މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) އާއި ޖުމްހޫރީ ޕާޓީގެ ލީޑަރު ގާސިމް އިބްރާހިމް ރޭ ކުއްލި ގޮތަކަށް ބައްދަލުކުރައްވައިފިއެވެ.
އެނގިފައިވާ ގޮތުގައި މި ބައްދަލުވުން އޮތީ ރޭ 11:00 ޖަހާކަންހާއިރު، ދިޓީވީގެ އިމާރާތާ އިންވެގެން ހުންނަ އުއްޗު ދިރިއުޅުއްވާ އެޕާޓްމަންޓުގައިއެވެ.
ގާސިމްގެ ދައުވަތަކަށް ބޭއްވި މި ބައްދަލުވުމުގައި ރާއްޖޭގެ ސިޔާސީ މަޝްރަހާ ގުޅޭ ގޮތުން މަޝްވަރާ ކުރައްވާފައިވެއެވެ. އަދި ޒަމާނުއްސުރެ ދެބޭފުޅުންގެ މެދުގައި އޮތް ގާތް ގުޅުމުގެ މައްޗަށް އަލިއަޅުއްވާލައްވައި ވާހަކަދެއްކެވިއެވެ.
ދެގަޑިއިރެއްހާއިރަށް ކުރިއަށް ގެންދިޔަ ބައްދަލުވުމުގައި ދިޓީވީގެ ސީއީއޯ މިދުހަތު އާދަމްގެ 44 ވަނަ އުފަންދުވަސް ފާހަގަ ކުރުމުގެ ގޮތުން ކޭކެއް ފެޅުމުގެ ކުޑަ ރަސްމިއްޔާތެއްގައި ވެސް ގާސިމް ބައިވެރިވެ ވަޑައިގެންނެވިއެވެ.
ގާސިމާއި އުއްޗު ބައްދަލުކުރެއްވިއިރު، އެންމެ ފަހުގެ ރިޔާސީ އިންތިޚާބުގައި ގާސިމް ވާދަކުރެއްވިއިރު، އުއްޗު ވަނީ ފައިސާގެ ވަރަށް ބޮޑެތި އެހީތަކެއް ގާސިމަށް ދެއްވާފައެވެ. އަދި ރައީސް ޔާމީންގެ ސަރުކާރަށް ވެސް ތަފާތު އެހީތަކެއް އުއްޗު ދަނީ ވެދެމުންނެވެ.