ޕީއެސްއެމް ކުޑަކުދިންގެ ޤުރުއާން ކިޔެވުމުގެ މުބާރާތުގައި ބައިވެރިވުމުގެ ފުރުޞަތު ދެވަނަ ފަހަރަށް ހުޅުވާލައިފިއެވެ.
ދެވަނަ ފުރުޞަތެއް ހުޅުވާލާފައިވަނީ މުބާރާތުގައި ބައިވެރިވުމުގެ ފުރުޞަތު މިއަދަށް ހަމަވިނަމަވެސް މުބާރާތަށް ޚާއްޞަކުރި ޖާގަތައް ސުންގަޑި ހަމަވަމުގެ ކުރިން ހުސްވުމުންނެވެ. އަދި މުބާރާތުގައި ބައިވެރިވުމުގެ ފުރުޞަތަށް އަދިވެސް ގިނަ އަދަދެއްގެ ބެލެނިވެރިން އެދެމުންދާތީއެވެ.
އެހެންކަމުން މި މުބާރާތުގައި ބައިވެރިވުމުގެ 120 ޖާގައަށް އަލުން ފުރުޞަތު ވަނީ ހުޅުވާލާފައެވެ. 120 ޖާގަ ބަހާލެވިފައިވާނީ މުބާރާތް ބޭއްވުމަށް ހަމަޖެހިފައިވާ ދުވަސްތަކުގެ އެކި ގަޑިތަކަށެވެ. އެގޮތުން ޖާގަތައް ހުސްނުވާނަމަ އެ ފުރުޞަތު އަންނަ މަހުގެ 2 ވަނަ ދުވަހާހަމައަށް ހުޅުވާލާފައިވާއިރު ސުންގަޑި ހަމަވުމުގެ ކުރިން ޖާގަތައް ހުސްވެއްޖެނަމަ ފުރުޞަތު ބަންދުވާނެއެވެ.
ޕީއެސްއެމް ކުޑަކުދިންގެ ޤުރުއާން މުބާރާތުގައި ބައިވެރިވުމަށް ހުޅުވާލި ފުރުޞަތުގައި މިހާތަނަށް 1000އަށްވުރެ ގިނަ ކުދިންނަށް ފުރުޞަތު ދީފައިވެއެވެ.
ޕީއެސްއެމް ކުޑަކުދިންގެ ޤުރުއާން ކިޔެވުމުގެ މުބާރާތަކީ ރަމަޟާންމަހަށް ޚާއްސަކޮށްގެން ކުރިއަށްގެންދާ މުބާރާތެކެވެ. މިއަހަރުގެ މުބާރާތުގައިވެސް އޮންނާނީ ހަމައެކަނި ބަލައިގެން ކިޔެވުމުގެބައެވެ. އަދި ރެކޯޑިންތައް ކުރިއަށްގެންދިޔުމަށް ހަމަޖެހިފައިވަނީ ޑިސެމްބަރު 1 އިން ޑިސެމްބަރު 14 ހަމައެކަނި މާލޭގައެވެ.
ޕީއެސްއެމްގެ ޗެނަލްތަކުން އޮންއެއަރ ކުރާނީ 40 ޕޮއިންޓަށްވުރެ މަތިން ލިބޭ ބައިވެރިންގެ ކިޔެވުމެވެ. މިއަހަރުގެ މުބާރާތްވެސް ކުރިއަށް ގެންދާނީ 3 އުމުރުފުރާއަކަށް ބަހާލައިގެންނެވެ. އެއީ 5 އަހަރާއި 7 އަހަރާ ދެމެދުގެ އުމުރު ފުރާއާއި 7 އަހަރާއި 10 އަހަރާ ދެމެދުގެ އުމުރުފުރާގެ އިތުރުން 10 އަހަރާއި 12 އަހަރާ ދެމެދުގެ އުމުރުފުރާއެވެ.
މިއަހަރުގެ މުބާރާތުގައިވެސް ކޮންމެ ޢުމުރުފުރާއަކުން 1 ވަނަ 2 ވަނަ އަދި 3 ވަނަ ހޮވާނެއެވެ. އަދި މުޅި މުބާރާތުން 1 ވަނަ 2 ވަނަ އަދި 3 ވަނަ ހޮވުމަށްވަނީ ހަމަޖެހިފައެވެ.