މައުމޫން ފައުންޑޭޝަން އިތުރަށް ތަރައްގީކޮށް ހަރުދަނާކުރުމަށްޓަކައި ބޭރުގެ އެކި ފަރާތްތަކުން އެހީ ހޯދުމަށް މަސައްކަތްކުރައްވަމުން ގެންދަވާ ކަމަށާއި ނަމަވެސް އެކަން ކުރެވެން އޮތީ ސަރުކާރުގެ ކަމާ ބެހޭ ފަރާތްތަކުން ލިބެންޖެހޭ ހުއްދަތައް ލިބިގެން ކަމަށް، އެ ފައުންޑޭޝަންގެ ޗެއާމަން އަދި ކުރީގެ ރައީސުލްޖުމްހޫރިއްޔާ އަލްއުސްތާޒް މައުމޫން އަބްދުލް ގައްޔޫމް ވިދާޅުވެއްޖެ އެވެ.
މެޕްސް ކޮލެޖްގައި މިރޭ ބޭއްވި މައުމޫން ފައުންޑޭޝަންގެ އަހަރީ ޖަލްސާގައި ވާހަކަފުޅު ދައްކަވަމުން ރައީސް މައުމޫން ވިދާޅުވީ އެ ފައުންޑޭޝަން އިތުރަށް ތަރައްގީކުރުމަށްޓަކައި މިދިޔަ އަހަރުގެ ތެރޭގައި ބޭރުގެ ބައެއް ގައުމުތަކަށް ކުރެއްވި ދަތުރުފުޅުތަކުގައި ބޭރުގެ އެކިއެކި ފަރާތްތަކާ ބައްދަލުކޮށް އެހީ ހޯއްދެވުމުގެ ކަންތައް ކުރައްވާފައިވާނެ ކަމަށެވެ. ނަމަވެސް ބޭރުގެ އެހީ ހޯދޭނީ ސަރުކާރުގެ ކަމާ ބެހޭ ފަރާތްތަކުން ހޯދަންޖެހޭ ހުއްދަތައް ލިބުމުން ކަމަށްވާތީ، ސަރުކާރުގެ ކަމާ ބެހޭ ފަރާތްތަކުގައި ދަންނަވައިގެން އެ ހުއްދަތައް ހޯދުމުގެ މަސައްކަތް ކުރައްވަމުން ގެންދަވާ ކަމަށް ވެސް އެ މަނިކުފާނު ވިދާޅުވި އެވެ.
ރައީސް މައުމޫން ވިދާޅުވީ ވެއަތުވެ ދިޔަ އަހަރުގެ ތެރޭގައި ފައުންޑޭޝަނުން ވަރަށް ގިނަ ކަންތަކެއް ރޭވި އޭގެ ތެރެއިން ބައެއް ކަންތައް ކުރެވިފައިވާ ކަމަށެވެ. ނަމަވެސް ވަސީލަތްތައް ހުރި ގޮތުން އުންމީދު ކުރި ހުރިހާ ކަމެއް ނުކުރެވުނު ކަމަށް ވެސް އެ މަނިކުފާނު ވިދާޅުވި އެވެ.
ރައީސް މައުމޫން ވިދާޅުވި ގޮތުގައި ވެއަތުވެ ދިޔަ އަހަރުގެ ތެރޭގައި އެ ފައުންޑޭޝަނުން ކުރެވުނު އެންމެ ކާމިޔާބު ކަމަކީ، ނާސިންގެ ރޮނގުން ފުރަތަމަ ޑިގްރީ އަށް ކިޔެވުމަށް ދެ ދަރިވަރަކާއި ފިޒިއޯތެރަޕީގެ ރޮނގުން ފުރަތަމަ ޑިގްރީ އަށް ކިޔެވުމަށް އިންޑިއާގެ ގާޑަން ސިޓީ ކޮލެޖަށް ދެ ދަރިވަރަކު ފޮނުވުމެވެ. އެ ހަތަރު ސްކޮލަޝިޕަކީ ފައުންޑޭޝަންގެ ބޯޑް އޮފް ޓްރަސްޓީގައި ހިމެނޭ އިންޑިއާގެ ގާޑަން ސިޓީ ކޮލެޖްގެ ޗެއާމަން އަދި ބެންގަލޫރުގައި ހުންނަވާ ދިވެހި ރާއްޖޭގެ އޮނަރަރީ ކައުންސެލް ޑރ. ޖޯސެފް ވީ ޖޯޖް ދެއްވި ފުލް ސްކޮލަޝިޕެއް ކަމަށް ވެސް ރައީސް މައުމޫން ވިދާޅުވި އެވެ. އަދި މި އަހަރު ވެސް އިތުރު ސްކޮލަޝިޕް ދެއްވާނެ ކަމަށް އޭނާ ވިދާޅުވެފައިވާ ކަމަށް ވެސް އެ މަނިކުފާނު ވިދާޅުވި އެވެ.
