ރާއްޖޭގެ ރަށްތަކުގައިދޭ ކަރަންޓް ޔުނިޓެއްގެ އަގު މޯލްޑިވިއަން ޑިމޮކްރެޓިކް ޕާޓީގެ ވެރިކަމެއްގައި ދެރުފިޔާ ބަޔަށް ދަށް ކުރާނެ ކަމަށް އެޕާޓީގެ ރިޔާސީ ކެންޑިޑޭޓް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މޯލްޑިވްސް ނެޝަނަލް ޔުނިވަސިޓީ އާއި މޯލްޑިވްސް ބްރޯޑްކާސްޓިން ކޯޕަރޭޝަން (އެމްބީސީ)ގެ ޓީވީ މޯލްޑިވްސް ގުޅިގެން މިރޭ ގެނެސްދިން "ރިޔާސީ ކެންޑިޑޭޓުންގެ ބަހުސް"ގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ކަރަންޓްގެ އަގު ހެޔޮކުރާނީ އިއާދަކުރަނިވި ހަކަތަ އުފައްދައިގެން ކަމަށެވެ.
"މިއަދު ވެސް ރާއްޖޭގެ ކިތަންމެ ރަށެއްގައި މިމަޝްރޫއުތައް، މިމަސައްކަތްތައް ހިނގަމުން އެބަދޭ، އަޅުގަނޑުމެންގެ ފުރަތަމަ ދެ އަހަރު ދުވަހުގެ ތެރޭގައި، އިރާދަކުރެއްވިއްޔާ ހަތް ރުފިޔާ އަށް ކަރަންޓް ޔުނިޓެއް ހިންގޭ ހުރިހާ ރަށެއް، އޭގެ ތެރޭގައި އަޅުގަނޑު ހަނދާންވާ ގޮތުގައި 21 ރަށް އެބަ އޮތް، އެރަށްތަކުގެ ކަރަންޓް އުފެއްދުން އަޅުގަނޑުމެން ބަދަލު ކުރާނެ ދެރުފިޔާ ބަޔަށް،" ނަޝީދު ވިދާޅުވި އެވެ.
މިރޭގެ ބަހުސްގައި ތައުލީމީ ސިޔާސަތާ ބެހޭ ގޮތުން ކުރި ސުވާލަށް ޖަވާބު ދެއްވަމުން ނަޝީދު ވިދާޅުވީ އެރަށެއްގައި ކިޔަވައި ދެއްވަނީ އެ ރަށެއްގެ ޓީޗަރުންނަށް ހަދަން ޖެހޭ ކަމަށާއި މަތީ ތައުލީމަށް 500 މިލިޔަން ރުފިޔާގެ ލޯނު އެހީ، އެމަނިކުފާނުގެ ސަރުކާރަކުން ހަމަޖައްސާނެ ކަމަށެވެ. އަދި ވިދާޅުވީ ރާއްޖޭގެ ތައުލީމު ކުރިން ހުރި ވަރަށް ވުރެ މާ މައްޗަށް ގެންދަވާނެ ކަމަށެވެ.
ޓީޗަރުންގެ ފެންވަރު ރަނގަޅު ކުރުމަށް ޓަކައި އެމްޑީޕީގެ ސަރުކާރަކުން ކުރާނެ ކަމެއް ކަމަށް ނަޝީދު ވިދާޅުވީ ޓީޗަރުންގެ ދިރިއުޅުމުގެ ފެންވަރު މަތި ކުރުން ކަމަށެވެ. ވިދާޅުވީ ޓީޗަރުންނަށް ރަނގަޅު ދިރިއުޅުމެއް ލިބިގެން ނޫނީ ނަތީޖާއަށް ގެންނަން ބޭނުންވާ ބަދަލު ނުގެނެވޭނެ ކަމަށެވެ.
"އަޅުގަނޑުމެންގެ ތިން އަހަރު ދުވަހުގެ ތެރޭގައި ވާނީ މުދައްރިދުންގެ ފްލެޓެއް މާލޭގައި ބިނާކުރެވިފައި، އަދި އަޅުގަނޑުމެންގެ ޕްރޮގްރާމްތައް އިރާދަކުރެއްވިއްޔާ ރާއްޖޭގެ ރަށްތަކުގައި ވެސް ކުރިއަށް ގެންދެވޭނެ. ޓީޗަރުންނަށް ރަނގަޅު ގޮތުގައި ދިރިއުޅެވިގެން އަދި ތާހިރު ދިރިއުޅުމެއް ޓީޗަރުންނަށް ލިބިގެން ނޫނިއްޔަކާއެއް، އަޅުގަނޑުމެން މިއެދޭ ދަރިވަރުންނެއް އަޅުގަނޑުމެންނަކަށް ނުހޯދޭނެ އަދި އަޅުގަނޑުމެން ނަތީޖާއަށް މިގެންނަން ބޭނުންވާ ބަދަލު ވެސް އަޅުގަނޑުމެންނަކަށް ނުގެނެވޭނެ،" ނަޝީދު ވިދާޅުވި އެވެ.
ރާއްޖޭގެ އިގުތިސާދު ރަނގަޅު ކުރުމަށް ކުރައްވާނެ ކަންތައްތަކެއް ކަމަށް ރައީސް ނަޝީދު ވިދާޅުވީ ވަޒީފާގެ ފުރުސަތު އިތުރުކުރުމާއި ދަރަނި ކުޑަކުރުން ކަމަށެވެ. އެގޮތުން ވަޒީފާގެ ފުރުސަތު އިތުރު ކުރުމަށް ޓަކައި ގެސްޓްހައުސް ވިޔަފާރި އާއި އެގްރި ވިޔަފާރިއާ ފުޅާ ކުރައްވާނެ ކަމަށް ވިދާޅުވި އެވެ.
މިރޭގެ ބަހުސްގައި ހުރިހާ ދާއިރާ އަކުން ކުރި ސުވާލުތަކަށް ވެސް ނަޝީދު ޖަވާބު ދެއްވީ އެމްޑީޕީން މިހާރު އާއްމުކޮށްފައިވާ އެ ޕާޓީގެ ދެ ވަނަ މެނިފެސްޓޯގައިވާ ކަންތައްތަކަށް ރިއާޔަތް ކުރައްވައިގެންނެވެ.