ޒުވާން އެ އަންހެން މީހާ ބުނި ގޮތުގައި ބަޔަކު އޭނާގެ ބައްޕަ މަރާލީ އެވެ. އެ ހިތާމައިގައި ސިކުނޑިއަށް ގެއްލުން ލިބި، އޭގެ ސަބަބުން، ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މަރުކަޒަށް އޭނާ ގެންނަން ޖެހުނީ އެވެ.
އެކަމަކު މުޖުތަމައުގެ ކިބައިން އޭނާ އެދުނީ އެއީ މޮޔައިން ކަމަށް ނުދެކުމެވެ.
"އަޅުގަނޑުމެން ސިކުނޑީގައި މައްސަލަ އެބަހުރި. އެކަމަކު އެކަމަށް ބޭސް ފަރުވާ ވެސް ކުރަމުން މިދަނީ،" ނެޝަނަލް މެންޓަލް ހެލްތު ޑިޕާޓްމެންޓުން އާއްމު ކުރި، ހޭލުންތެރިކުރުވުމުގެ ވީޑިއޯއެއްގައި އަންހެން މީހާ ބުނެ އެވެ.
ބައްޕަ މަރާލީ ކިހިނެއް ކަމެއް އަދި އޭގެ ސަބަބުން އޭނާ ތަހައްމަލު ކުރަން ޖެހުނު ހިތާމައެއް އެ ވީޑިއޯގައި ކިޔައެއް ނުދެ އެވެ. އެކަމަކު އެ ޒުވާނާ ކިޔައިދިނީ، މަރުކަޒުގައި އޭނާ ކުރި ތަޖުރިބާ އެވެ.
އަންހެން މީހާ ބުނި ގޮތުގައި، މަރުކަޒުން ތަފާތު ވައްތަރުގެ ބަލިމީހުންނާ ބައްދަލުވި އެވެ. އެއީ، ސިކުނޑީގެ އެކި ބަލިތަކަށް ފަރުވާ ހޯދާ މީހުންނެވެ. އެ ތަނުގައި އުޅެގެން، އެ މީހުންގެ ދިރިއުޅުން ވެސް އޭނާ ދަސްކުރި އެވެ. އޭނާއަށް އެނގުނީ އެއީ އަނިޔާވެރިބައެއް ނޫން ކަމެވެ.
"އަޅުގަނޑު މުޖުތަމައުގެ ކިބައިން އެދެނީ ސިކުނޑީގެ ބަލިމީހުންނަކީ އަނިޔާވެރި ބައެއް ނޫން ކަމަށް ދެކުން. ވަޔަލެންޓް މީހުން ވެސް އުޅޭ. އެކަމަކު އެ މީހުންނަށް ވިސްނައިދީ، ގަވައިދުން ބޭސް ނަގައިތޯ ބަލައި ބޭސްދީ ހަދައި އެ މީހުންނާ ގުޅިގެން އުޅެވިދާނެ،" އަންހެން މީހާ ބުންޏެވެ.
އޭނާގެ ނަސޭހަތަކަށްވީ، އެއީ ވެސް އިންސާނުން ކަމަށް ގަބޫލުކޮށް، އެކަހެރި ނުކުރުމެވެ. އެހީތެރިވެދީފި ނަމަ، މުޖުތަމައަށް ފައިދާ ހުރި ބަޔަކަށް އެ މީހުން ވެސް ވެދާނެ ކަމަށް އޭނާ ބުންޏެވެ.
ގުރައިދޫގައި ހުންނަ ހާއްސަ އެހީއަށް ބޭނުންވާ މީހުން ބަލަހައްޓާ މަރުކަޒުގައި އެކި ސަބަބުތަކާ ގުޅިގެން ދައުލަތުން ބަލަހައްޓާ 28 މީހުން މިހާރު ވެސް ތިބެ އެވެ.
އޭގެ ތެރޭގައި މުސްކުޅި ބައްޔާއި އެހެނިހެން ބަލިތަކުގެ މީހުންނާއި އާއިލާއިން ނުބަލަން ވެގެން ދޫކޮށްލާފައި ތިބި މީހުން ވެސް ހިމެނެ އެވެ.
އެ ތަނުގައި ތިބޭ ބައެއް މީހުން ކުރިން 'ދައުރު'އަށް ކިޔައިދިން ގޮތުގައި، އާއިލާއިން އެގޮތަށް ދޫކޮށްލުމުން ވެސް އެ މީހުންނަށް ނަފްސާނީ ގޮތުން އަސަރުކޮށް، 'މޮޔައަކަށް'ވެ އެވެ.
ހާއްސަކޮށް، އަތްފައި ކޮށައިގެން، ލޯބިން ނުބަލާ ދަރިންނާއި އާއިލާ، މުސްކުޅިވެ، ގައިބާރުދެރަވުމުން ދޫކޮށްލުން އެއީ އެ މީހުންނަށް ހިތަށް ކެތްވާ ވަރުގެ ކަމަކަށް ނުވެ އެވެ. ނަތީޖާއެއްގެ ގޮތުން، ނަފްސާނީ ގޮތުން އެ މީހުން ދަށަށް ގޮސް، ނުކުޅެދުންތެރި ބަޔަކަށް ހަދާލަ އެވެ.
ނުކުޅެދުންތެރިކަން ހުންނަ މީހުންގެ ދަފްތަރަށް ބަލާއިރު، މިދިޔަ ޖޫން މަހުގެ ނިޔަލަށް، ނަފްސާނީ އަދި ވިސްނުމުގެ ނުކުޅެދުންތެރިކަން ހުރެގެން 3،600އަށް ވުުރެ މީހުން ވަނީ ރަޖިސްޓްރީވެފަ އެވެ. އެއީ:
ވިސްނުން/ސިކުނޑީގެ ނުކުޅެދުންތެރިކަން ހުންނަ 1،889 މީހުން
ނަފްސާނީ ނުކުޅެދުންތެރިކަން ހުންނަ 1،793 މީހުން
ބައްޕަ މަރާލުމުން ސިކުނޑި މައްސަލަ ޖެހުނީ؛ މިދެނީ ނަސޭހަތެއް
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