ޒުވާން ޅެންވެރިންނަށް އަމާޒުކޮށް މިއަހަރު ޚާއްސަ ހަރަކާތްތަކެއް ހިންގާނެކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.
ވަޒީރު މިހެން ވިދާޅުވީ މި އަހަރުގެ ޅެންވެރީންގެ ދުވަސް ފާހަގަކުރުމަށް ބޭއްވި ހަފްލާ ޝަރަފުވެރިކޮށްދެއްވާ ވާހަކަފުޅު ދައްކަމުންނެއެވެ. މި އަހަރުގެ ޅެންވެރީންގެ ދުވަހުގެ ޝިއާރަކީ" އަހަންނަކީ ދިވެއްސަކީން، ދިވެހި އުޅުމުގެ ވެއްސަކީން" އެވެ.
ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވީ ޅެންވެރިކަން ދިރުވާ އާލާ ކުރުމަށްޓަކައި އެ ވުޒާރާއިން ގިނަ މަސައްކަތްތަކެއް ކުރަމުންދާކަމަށެވެ. އަދި އަމިއްލަ ޅެންވެރިކަމުގެ ޖަމްޢިއްޔާތަކާއި ލިޔުންތެރިކަމާއި ގުޅިފައިވާ ޖަމްޢިއްޔާތަކުންވެސް ފަރުދުންގެ ފެންވަރުގައި ގިނަ މަސައްކަތްތަކެއް ކުރަމުންކަމަށްދާކަން ވަޒީރު ފާހަގަކުރެއްވިއެވެ.
ވަޒީރު އާދަމް ނަޞީރު ވިދާޅުވީ، ޅެންވެރިކަމުގެ ދާއިރާއިން މި އަހަރު ވެގެންދާނީ ޅެންވެރިންނަށާއި އަދި ޚާއްސަކޮށް ޒުވާން ޅެންވެރިންނަށް ޅެންވެރިކަމުގެ ހުނަރު ދަސްކޮށްދީ މީގެ އިތުރު ހަރަކާތްތަކެއް ކުރިއަށްގެންދާނެ އަހަރަކަށްކަމަށެވެ.
"ޤައުމެއްގައި ޅެންވެރީންގެ ވަރަށް ބޮޑު ވާޖިބެއް އެބައޮތް. ދިވެހި ޅެންވެރީންގެ މާޒީއަށް ބަލާއިރު ދިވެހި ޅެންވެރިކަން ވަނީ އެ ޒިންމާ އަދާކޮށްފައި. އެއީ ދީނީ ޒިންމާ، ޤައުމީ ޒިންމާ، އިޖްތިމާއި ގުޅުމުގެ ޒިންމާ، ޤައުމީ ތަރައްޤީއާއި އެކުވެރިކަމުގެ ޒިންމާ، ހިތްވަރު ދިނުމާއި ބާރު ދިނުމުގެ ޒިންމާ.. މިކަންކަން ދިވެހި ޅެންވެރިން ވަނީ އަދާކުރައްވާފައި." ވަޒީރު ވިދާޅުވިއެވެ.
ވަޒީރުގެ ވާހަކަފުޅުގައި ވަނީ ޅެންވެރީންގެ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި މެސެޖަށް އަލިއަޅުވާލައްވާފައެވެ. އެގޮތުން ޅެންވެރިންގެ ޝުއޫރުތަކުން ދަރިން ތަރުބިއްޔަތު ކުރުމާއި ޤައުމީ ލޯބި އިތުރުކުރުމާއި އަޙްލާޤު ދިރުވުމަށް ހުރިހާ ފަރާތްތަކުންވެސް މިހާރުވެސް އަދި ކުރިއަށް އޮތްތާނގައި މަސައްކަތް ކުރުމަށް ވަޒީރު ވަނީ އެދިވަޑައިގެންފައެވެ.
މި އަހަރުގެ ޅެންވެރީންގެ ދުވަސް ޚާއްސަކޮށްފައިވަނީ ދިވެހި ބަހަށް އަގުހުރި ޚިދުމަތްތަކެއް ކޮށްދެއްވާފައިވާ، އަދި ގިނަ ބައެއްގެ ލޯތްބާއި އިޙްތިރާމް ހޯއްދަވާފައިވާ ދިވެހިބަހުގެ އުސްތާޛް، ނިޝާން ޢިއްޒުއްދީންގެ ޢިއްޒަތުގެ ވެރިޔާ ޢަބްދުﷲ ޞާދިޤު، ސޯދުބެއަށެވެ.
މި ރަސްމިއްޔާތުގައި ވަނީ "ސޯދުބެގެ ޅެންބަހުރުވަ 3" ނެރެދެއްވާފައެވެ. އަދި ސޯދުބެގެ ޚިދުމަތްތައް ފާހަގަކުރައްވާ، ޚާއްސަ ހަނދާނީ ފިލާއެއް ވަނީ އަރުވާފައެވެ.