ދެން ބާއްވާ ރިޔާސީ އިންތިހާބު ކާމިޔާބުކޮށް ގައުމު އެއްކޮށް ބަދަލުކޮށްލާނެ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
އުމަރު ވަނީ މީގެކުރިން ދެ ފަހަރެއްގެ މަތިން ރިޔާސީ އިންތިހާބުގައި ވާދަކޮށްފަ އެވެ. އެންމެފަހުން އުމަރު ރިޔާސީ އިންތިހާބުގައި ވާދަކުރެއްވީ އަމިއްލަ ގޮތުން ކަމަށްވާއިރު، އޭނާ އެންމެ ފުރަތަމަ އިންތިހާބުގައި ވާދަކުރެއްވީ 2008 ގަ އެވެ. އެއީ އޭރު ގެންގުޅުއްވި ޕާޓީ އިސްލާމިކް ޑިމޮކްރެޓިކް ޕާޓީ (އައިޑީޕީ) ގެ ފަރާތުންނެވެ.
އެސްއެސްޓީވީގެ ޕްރޮގްރާމެއްގައި ވާހަކަދައްކަމުން އުމަރު ވިދާޅުވީ އަމިއްލަ ގޮތުން 2028 ގެ ރިޔާސީ އިންތިހާބުގައި ވެސް ވާދަކުރައްވާނެ ކަމަށާއި އެ އިންތިހާބު ވެގެންދާނީ ތަފާތު އިންތިހާބަކަށް ކަމަށެވެ. އެގޮތުން ސިޔާސީ ޕާޓީއަކީ ކޯއްޗެއްކަން ދިވެހިން މިހާރު ދަސްކުރަމުންދާ ކަމަށާއި މީގެ ހަތަރު އަހަރު ފަހުން ދިވެހިންނަށް ވަރަށް ރަނގަޅަށް ސިޔާސީ ޕާޓީތައް ދަސްވެ، ސިޔާސީ ޕާޓީތަކުން މި ގަންނަނީ ކޮން ގަނޑެއްކަން ރައްޔިތުންނަށް ވަރަށް ރަނގަޅަށް އެނގިފައި އޮންނާނެ ކަމަށް އުއްމީދު ކުރައްވާ ކަމަށް އުމަރު ވިދާޅުވި އެވެ.
ސިޔާސީ މައިދާނުގައި މިހާރު މީހުން ބަލަނީ ތެދުވެރިކަމާއި އަމާނާތްތެރިކަމަށް ކަމަށާއި މީހާ ޕާޓީއެއްގައި ހުރިތޯ ދެން ނުބަލާނެ ކަމަށް އުމަރު ވިދާޅުވި އެވެ.
"އެހެންވީމަ 2028 ވަނަ އަހަރަކީ އަޅުގަނޑު ދެކޭ ގޮތުގައި އަޅުގަނޑު ކާމިޔާބުކުރާނެ އަހަރު. އަދި އަޅުގަނޑު މުޅި ގައުމު އެއްކޮށް ބަދަލުކޮށްލުމުގެ ވަރަށް ބޮޑު ރެވޮލިއުޝަރީ ފެށުމަކަށް ވާނެ އަހަރު،" އުމަރު ވިދާޅުވި އެވެ.
އުމަރު ވިދާޅުވީ ރާއްޖެއިން ކޮރަޕްޝަން ފުނޑުފުނޑުކޮށްލާނެ ކަމަށާއި އަދި އިސްލާމީ ޝަރީއަތުގައި ހުރި ހުކުމްތައް ކޮރަޕްޝަނާއި، މަސްތުވާތަކެއްޗާއި އަދި މީހުން މެރުމާއި ދެކޮޅަށް ވެސް އަންނާނެ ކަމަށެވެ. މިއާއެކު ރާއްޖެ އެއްކޮށް ބަދަލުވެގެންދާނެ ކަމަށްވެސް އޭނާ ވިދާޅުވި އެވެ.