ގއ. ކަނޑުހުޅުދޫއަށް ނިސްބަތްވާ ފުލުސް އޮފިސަރަކާއި އޭނާގެ ދަރިފުޅާ ބައްދަލުކޮށްދީފައި ވަނީ އުސޫލާ އެއްގޮތަށް ކަމަށް ފުލުހުން ބުނެފިއެވެ.
މިއަދު ރައީސް ޑރ. މުހައްމަދު މުއިއްޒު ކަނޑުހުޅުދޫއަށް ވަޑައިގަތުމުން 3 އަހަރުގެ ކުއްޖަކު ވަނީ އެކުއްޖާގެ ބައްޕަ މިސްވާ ކަމަށް ލިޔެފައިވާ ނޯޓުކޮޅެއް ރައީސްއަށް ދީފައެވެ. އަދި ރައީސް ވަނީ އެކުއްޖާއާ ފުލުހެއްގެ ގޮތުގައި ކައިރި ރަށެއްގައި މަސައްކަތް ކުރަމުންދިޔަ އެ ކުއްޖާގެ ބައްޕައާ ބައްދަލުކުރުމުގެ ފުރުސަތު ފަހިކޮށްދެއްވާފައެވެ.
މި ހާދިސާއާ ގުޅިގެން ފުލުހުންގެ ތަރުޖަމާނު ވިދާޅުވީ މިކަން ހިނގާފައިވާ ގޮތަކީ ތުއްތު ކުއްޖާ ރައީސް މުއިއްޒުގެ އަތްޕުޅަށް ދިން ގަނޑުކޮޅެއްގައި އެކުއްޖާ ބައްޕަ މަތިން ހަނދާން ވާކަމަށް ލިޔެފައިވާ ކަމަށެވެ.
އެ ކުއްޖާއަށް 1 އަހަރުން ފެށިގެން ބައްޕަ އުޅެނީ ރަށުން ބޭރުގައި ކަމަށް ވުމުން، ރައީސް ބޭނުންފުޅުވީ ރައީސް އެ ރަށުން ފުރާވަޑައިގަތުމުގެ ކުރިން ވާން އޮތް ކަމެއްނަމަ ބައްޕަ އާއި ކުއްޖާއާ ބައްދަލުވާނެ ފުރުސަތު އޮތްތޯ ބެއްލެވުމަށް ކަމަށް ވެސް ފުލުހުންގެ ތަރުޖަމާނު ވަނީ ވިދާޅުވެފައެވެ.
އެގޮތުން ތުއްތު ކުއްޖާގެ ބައްޕަ ހުރީ ކައިރި ރަށެއްގެ ޕޮލިސް ސްޓޭޝަނެއްގައިކަމުން އެވަގުތަށް އެކަން ފުލުހުންގެ މުއައްސަސާއިން ހަމަޖައްސައިދީފައިވާ ކަމަށެވެ. އަދި މިކަމުގައި، ފުލުހުންގެ ހިދުމަތުގެ މުވައްޒަފުންނާމެދު އަމަލުކުރަމުންދާ އުސޫލުތަކާއި ތަފާތު ގޮތަކަށް އަމަލުކޮށްފައި ނުވާނެ ކަމަށް ވެސް އޭނާ ވަނީ ވިދާޅުވެފައެވެ.