ރައްޔިތުންގެ މަޖިލީހުގެ މެންބަރުންގެ ތެރެއިން ޖޭއެސްސީގެ މެންބަރު ކަމަށް އައްޔަން ކުރުމަށް ބިލެއްދޫ ދާއިރާގެ މެންބަރު އަހުމަދު ހަމްޒާއާއި މާވަށު ދާއިރާގެ މެންބަރު އަބުދުލް އަޒީޒު ޖަމާލު އަބޫބަކުރާއި ނޮޅިވަރަމު ދާއިރާގެ މެންބަރު މުހައްމަދު ނަޝީދު(ކާނަލް)އާއި ކަނޑިތީމު ދާއިރާގެ މެންބަރު މުހައްމަދު ހުސައިންގެ ނަން ހުށަހަޅައިފިއެވެ.
ހަމްޒާގެ ނަން ހުށަހެޅުމަށާއި ތާއީދު ކުރުމަށް ރޭ ބޭއްވި އެމްޑީޕީ ޕާލިމެންޓްރީ ގުރޫޕުގެ ބައްދަލުވުމުގައިވަނީ ފާސްކޮށްފައެވެ. މާވަށު ދާއިރާގެ މެންބަރު އަޒީބެއަކީ ޕީޕީއެމަށް ނިސްބަތްވެވަޑައިގަންނަވާ ބޭފުޅެކެވެ. ކާނަލު މިހާރު ހުންނެވީ ޑީއާރުޕީގައެވެ. މުހައްމަދު ހުސައިން ހުންނެވީ މިނިވަން މެންބަރެއްގެ ގޮތުގައެވެ.
ޖޭއެސްސީއަށް މަޖިލީހުގެ މެންބަރަކު އަލުން އައްޔަން ކުރަން ޖެހުނީ ކުރިން އެމަގާމުގައި ހުންނެވި މާމިގިލީ ދާއިރާގެ މެންބަރު ގާސިމު އިބުރާހީމު ރިޔާސީ އިންތިހާބަށް ކުރިމަތިލެއްވުމުން އޮޓެމެޓިކުން އެމަގާމުން ވަކިވުމުންނެވެ.
ޖޭއެސްސީގެ ގާނޫނުގައި ބުނެފައިވާ ގޮތުގައި އިންތިހާބު ކުރެވޭ މަގާމަކަށް އެކޮމިޝަނުގެ މެންބަރަކު ކުރިމަތިލާ ވަގުތުން ފެށިގެން އެ މެންބަރެއްގެ ގޮނޑި ހުސްވާނެއެވެ.
މަޖިލިސް މެންބަރުންގެ ފަރާތުން ގާސިމު ޖޭއެސްސީއަށް އިންތިހާބުވެވަޑައިގެންފައިވަނީ އެމްޑީޕީގެ ކެންޑިޑޭޓު މާރިޔާ އަހުމަދު ދީދީއާއި ވާދަ ކުރައްވައިގެންނެވެ.
ޖޭއެސްސީއަށް މެންބަރަކު އައްޔަން ކުރުމުގެ މައްސަލައާއި މެދު މިއަދު 1:30ގައި ގޮތެއް ނިންމާނެއެވެ.