ބަންގްލަދޭޝްގައި މަނީ ލޯންޑްރިންގ މައްސަލައެއް ތަހުގީގުކުރަން ފަށާފައިވަނިކޮށް، އިނގިރޭސިވިލާތުގެ ޓްރެޒަރީ މިނިސްޓަރު ޓިއުލިޕް ސިއްދީގު އިސްތިއުފާ ދެއްވައިފިއެވެ. މި މައްސަލައިގައި ޓިއުލިޕްގެ މަންމައާއި، ކޮއްކޮ އަދި ބޭބެއަށްވެސް ތުހުމަތުތަކެއް ކުރެވެއެވެ.
ޓިއުލިޕް ވިދާޅުވީ މަޤާމުގައި ދެމިހުރެއްޖެނަމަ ތަހުގީގަށް ހުރަސްތަކެއް ކުރިމަތިވެދާނެތީ އާއި، އިނގިރޭސި ސަރުކާރާއި ބަންގްލަދޭޝް ސަރުކާރާ ދެމެދު ކުރެވޭ މުއާމަލާތްތަކަށް އަސަރުކޮށްފާނެތީ އިސްތިއުފާ ދެއްވީކަމަށެވެ. އަދި ޝަރުއީ ދާއިރާއިން ސުވާލުކޮށްފިނަމަ އެއްވެސް އޮޅުވާލުމެއްނެތި މައުލޫމާތު ދެއްވާނެ ކަމަށްވެސް ވިދާޅުވިއެވެ.
އިނގިރޭސި ރައްޔިތެއް ކަމުގައިވީ ނަމަވެސް، ޓިއުލިޕްގެ އާއިލާ ނިސްބަތްވަނީ ބަންގްލަދޭޝްއަށެވެ. ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާއަކީ އޭނާގެ ބޮޑުދައިތައެވެ. މި މައްސަލައިގައި ބަންގްލަދޭޝްގެ އެންޓި ކޮރަޕްޝަން ކޮމެޓީން ތުހުމަތުކުރަނީ ހަސީނާގެ ވެރިކަމުގައި ބޭރު ގައުމުތަކުން އިންވެސްޓްކުރަން ހުށަހެޅި ފައިސާތަކެއް ހަސީނާގެ އާއިލާއިން ނަހަމަ ގޮތުގައި ބޭނުންކޮށްފައިވާ ކަމަށެވެ.
އިސްތިއުފާ ދެއްވި ނޯޓުގައި ޓިއުލިޕް ވިދާޅުވެފައިވަނީ ވަޒީރުގެ މަގާމުގައި ހުންނަވައި އެއްވެސް މަނާކަމެއް ކުރައްވާފައިނުވާނެ ކަމަށާއި، އެފަދަ ތުހުމަތެއް އަޅުވާފައިވާނަމަ އެކަން ސާބިތުކުރެވޭނެ އެއްވެސް ހެއްކެއް ނޯންނާނެ ކަމަށެވެ.