ފުލުހުންނާއި ސިފައިން ގުޅިގެން ކުރިއަށްގެންދާ ގައުމީ ސަލާމަތާއި ގުޅުންހުރި ހާއްސަ އޮޕަރޭޝަނެއްގައި ބައެއް ތަންތަން ބަލައި ފާސްކޮށް، 3 މީހަކު ހައްޔަރުކޮށްފިއެވެ.
ފުލުހުން ވިދާޅުވީ މިއީ ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން ކުރިއަށްގެންދާ އޮޕަރޭޝަނެއްކަމަށެވެ. އަދި މި އޮޕަރޭޝަނުގެ ތެރެއިން 3 މީހަކު ހައްޔަރުކޮށް، އެ މީހުންނާއި ގުޅުންހުރި ތަންތަން ބަލާ ފާސްކުރަމުންދާކަމަށް ފުލުހުން ވިދާޅުވެއެވެ.
ފުލުހުން މިރޭ އެކްސްގައި ހިއްސާކުރި ބަޔާނެއްގައިވަނީ، އިންޓެލިޖެންސަށް ލިބުނު މައުލޫމާތަކާ ގުޅިގެން ސިފައިންނާ ގުޅިގެން ގައުމީ ސަލާމަތާ ގުޅުން ހުރި އޮޕަރޭޝަނެއް ހިންގާކަން އިއުލާން ކޮށްފައެވެ. އެކަމާ ގުޅުން ހުރި ބައެއް މައުލޫމާތު ކަށަވަރު ކުރުމަށް ކަމަށް ބުނެ އެ ބަޔާން ކުޑަ ވަގުތުކޮޅެއްގެ ތެރޭގައި ނެގި ނަމަވެސް، އޮޕަރޭޝަން ކުރިއަށްގެންދާ ކަމަށް ފުލުހުން ވަނީ ބުނެފައެވެ.
މި އޮޕަރޭޝަންގެ ތެރެއިން ސިފައިންނާއި ފުލުހުން، އެޑްރެހުގެ ގޮތުގައި ‘ހ. ނާގޫރުގެ’ އަދި ‘ނޫރުލްއައިން’ ނަން ބޯޑު ޖަހައިފައިވާ ގެއަކަށް ވަދެ ވަނީ ބަލައިފާސްކޮށްފައެވެ. އަދި ގަރާޖެއް ވެސް ފުލުހުން ވަނީ ފާސްކޮށް، އެތަނުގައި ތިބި ބައެއް މީހުންނާ ސުވާލު ވެސް ކޮށްފައެވެ. އެ ގެ ތެރެއިން ބައެއް މީހުންނާ ވެސް ސުވާލު ކުރާ މަންޒަރު ވެސް ފެނުނެވެ.
މީގެ އިތުރުން ހުޅުމާލޭގެ ވިނަރެސްގެ އެޕާޓްމަންޓެއް ވެސް ފުލުހުން ބަލައި ފާސްކޮށްފައިވެއެވެ.
މި އޮޕަރޭޝަންގައި ފުލުހުން ވަނީ ޖުމްހޫރީ މައިދާން ކައިރިން ޕިކަޕެއްގައި ދިޔަ މީހަކު ހުއްޓުވުމަށް ފަހު، އޭނާ ދިރިއުޅޭ ގެ ވެސް ފާސްކޮށްފައެވެ. މައުލޫމާތު ލިބެ ގޮތުގައި އެ މީހާ ވެސް ވަނީ މިހާރު ހައްޔަރުކޮށްފައެވެ.
ފުލުހުން ވިދާޅުވީ މި އޮޕަރޭޝަނާއި ގުޅޭ ތަފްސީލްތައް ހާމަކުރަމުންދާނޭކަމަށެވެ.