"ގާނޫނުއަސާސީގެ ދިފާއު" ގައި މިމަހުގެ 31 ވަނަ ދުވަހު މަގުމައްޗަށް ނިކުންނަން އިދިކޮޅު މައި ޕާޓީ، އެމްޑީޕީގެ ގައުމީ މަޖިލީހުން ފާސްކޮށްފި އެވެ.
އެމްޑީޕީ އިން ރޭ ބޭއްވި އެ ޕާޓީގެ ގައުމީ މަޖިލީހުގެ ބައްދަލުވުމުގައި ގާނޫނުއަސާސީގެ ދިފާއުގައި މަގުމައްޗަށް ނިކުންނަން ހުށަހެޅީ ރިޔާސަތުންނެވެ. މި ހުށަހެޅުމަށް އެއްވެސް މެންބަރަކު އިއުތިރާޒު ކޮށްފައެއް ނުވެއެވެ.
މިއީ ރައީސް ޑރ މުޙައްމަދު މުޢިއްޒު ވެރިކަމާ ހަވާލުވެވަޑައިގެންވި ފަހުން، އިދިކޮޅު އެމްޑީޕީން ބޮޑު ހަރަކާތެއްގެ ގޮތަށް މަގުމައްޗަށް ނުކުތުމަށް ފާސްކުރި ފުރަތަމަ ފަހަރެވެ. 
Advertisement
މިދިޔަ އަހަރުގެ ޑިސެމްބަރު މަހުގައިވެސް އެމްޑީޕީން ވަނީ "ގާނޫނުއަސާސީގެ ދިފާއުގައި" ނަމުގައި ޖަލްސާއެއް ބާއްވާފައެވެ.
މި ޖަލްސާގައި ވަނީ ޤާނޫނުއަސާސީ އަށް ގެނެސްފައިވާ ބަދަލު ބާތިލް ކުރުމަށާއި، ރައްޔިތުންގެ ބާރުވެރިކަން ހިނގައިދާނެ އެއްވެސް ކަމެއް ނުކުރުމަށް މަޖިލީހަށާއި، ރައީސް މުއިއްޒަށް އަންގައި އަމުރުކޮށް ޕެޓިޝަނެއް ހުށަހަޅައި އެ ފާސްވެސް ކޮށްފައެވެ.