މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން މާލޭގައި ފޯރުކޮށްދެމުން އަންނަ އާރްޓީއެލް ބަހުގެ ހިދުމަތް، މި ރޯދަމަހު ހަވީރު 6 އިން ފެށިގެން ރޭގަނޑު 10އާ ދެމެދު މެދުކަނޑާލުމަށް އެ ކުންފުނިން ނިންމައިފިއެވެ.
އެމްޓީސީސީން، ދެމުން އަންނަ ބަހުގެ ހިދުމަތް ހަވީރު 6އިން ފެށިގެން މެދުކަނޑާލަން ނިންމާފައިވީ ނަމަވެސް، މާލެ-ހުޅުލެ-ހުޅުމާލެ އާއި ހުޅުމާލޭގެ އެތެރޭގެ ބަސް ދަތުރުތަކަށް މާބޮޑު ބަދަލެއް ގެނެސްފައެއް ނުވެއެވެ.
އެމްޓީސީސީން ރޯދަމަހާއި ދިމާކޮށް އާރްޓީއެލް ބަހުގެ ހިދުމަތަށް ވަނީ ބައެއް ބަދަލުތައް ގެނެސްފައެވެ. އެގޮތުން އެމްޓީސީން އާންމުކޮށްފައިވާ ބަސް ދަތުރުތަކުގެ ޝެޑިއުލަށް ބަލާއިރު، މާލެ ސަރަހައްދުގެ ބަސް ދަތުރުތައް ފަށަން ހަމަޖެހިފައިވަނީ ހެނދުނު 6 ޖަހާއިރުއެވެ. މީގެކުރިން ދަތުރުތައް ހެނދުނު 5:45 އިން ފެށިގެން ރޭގަނޑު 12:15އާ ހަމައަށް ކުރެއެވެ.
މި ރޯދަ މަހަށް ހާއްސަކޮށްފައިވާ މާލޭގެ ބަސް ޝެޑިއުލަށް ބަލާއިރު، ތަރާވީސް ނަމާދަށް ބަސް ދަތުރުތައް މެދުކަނޑާލުމަށްފަހު، ދަތުރުތައް ފަށާނީ ރޭގަނޑު 10 ޖަހާއިރެވެ.
ބަހުގެ ޝެޑިއުލަށް އެމްޓީސީސީން ގެނައި ބަދަލާ ގުޅިގެން، ބައެއް ފަރާތްތަކުގެ ފާދުކުރިޔުން އެ ކުންފުންޏަށް ވަނީ އަމާޒުވެފައެވެ.
އެ ފާޑުކިއުންތަކަށް ރައްދު ދެއްވާ އެމްޓީސީސީގެ ސީއީއޯ އާދަމް އާޒިމް ކުރެއްވި ޓްވީޓްގައި ވިދާޅުވީ، މަޖީދީމަގުގައި ތިން މިސްކިތެއް ހުރުމާއެކު ތަރާވީސް ނަމާދުގެ ވަގުތުގައި އެމަގު ބްލޮކް ވާނެތީވެ، މަޖީދީމަގުން ދަތުރު ކުރުން މަނާކޮށްފައިވާ ކަމަށެވެ.