ރ. އަތޮޅު އަލިފުށިން ކަރަންޓު ކެނޑޭ މައްސަލައާއި ގުޅިގެން އެރަށު ރައްޔިތުން އިހުތިޖާޖު ކޮށްފިއެވެ.
ސީއެންއެމްއަށް މައުލޫމާތު ދެމުން އެރަށު މީހަކު ބުނީ ރަށު ރައްޔިތުން ނުކުމެ މުޒާހަރާ ކޮށްފައިވަނީ މިއަދު ހެނދުނު 10:30 ހާއިރު އެރަށުން ކަރަންޓު ކެނޑުނު ގޮތަށް އަދިވެސް ކަރަންޓު ލިބިފައިނުވާތީ އެކަމާއި ނުރުހުން ފާޅު ކުރުމުގެ ގޮތުގައި ކަމަށެވެ. އޭނާ ބުނީ މިއަދު ކަރަންޓު ގޮސްފައިވީނަމަވެސް އެރަށަކީ އެގޮތަށް އާންމުކޮށް ކަރަންޓު ކެނޑޭ ރަށެއްނޫން ކަމަށެވެ.
"އާންމު ކޮށް އަލިފުއްޓަކީ ކަރަންޓު ކެނޑޭ ރަށެއް ނޫން. ރައްޔިތުން އިހުތިޖާޖު ކުރަމުން ދިޔައީ އީދު ދުވަހު ކަރަންޓު ކެނޑުމުން،" އެމީހާ ބުންޏެވެ.
އަލިފުށީ އިންޖީނުގޭގައި މަސައްކަތް ކުރާ މީހަކު މައުލޫމާތު ދިން ގޮތުގައި ކަރަންޓު ކެނޑެން މެދުވެރިވި ސަބަބަކީ ޖަނެރޭޓަރުތައް އޯވަހޯލް ނުކޮށް ގިނަސދުވަސް ވުމުންނެވެ. އޭނާ ބުނީ މިހާރު ބޭނުން ކުރަމުންދާ ދެ ޖަނެރޭޓަރުވެސް ހުރީ އޯވަހޯލް ނުކޮށް ކަމަށެވެ.
އަދި އެޖަނެރޭޓަރުތައް ސާވިސް ކުރުމަށް ފެނަކާއިން ޓެކްނިކަލް ޓީމެއް މިހާރު އެރަށަށް އެބަދޭ ކަމަށް އޭނާ ބުންޏެވެ. އޭނާ ބުނީ އިއްޔެ ވެސް އެރަށުން ކަރަންޓު ކެންޑުނު ކަމަށެވެ. އަދި އިއްޔެ އެކަމަށް ވަގުތީ ހައްލެއް ގެނެސް ކަރަންޓުގެ ހިދުމަތް އިއްޔެ ހަވީރުން ފެށިގެން މިއަދު ހެނދުނާއި ހަމައަށް ދެމުން އައި ކަމަށްވެސް އޭނާ ބުންޏެވެ.
އޭގެ އިތުރުން އެރަށުން ވާހަކަ ދެއްކި މީހާ ބުނީ އެމައްސަލަތައް ދިމާވާން ފެށީ ޔުޓިލިޓީސް ތަކާއި އެރަށު އިންޖީނުގެ ހަވާލު ކުރުމުން ކަމަށެވެ.