓަކުން ސަލާމަތް ވެވޭނޭ މަގެކެވެ. ޚައިދަރަކީ ސިޔާސީ މީހެއް ނޫނެވެ. ސިޔާސީ ކުރިމަގަކަށް ރައްޔިތެއް އުފާ ކޮށްދޭން ޖެހޭ ސަބަބެއް އޭނާ ޒަމީރުގައި ނުވެއެވެ. މުއިއްޒުގެ އިތުރުން، ޚައިދަރަށް ކުރިމަތިވެފައިވާ އަނެއް މަޖުބޫރަކީ، އަމިއްލަ ނަފްސު “ހައިބަތު”ގެ މައްޗަށް އޮތް ދަހިވެތިކަމެވެ. މިނިސްޓަރު ކަމުގެ ހައިބަތެވެ. ނަމަވެސް ރައްޔިތުންގެ ކުރިމަތީގައި ޑރ. ޚައިދަރެކޭ، ގޮނޑުދޮށަށް ލައްގާ ފިރުއައުނު މުދަލެކޭ ތަފާތެއް ނެތެވެ. “ހައިބަތު” ހޯދުމުގެ ދަހިވެތި ހުވަފެނުގައި ހުރި ޚައިދަރަކީ މިއަދު، ހައިބަތާއި ގަދަރުވެރިކަން ގެއްލިފައިވާ އަބުރުވެރިކަން ނެތް “މިސްކީނެ”ކެވެ.
މުއިއްޒުގެ މަޖުބޫރު ކަމުގައި ދޭނެ ޖަވާބެއް ނެތި، “ހަފްތާ ނިމޭ ދުވަހޭ” ކިޔައި މުޅި ރާއްޖެ ކުރިމަތީގައި ލަދުގަންނަން ޖެހޭ ދަރަޖައަށް ޚައިދަރު ވެއްޓުނީވެސް ހަމަ މުއިއްޒުގެ ސަބަބުންނެވެ.
ކިޔަވާފައިވާ އިލްމަކުން ޤައުމަކަށް ޚިދުމަތެއް ކުރަން، ހައުސިންގ މިނިސްޓަރީ އަކުން ފުރުޞަތެއް ނުދިނެވެ. ނަގައި ހަޔާ އެޑިޔުކޭޝަނަށް އެއްލާލީ، “ދެން އިސްތިއުފާ އަމިއްލައަށް ދޭށޭ” ބުނާ ކަހަލަ ގޮތަކަށެވެ. ހަމަ ގައިމުވެސް ރައްޔިތުންނަށް އިހްސާސްވީ އެ މެސެޖެވެ. އިނގިރޭސި ވިލާތުގައި ޚައިދަރު ވަޒީފާއެއްގައި ހުއްޓައި، “މިނިސްޓަރ” ކަމުގެ ފޮނި ހުވަފެން ދައްކައިގެން ގެނެސް އަހަރު ވީތަނާ އޮފް ކެނޑި، ބޭނުން ކެނޑުމުން ދުނިޔޭގެ ލަދަށް ކަނޑާލަން ނުކެރިގެން ހަޔާއެޑިޔުކޭޝަނަށް ކޮފުޖަހައި ހަމަ އަރުވާލީއެވެ. ދުނިޔެއަށްވެސް ހުތުރެވެ. humiliate ކޮށް ނިކަމެތި ކޮށްލި ގޮތުން ރައްޔިތުންވެސް ތިބީ ހަމްދަރުދީ ހީވެފައެވެ.
ދެންހުރީ މާރިޔާއެވެ. މާރިޔާ ކިޔެވީ ކިޔަވާ ދިނުމުގެ ރޮނގުންނެވެ. ހަޔާ އެޑިޔުކޭޝަން މިނިސްޓްރީ އިން ޑިމޯޓް ކޯށްލީ ޖަނަވާރާއި ދަނޑުވެރިކަމާއި ބެހޭ މިނިސްޓްރީއަކަށެވެ. އަންހެނަކަށްވީމާ، ކެބިނެޓުން ދެވެން އޮތް އެންމެ ދަށް ޕޯޓްފޯލިޔޯ ދީ ލަދު ގަންނަވާލީމާ، ހިތަށްވީތަދުން، އަނީސާ އަހްމަދާއި، ރާއްޖޭގެ ކަންވޮށިގެންވާ އަންހެން ކަނބަލުން މާރިޔާގެ ދިފާއުގައި ހަމްދަރުދީވެގެން ތެދުވިއެވެ.
މާރިޔާ ޖަނަވާރާއި ބެހޭ މިނިސްޓްރީގައި ކުރާނީ ކޮންކަމެއްތޯއެވެ. މާރިޔާވެސް އަމިއްލަ ނަފްސާއި އެސުވާލު ކުރައްވާނެއެވެ. އޮތީ ހަމަ އެންމެ ދަހިވެތި ކަމެކެވެ. “މިނިސްޓަރު” ކަމުގެ ލަގަބުގެ ދަހިވެތިކަމެވެ. ރައްޔިތުންގެ ކުރިމަތީ އަގެއް ނެތަސް، ސީވީ އަށް ރީތި ވާނެތާއެވެ.
ޤައުމަށް އިލްމު ހޯދައިގެން އަންނަ ފަރާތްތަކުން އޭނާގެ އަމިއްލަ ނަފްސުގެ މޯރަލް އަދި އަޚްލާގީ މިންގަނޑެއް ބަހައްޓަން ޖެހެއެވެ. ރައްޔިތުން ކުރިމަތީ ތިވަރަށް ބަރަހަނާ ކޮށްލީމާ އައުރަ ނިވާ ނުވާހާލު ފޮށާކޮޅެއް އަނދަގެން ތިޔަހެން ފޫގަޅާލައިގެން މިނިސްޓަރު ކަމުގައި އިނީމާ އަމިއްލަ ނަފްސަށް އެދެވެނީ ފަޟީޙަތާއި އަނިޔާ ނޫން ކޯއްޗެއްތޯއެވެ؟ ޑރ. މާރިޔާ އާއި، ޑރ. ޚައިދަރަކީ ތި ހާލުގައި އުޅަންޖެހޭ ވަރުގެ ނިކަމެތި ބައެއް ތޯއެވެ؟
އަޅުގަނޑުމެން ރައްޔިތުން މިތިބީ ލަދުން ލޯހުޅުވާލަން ނުކެރިފައެވެ.