މޯލްޑިވްސް ޕޯޓްސް ލިމިޓެޑް (އެމްޕީއެލް)އިން މާލޭގެ ވިޔަފާރި ބަނދަރުގައި ކޮންޓެއިނަރު އުފުލަން ބޭނުންކުރާ އާރުޓީޖީ ކެރޭނުތަކުގެ ނިޒާމު ޒަމާނީކޮށް، އަޕްގްރޭޑް ކުރުމުގެ މަސައްކަތް ފަށައިފިއެވެ. އެމްޕީއެލްއިން އެކްސްގައި ކުރި ޕޯސްޓެއްގައި ބުނީ، ކެރޭނުތަކުގެ ނިޒާމު އަޕްގްރޭޑް ކުރުމުގެ މަސައްކަތް ކުރިއަށްގެންދާނީ ދެ ފިޔަވައްސަކަަށް ބަހާލައިގެން ކަމަށެވެ. އެގޮތުން ފުރަތަމަ ފިޔަވަހީގައި، ކޮންޓްރޯލް އެންޑް ޑްރައިވް ސިސްޓަމް ޒަމާނީކުރާނެ ކަމަށް އެ ކުންފުނިން ބުންޏެވެ. އެއަށްފަހު، އަންނަ ޖުލައި މަހު ފަށާ ދެވަނަ ފިޔަވަހީގައި އިންޖީނާއި ހަކަތައިގެ އަޕްގްރޭޑްތައް ކުރިއަށްގެންދާނެ ކަމަށް އެމްޕީއެލްއިން ބުންޏެވެ. https://x.com/Portmv/status/2015725917390471353 އެ ކުންފުނިން ބުނީ އާރުޓީޖީ ކެރޭނުތައް ބޭނުންކުރަން ފަށައިފައި ވަނީ 2007ގައި ކަމަށާއި، އެ ނިޒާމަށް މިހާރު 19 އަހަރު ވެފައިވާއިރު، މިހާރު ގެންނަނީ ވަރަށް މުހިންމު އަޕްގްރޭޑްތަކެއް ކަމަށެވެ. މާލޭ ވިޔަފާރި ބަނދަރަކީ އެތައް އަހަރެއްވީ ބަނދަރެއް ކަމަށްވާއިރު، އެ ބަނދަރުގެ މަސައްކަތްތައް ހަލުވިކޮށް، ޒަމާނީ ކުރުމުގެ މަސައްކަތްތައް ކުރަން ވަނީ ނިންމައިފައެވެ. އަދި އެ ބަނދަރުގައި ޖާގައިގެ ދަތިތައް ދިމާވުމާ ގުޅިގެން، ތިލަފުށީ ބަނދަރު ތަރައްގީކޮށް، ބައެއް އޮޕަރޭޝަންތައް ބަދަލުކުރަން ވަނީ ނިންމައިފައެވެ.