ބިންވެރިޔާ ސްކީމުގެ ދަށުން، ހުޅުމާލެ ތިންވަނަ ފިޔަވަހީން ގޯތި ލިބިިފައިވާ ފަރާތްތަކަށް، އާ ލޭންޑް ޔޫސް ޕްލޭންގެ ދަށުން ދޫކުރާ ގޯތީގެ ރަޖިސްޓްރީ އާއި އެއްބަސްވުން ހަވާލުކުރުމުގެ މަސައްކަތް މިއަދު ފަށައިފި އެވެ. 
ވީ ކިހިނެއް؟ - ހުޅުމާލެ ތިންވަނަ ފިޔަވަހީގެ ލޭންޑް ޔޫސް ޕްލޭން އަށް ބަދަލު ގެނެސް، އާ ލޭންޑް ޔޫސް ޕްލޭނެއް ތައްޔާރުކޮށްފައިވާތީ، އެތަނުން ގޯތި ލިބިފައިވާ ފަރާތްތަކުގެ ގޯތީގެ ސަރަހައްދަށް ބަދަލު އައިސްފައިވެ އެވެ. މިދިޔަ މަހު ވަނީ، އެ ބަދަލާ ގުޅިގެން ހުޅުމާލެ ތިން ވަނަ ފިޔަވަހިން ގޯތި ހަވާލުކޮށްފައިވާ ފަރާތްތަކަށް އާ ލޮޓް ނަންބަރުތަކެއް ކަނޑައެޅުމަށް ގުރުއަތުލާފަ އެވެ.
ތަފްސީލް - ހައުސިން މިނިސްޓްރީން މިއަދު ކުރި އިއުލާނެއްގައި ބުނީ، ގޯތި ލިބޭ މީހުންނަށް ކުރިން ދޫކޮށްފައިވާ ބަންޑާރަ ގޯތީގެ ރަޖިސްޓްރީ ބާތިލުކޮށް، އާ ރަޖިސްޓަރީ ދޫކުރުމަށް ހަމަޖެހިފައިވާ ކަމަށެވެ. އަދި ގުޅިފަޅުގެ ލޭންޑް ޔޫސް ޕްލޭނަށް އައި ބަދަލާ ގުޅިގެން، މިއަދާ ހަމައަށް އެއްބަސްވުމުގައި ސޮއިކޮށް ގޯތީގެ ރަޖިސްޓަރީއާ ހަވާލުވެފައި ނުވާ ފަރާތްތަކަށް އިތުރު ފުރުސަތެއް ދިނުމަށް ހަމަޖެހިފައިވާ ކަމަށް ވެސް ބުންޏެވެ. 
އެގޮތުން:
ގޯތީގެ ރަޖިސްޓްރީއާ ހަވާލުވުމަށް އެޕޮއިންޓްމަންޓްއަށް އެދުމުގެ ފުރުސަތު ހުޅުވާލާފައިވަނީ، މިއަދުން ފެށިގެން 14 މާރިޗުގެ ނިޔަލަށް ހިޔާވެހި ޕޯޓަލް މެދުވެރިކޮށް
ގުޅިފަޅުގެ އެއްބަސްވުމުގައި ސޮއިކޮށް ރަޖިސްޓްރީއާ ހަވާލުވެފައިނުވާ ފަރާތްތަކަށް އެޕޮއިންޓްމަންޓަށް އެދުމުގެ ފުރުސަތު ހުޅުވާލާފައިވަނީ މިއަދުން ފެށިގެން 15 މާރިޗުގެ ނިޔަލަށް
އެޕޮއިންޓްމަންޓަށް އެދި ހުށަހަޅާނީ ހިޔާވަހި ޕޯޓަލް މެދުވެރިކޮށެވެ.  އެޕޮއިންޓްމަންޓްއަށް އެދުމުން، ޕޯޓަލް މެދުވެރިކޮށް އެމީހެއްގެ ފޯނު ނަންބަރަށް އެސްއެމްއެސްގެ ޒަރީއާއިން ރަޖިސްޓަރީ އާއި ގޯތީގެ އެއްބަސްވުމާއި ހަވާލުވުމަށް އަންނަންޖެހޭ ގަޑި އަދި ތަން އަންގާނެ ކަމަށް އިއުލާންގައިވެ އެވެ.
އަދި، އެޕޮއިންޓްމަންޓް ހަމަޖެހިފައިވާ ގަޑިއަށް ހާޒިރުނުވެއްޖެނަމަ އެ އެޕޮއިންޓަމަންޓް ކެންސަލްވާނެ ކަމަށް ވެސް އިއުލާންގައިވެ އެވެ.