ގާނޫނު އަސާސީގެ ދިފާއުގައި އެމްޑީޕީން ބޮޑު ޖަލްސާއެއް މާލޭގައި ބޭއްވުމަށް ނިންމައިފި އެވެ.
"ގާނޫނުއަސާސީގެ ދިފާއުގައި ރައްޔިތުންގެ" ނަމުގައި ބާއްވާ މި ޖަލްސާ އޮންނާނީ އަންނަ މަހުގެ 10 ވަނަ ދުވަހު ކާނިވާ ސަރަހައްދުގަ އެވެ.
މިއީ ގިނަ ބަޔަކު ބުރަ މަސައްކަތުން ހޯދި ގާނޫނު އަސާސީ އަށް އެއްވެސް ބެލުމެއް އަދި ރައްޔިތުން ކައިރިން އަހާލުމެއް ވެސް ނެތި ބަދަލުތައް ގެންނާތީ އާއި ފަރުދީ އަދި އަސާސީ މިނިވަންކަން ސަރުކާރުން ނިގުޅައިގަންނަމުންދާތީ އެކަމާ ދެކޮޅަށް އަޑު އުފުލުމަށް ބާއްވާ ޖަލްސާއެއް ކަމަށް އެމްޑީޕީން ބުނެ އެވެ.
މި ޖަލްސާގައި ބައިވެރިވުމަށް ރާއްޖޭގެ ހުރިހާ ރައްޔިތުންނަށް އެމްޑީޕީން ވަނީ ދައުވަތު ދީފަ އެވެ.
"ގާނޫނުއަސާސީގެ ދިފާއު" ގެ ނަމުގައި އެމްޑީޕީން ޖަލްސާއެއް މި ބާއްވަނީ މި ސަރުކާރުން ގާނޫނުއަސާސީ އަށް މިދިޔަ ހަފްތާ ތެރޭގައި ގެނައި ކުއްލި އަވަސް އިސްލާހުތަކާ ގުޅިގެން ގިނަ ބަޔަކު ކަންބޮޑުވުން ފާޅުކުރަމުން އަންނަ ދަނޑިވަޅެއްގަ އެވެ.