ނުބައި ހީތަކާއި ޝައްކުތައް އުފައްދުވަނީ ޝައިޠޯނާއެވެ. އެއީ މީސްތަކުންގެ މެދުގައި މައްސަލަތައް ޖައްސުވައި ފިތުނަވެރިކުރުވައިގެން ދިރިއުޅުން ހަލާކުކޮށްލަން ޝައިޠޯނާ ބޭނުންކުރާ ހަތިޔާރެކެވެ. އެކަމަށް އަހުރެމެން އަބަދުވެސް ތިބެންޖެހޭނީ ވަރަށް ފުރިހަމައަށް ތައްޔާރުވެގެންނެވެ. ޢަމަލުތައް ބަހައްޓަންވާނީ ޝައިޠޯނާގެ އެމަޅީގައި ނުޖެހި އުޅެވޭނެ ގޮތަކަށެވެ.  
ފުރަތަމަކަމަކަށް މުސްލިމުންނަކީ އެއްވެސް މީހަކާއިމެދު ޝައްކުކޮށްގެންވާނެ ބައެއް ނޫނެވެ. ޝައްކުކުރުމަކީ ބޮޑުފާފައެކެވެ! ވީމާ ޝައްކުކުރުމަކީ ކުޑަކަމެއް ކަމުގައި ދެކެގެން ނުވާނެއެވެ! އެއްވެސް ބޮޑު ފާފައަކީ ކުޑަ ކަމަކަށްނުވާނެއެވެ!   
ތިމާ އާއިއެކުގައި އުޅޭ ގާތް މީހަކާއިމެދު ހިތުގައި އެއްވެސް ޝައްކެއް އުފެދިއްޖެ ނަމަ އެކަން ރަނގަޅަށް ބަލާށެވެ! އެކަމުގެ ޙަޤީޤަތް އޮޅުންފިލުވާށެވެ! އޭނާ އާއި ސުވާލުކުރަންޖެހޭ ޙާލަތުގައި ސުވާލުކުރަންވެސް ފަސްނުޖެހޭށެވެ! ސުވާލުކުރުމުން ޖެހިދާނެ މައްސަލައަކަށްވުރެ ސުވާލުނުކޮށް ޝައްކުކޮށްގެން ހުރުމުން ލިބޭނެ ދެރަ މާބޮޑުވާނެއެވެ.  
ދިރިއުޅޭއިއރު އަނިބީމާ އާއިމެދުގައިވެސް އަދި ފިރިމީހާ އާއިމެދުގައިވެސް އެއްވެސް ބާވަތެއްގެ ޝައްކެއް އުފެދިއްޖެނަމަ ހަމަ މިބުނިމަގުން ކަންތައްކޮށް އެކަމުގެ ޙަޤީޤަތް އޮޅުންފިލުވާށެވެ! ވީހައި އަވަހަކަށް ހިތުން ޝައްކުތައް ފިލުވައިލާށެވެ!  
ނުބައި ޝައްކުގެމަތީގައި ހުރެވޭއިރު ހިތަށް އެއްވެސް ހަމަޖެހުމެއް ނުލިބޭނެއެވެ. އަނެކާ ކިތަންމެ ރަނގަޅަށް ކަމެއްކުރިނަމަވެސް ބަލައިގަންނަންވެސް އުނދަގޫވާނެއެވެ. އެކަމުގެ ސަބަބުން ދާނީ ފިތުނަތައް އިތުރުވަމުންނެވެ. އެ ފިތުނަތައް ބަދަލުވާނީ ނުބައި ހަސަދަވެރިކަމަކަށެވެ.  
ގާތް، އެކުގައި އުޅޭ މީހަކާއިމެދު އެއްވެސް ބާވަތެއްގެ ޝައްކެއް އުފެދިއްޖެނަމަ އެކަން ޙައްލުކުރަން އަވަސްވެގަންނަންވާނެއެވެ! ނޫންނަމަ ކަމުގެ ޙަޤީޤަތް އެނގޭއިރު މުޅި އުމުރަށް ހިތާމަކުރަންޖެހުމަކީވެސް ހަމަ މެދުވެރިކަމުން އަންނަ ކަމެކެވެ. އެއިރުން ކުރަންޖެހޭ ހިތާމަ މާބޮޑުވާނެއެވެ!  
ޝައްކުގެމަތީގައި ހުންނަން ހަދައިގެން އުފެދޭ ފިތުނައިގެ ސަބަބުން ކައިވެނިތައް ރޫޅިގެންވެސް އެބަ ދެއެވެ. ކައިވެނި ރޫޅޭފަހުން ޙަޤީޤަތް އެނގި ކުރިން ބުނިފަދައިން މުޅި އުމުރަށް ހިތާމަކުރަން އެބަޖެހެއެވެ. ޝައްކުކުރުމަކީ ފާފައެއްކަމުގައި ލައްވަވާފައިވަނީ މިފަދަ އެތައް ސަބަބުތަކެއް ހުރުމުންނެވެ.
 
- އިސްލާމީ ތިލަފަތުގެ ދަރުސަކުން