އޭގެ އިތުރުން ރައްޔިތުންގެ ހިތްތަކުގައި ދީނީ ހޭލުންތެރިކަން އިތުރުކޮށް ދީނީ ލޯބި އިތުރުކުރުމުގެ ގޮތުން ތަފާތު ދީނީ ޕްރޮގްރާމްތައް ހިންގުމާއި ޖަލްސާތައް ބޭއްވުމާއި ގުރްއާން ކްލާސްތަކަށް ޚަތިމު ހަދިޔާކުރުން ވެސް އެ ފައުންޑޭޝަނުން މިދިޔަ އަހަރު ހާސިލްކުރި ކާމިޔާބީތަކުގެ ތެރޭގައި ހިމެނޭ ކަމަށް ވެސް ރައީސް މައުމޫން ވިދާޅުވި އެވެ.
ރައީސް މައުމޫން ވިދާޅުވީ ވެއަތުވެ ދިޔަ އަހަރު ފައުންޑޭޝަންގެ ކަންތައް ހިންގުމުގައި ސަރުކާރުގެ އިދާރާތަކުގެ ތެރެއިން ހާއްސަ ގޮތެއްގައި އިސްލާމިކް މިނިސްޓްރީންނާއި ހޯމް މިނިސްޓްރީން ވަރަށް ބޮޑު އެއްބާރުލުމެއް ދިން ކަމަށެވެ.
މައުމޫން ފައުންޑޭޝަންގެ އަހަރީ ޖަލްސާ ދެ ދަންފަޅިއަކަށް ބަހާލައިގެން ކުރިއަށް ގެންދިޔަ އިރު، މިދިޔަ އަހަރު ފައުންޑޭޝަން ހިނގައި ދިޔަ ގޮތުގެ އަހަރީ ރިޕޯޓާއި މާލީ ރިޕޯޓް ފާސްކުރި އެވެ. އަދި އެ ފައުންޑޭޝަންގެ ހިންގާ ކޮމިޓީން ހުސްވެފައިވާ ދެ މަގާމަށް މެމްބަރުން އިންތިހާބުކުރި އެވެ.
އެ ފައުންޑޭޝަންގެ ސެކްރެޓަރީ ޖެެނެރަލްގެ މަގާމުގައި ހުންނެވި މުހައްމަދު ހުސައިން ޝަރީފް މިރޭގެ ޖަލްސާ އަށް ފަހު އިސްތިއުފާ ދެއްވާފައިވާތީ އެ މަގާމަށް އިންތިހާބުކުރީ، ކުރީގެ މިނިސްޓަރު އައްބާސް އިބްރާހީމެވެ. އަދި ފައުންޑޭޝަންގެ ސެކްރެޓަރީގެ މަގާމުގައި ހުންނެވި އައްބާސް ޝަރީފް ވެސް މިދިޔަ އަހަރުގެ ތެރޭގައި އިސްތިއުފާ ދެއްވާފައިވާތީ އެ މަގާމަށް އިންތިހާބުކުރީ މުހައްމަދު އިބްގާލް، މ. އެރޯވިލާ އެވެ.
ވެއަތުވެ ދިޔަ އަހަރު ފައުންޑޭޝަންގެ މާލީ ރިޕޯޓް ހުށަހަޅުއްވަމުން ސެކްރެޓަރީ ޖެނެރަލް މުހައްމަދު ހުސައިން ޝަރީފް ވިދާޅުވީ އަހަރުގެ ތެރޭގައި ފައުންޑޭޝަނަށް ލިބުނު ޖުމްލަ އާމްދަނީގެ މިންވަރަކީ 71،463.58 5ރ. ކަމަށާއި އަހަރުގެ ތެރޭގައި ހަރަދުކުރެވުނީ 58،208.75 4ރ. ކަމަށެވެ. އަދި އަހަރު ނިމުނު އިރު ފައުންޑޭޝަންގެ ބަޖެޓްގައި 13،254.83 1ރ. ބާކީ ހުރި ކަމަށް ވެސް އޭނާ ވިދާޅުވި އެވެ.
ޖެނުއަރީ ،26 2010 ގައި އުފެއްދި މައުމޫން ފައުންޑޭޝަންގައި މިހާތަނަށް 56 މެންބަރުން ތިބި އިރު މިރޭގެ ޖަލްސާ އަށް ހާޒިރުވީ 29 މެމްބަރުންނެވެ.