ދިވެހިރާއްޖޭގެ ރައްޔިތުންގެ ބޭނުންތައް ފުއްދައިދިނުމަށްޓަކައި ދުނިޔޭގެ ސަފަށް އަރައި އެހެން ގައުމުތަކާއި އެއްހަމައެއްގައި އިންވެސްޓްމަންޓްގެ ފުރުޞަތުތައް ހުޅުވާލަން ޖެހޭކަމަށް ޖުމްހޫރީ ޕާޓީގެ ލީޑަރު، މާމިނގިލީ ދާއިރާގެ މެންބަރު ގާސިމް އިބްރާހީމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ ރޭގެ ޖަލްސާގައި ވާހަކަފުޅު ދައްކަވަމުން ގާސިމް ވިދާޅުވީ، ގާނޫނު އަސާސީއަށް ގެންނަ އިޞްލާޙެއް ނުވަތަ ގާނޫނު އަސާސީއަށް ބާބެއް އިތުރުކުރުމުގެ ވާހަކަ ދައްކާއިރު މިއަދުގެ ލާމެހިފައިވާ ދުނިޔޭގައި މި ބާވަތުގެ މަސައްކަތްތަކަކީ ކުރަންޖެހިފައިވާ ކަމެއް ކަމަށެވެ.
ގާސިމް ވިދާޅުވީ، މިއަދު ރާއްޖޭގެ އިޤްތިޞާދީ އަދި އިޖްތިމާޢީ ކަންތައްތައް ކުރިއެރުވުމަށްޓަކައި އަޅުގަނޑުމެން ވެސް ދުނިޔޭގެ އެހެން ގައުމުތަކެކޭ އެއްފަދައިން މިވަނީ ނުހަނު ބޮޑަށް އަޅުގަނޑުމެންގެ ތެރެއަށް ބޮޑެތި ޕްރޮޖެކްޓުތައް ގެނެސް، ތަރައްގީ ކުރިއެރުވުމަށްޓަކައި މަސައްކަތްތަކެއް ކުރަންޖެހިފައި ކަމަށެވެ. އެހެންވީމާ، އެގޮތަށް ބަލާއިރު، ބިލުގައި ފާހަގަކުރެވިފައިވާ ކަންތައްތައް ކުރިއަށް ގެންގޮސްގެން ރާއްޖޭގެ އިޤްތިޞާދާއި އިޖްތިމާޢީ ހާލަތު ރަނގަޅުކޮށް، ކުރިއަށް ގެންދިއުމަކީ ވަރަށް މުހިއްމު ކަމެއް ކަމަށް ރޭގެ ޖަލްސާގައި ވާހަކަފުޅު ދައްކަވަމުން ގާސިމް ވިދާޅުވި އެވެ.
"ހަމައެހެންމެ، ބިލުގައި ކަނޑައަޅާފައި ވަނީ ރައްޔިތުންގެ މަޖިލީހުން ފާސްކުރާ ގާނޫނަކުން ހުއްދަކުރެވިގެން ހިންގޭ ޕްރޮޖެކްޓުތަކުގެ ވާހަކަ. އަޅުގަނޑަށް ވިސްނޭ ގޮތުގައި ރައްޔިތުންގެ މަޖިލީހަށް ނިންމޭނެ އެގޮތަށް. އެހެންވީމާ، ރައްޔިތުންގެ މަޖިލީހުން ނިންމައިގެން ކުރާ ކަންތައްތަކެއް ކުރުމަށްޓަކައި އެހުއްދަ ނުދޭންވީ ސަބަބެއް ނުވަތަ ގާނޫނު އަސާސީއަށް މި ބާބު އިތުރު ނުކުރަންވީ ސަބަބެއް އަޅުގަނޑަކަށް ނުވިސްނޭ." ރޭގެ ޖަލްސާގައި ވާހަކަފުޅު ދައްކަވަމުން ގާސިމް ވިދާޅުވި އެވެ.
ގާސިމް އިބްރާހިމް ވިދާޅުވީ ގާނޫނު އަސާސީ ބަދަލުކުރުމުގެ ބާރުވެސް މަޖިލީހަށް އޮތްއިރު، ރައްޔިތުންގެ މަޖިލީހުން އެބިލު ފާސްކުރަން ޖެހޭކަމަށް ގަބޫލުފުޅު ކުރައްވަވާ ކަމަށެވެ. "މިއާ ގުޅިގެން 1 ބިލިއަން ޑޮލަރު އިންވެސްޓް ކުރީމާ އޭގެ ނަތީޖާއަކަށް ވެގެންދަނީ ވަރަށް ބައިވަރު ގިނަ ވަޒީފާތައް އުފެދުމާއި، ވަރަށް ޒަމާނާ އެކަށީގެންވާ އަޅުގަނޑުމެންނަށް ނުފެންނަ އެތައް ބައިވަރު ކަންތައްތަކެއް ތަޢާރުފުވެގެން ދިއުމާއި، ރާއްޖޭގެ މީހުންގެ މުސާރަތަކާ އެއްޗެހި އަޅުގަނޑުމެން ހީކުރާ ވަރަށްވުރެ މައްޗަށް އުފުލިގެން ދިއުމާއި، ރާއްޖޭގެ ރައްޔިތުންގެ ތަނަވަސްކަން ވަރަށް ބޮޑުތަން އިތުރުވެގެންދިއުން." ގާސިމް ވިދާޅުވި އެވެ.
ގާސިމް ވިދާޅުވީ ބިލުގައި ކަނޑައަޅާފައި އޮތް ގޮތުން 70 އިންސައްތަ ބިމަކީ ހިއްކަންޖެހޭ ބިން ކަމަށްވުމުން އޭގެެ މާނައަކީ ދެފަޅެއްގައި އޮތް ރަށެއް ހިމެނިފައި އޮތްކަމުގައި ވީނަމަވެސްް އެއީ ހަތަރު ސްކެއަރ ކިލޯމީޓަރު ކަމަށެވެ.
ރޭގެ ޖަލްސާގައި ވާހަކަފުޅު ދައްކަވަމުން ގާސިމް އިބްރާހިމް ވަނީ، މުޅި ރާއްޖޭގެ ނިސްބަތުން އެތައް ޕްރޮޖެކްޓުތަކަކަށް ބަހާލައިގެން ބިން ދިންކަމުގައި ވިޔަސް ރާއްޖޭގައި މިހާރު ހިކިފައިވާ ބިމުގެ 10 އިންސައްތައަށް ވުރެ ބޮޑުނުވާކަން ފާހަގަކުރައްވާފަ އެވެ.